面對面
遲到的青春 樂瞳
2012年04月04日
尼采說，遲到的青春是最持久的青春，尤其是靠臉孔吃飯的，不惜扭盡六壬，力抗歲月。得天獨厚如樂瞳，明明芳齡 25，偏偏臉蛋跟時間不接軌，去年演活《點解阿 Sir係阿 Sir》反叛中學生「中女」，到《當旺爸爸》愛發明星夢的大學生「高如寶」，成了無 綫新紮「少女」代表，然某程度也叫她原地踏步。
「我都希望可以呢個身高、樣貌，殺出一條血路囉！雖然我都係 keep住做一啲少女呀、妹妹 嘅角色，但我都希望可以叫大家留下印象。始終嵋家在 TVB呢啲角色唔多，但都希望當大家諗起『阿妹』，就會諗起我。」
當然不想被局限，樂瞳說：「我梗係唔想去到 30歲，都仲做緊人哋阿妹啦；就算要做人阿媽，都有做人阿媽 嘅發揮。但機會真係唔到自己控制，好似唯唯（梁烈唯）已經 30幾歲，都係做緊少年。」
童顏既可是殺着、也可是負累，真的成也青春、敗也青春。不過仍有青春透支的人，畢竟是幸運的
當旺阿妹
原名叫龔茜彤的樂瞳， 5年前趁讀樹仁大學 BBA課餘時間任模入行， 06年參加過《美女廚房》和《一擲千金》，也諗過訓練班，到 09年進軍樂壇，拿過叱咤「生力軍女歌手銅獎」，可惜時不與我，惟有返回 TVB重新開始。賣唱功賣演技都無功而還，偏偏「本色演出」扮中學生，卻拯救了樂瞳兜兜轉轉的演藝事業。憑演少女打響名堂，這次在《當旺爸爸》的戲分，甚至緊貼鍾嘉欣等主角。
始終我舊年先可以多戲拍，呢啲情況仲可以接受嘅，但過多幾年都係咁嘅話就係苦況。呢排拍緊 嘅都係做一啲少女（角色），在《大太監》做一個有少少心計 嘅妃子，都係一個新嘅突破啦，終於脫離咗做妹仔。但係其他好似《護花危情》、《情越海岸線》我都仲做緊少女……在《情越海岸線》我做一個好（喜歡）蒲嘅女仔……平時在屋企人面前好乖，後來識咗啲壞人就沉淪咗。
我都想做多啲唔同嘅角色畀人睇，唔係淨係做少女或者反叛 嘅（角色）。我都希望話畀人知我都可以做到成熟嘅角色㗎！我家成日出街，啲人都問「點解你真人咁靜咁斯文？我以為你會好似『中女』咁添。」
女神與樂小姐
其實個樣可以靠化妝髮型補救，雖然我係生得矮，都可以做到好成熟 嘅（感覺）。只不過大家家畀我 嘅定位都係少女。反而入行時唔識化妝，會將自己化到好大個，所以好多 TVB嘅化妝阿姐都話「點解你個樣愈來愈細個嘅？仲細過你啱啱入行嗰時！」……（童顏）係可以擺多幾年嘅，好多人都同我講「有得做少女就梗係做多幾年啦，唔通做人媽咪咩？」
但在電視台競爭好大，我個樣會有啲限制，希望再浸多幾年，等我演技成熟嘅時候，可以做到《宮心計》呢啲戲。家做住阿妹先，累積多啲經驗，或者遲啲可以做人家姐，帶一個訓練班（出來） 嘅妹妹呢。一步一步嚟啦，由我行出訓練班，我就知自己唔係一步登天嘅人。
樂瞳在《當旺爸爸》中算係第三女主角，「我同爸爸（夏雨）、大阿哥（麥包）最好傾，佢哋會睇我點做戲，然後幫我執。」
去年樂瞳憑《點解阿 Sir係阿 Sir》的援交學生妹「中女」角色，被網民選為「高登女神」。「其實我本身好乖，但自從『中女』之後就有好多監製搵我做反叛女仔。」
《當旺爸爸》播出一週，熱心網友已在維基百科上替樂瞳更新個人檔案資料，更如此補充寫道：「樂瞳於溫馨喜劇《當旺爸爸》首度擔任第三女主角……被指有機會競逐《萬千星輝頒獎典禮 2012》
『最佳女配角』及『我最喜愛的電視女角色』獎項。」「我覺得自己幾幸運，每次有劇出街都會有網民支持，都好開心有呢啲觀眾緣。」之前她被封網絡女神，但有網友質疑其認受性，甚至咬定有打手造勢。
舊年播《阿 Sir》時我有上網睇過啲留言，我從來唔覺得自己係女神。好奇怪，出到去無論係傳媒、工作夥伴、周邊嘅人；甚至街上見到我 嘅妹妹，都叫我「女神」，咁我都會話唔好咁叫我，最怕人哋稱呼我做「樂小姐」同「女神」。因為大家心目中嘅樂小姐，係位高權重、好有威嚴，我就好怕呢一個稱呼。
在新劇《大太監》中樂瞳飾演其中一位妃子，跟飾演同治帝的梁烈唯和扮演皇后的唐詩詠有不少對手戲。
08年樂瞳獲 DJ Tommy賞識，先後推出過兩張 EP，更奪「叱咤樂壇生力軍女歌手」銅獎，去年已轉投星煥國際，預計今年底推出唱片。
去年台慶頒獎禮，樂瞳殺入「飛躍進步女藝員」最後五強。「咁自己都有信心攞獎，最後馬賽攞到自己都覺得正常嘅……咁我覺得自己仲有機會再提名嘅。」
而「女神」從來都係大家畀我嘅稱號啫，其實佢哋（網民）有好多女神，都係日新月異嘅，出咗新一個就唔會記得我㗎啦。我曾經可以成為系列入面其中一個，都覺得好開心。我諗我係偏向學生、阿妹嗰種感覺嘅女神啩，可能我着校服令到大家諗番以前讀書嘅嘢啩。
樂瞳在大澳土生土長、中學時才舉家搬至東涌居住，自言是一個「好低調、亦唔覺有男仔對我有興趣」的女生，甚至初戀也是在中四時才發生。
我細個唔受男仔歡迎，好樣衰㗎。我化咗妝都可以（看來）好 sweet、好 sweet，但以前唔可以化妝，本身戴住副眼鏡，比家肥十幾磅，咁你覺得我可以有幾吸引呢？同埋條裙又長過膝頭，唔係《阿 Sir》嗰條裙咁短。女同學會覺得我係班花，但男生就覺得我係豬扒，哈哈，好極端。
好冇安全感
06年，經 model朋友介紹，樂瞳以原名龔茜彤參加《美女廚房》的「美少女廚神」比賽，輸給冠軍賈曉晨，後來她卻加入藝員訓練班。
入行近 5年，事業逐現曙光，身為長女的樂瞳，終於有能力交出第一份家用。「一入訓練班都唔係搵得多，成廿歲人畀唔到錢屋企人，自己都唔好意思。身邊嘅朋友仔、同學仔都搵到份好穩定嘅工作，畀到家用，但我連自己都未養得掂，仲要屋企人問番我夠唔夠使，驚我搭車搭晒啲錢，會冇錢食飯。」
一直以來，我嘅目標係最基本畀到幾千蚊屋企人都好吖。之前有次爆 show，收到 5位數嘅錢，但講緊係一年先一次，同普通人返工除番條數，都係差唔多。……但家每個月都畀到 5位數字家用囉。
以前要節衣縮食，因為住得遠，車費都佔人工一大半，所以要好慳，我連街都唔敢出，盡量少買衫，買都只敢買好平，一個月只敢買一次。就算家賺多咗……我都唔會畀自己買 嘅嘢貴過 4千蚊，之前媽咪個銀包用爛咗，我就送咗個 Chanel銀包畀佢，仲貴過我自己用嗰個。
樂瞳父母（右、中）為大澳原居民，家庭生活簡單，弟弟現為大學生，她有感自己有養家責任：「屋企唔算有錢，咁始終我應該要照顧屋企人。」
我想盡量儲起啲錢，因為我好冇安全感，成日都覺得如果唔好彩將來又冇嘢做，都希望有錢應付到。身邊朋友都奇怪，話晒你係明星，點解唔買名牌袋，其實我都想買一個袋、好想獎勵一下自己，但係幾萬蚊一個袋喎，咁不如留番將來買架車或者租樓住實際啲啦！
我好需要安全感、諗嘢又好悲觀，甚至已經諗到將來嫁唔到人，都起碼有能力養自己囉。男人係靠唔住，特別係有錢 嘅，呢個世界咁多誘惑，除非佢可以令我相信佢唔可以冇咗我，咁我就相信我哋可以永遠係一齊，但愛情都冇永遠。可能我睇好多葉念琛 嘅戲，覺得男女之間都係呃呃 氹 氹，於是覺得自己靠自己係好驕傲。
男人靠唔住？
之前曾在訪問中，問及無 綫另一位童顏代表郭晉安，如何看童顏演員戲路狹窄，他解釋：「你唔會見佢做到一個時裝劇嘅主角，佢只可以做到一個好重要嘅角色，會有一條愛情線，但佢上面要有一個阿哥、家姐，因為觀眾嘅共鳴位唔會在佢身上。」
但跟我說出「男人靠唔住」的樂瞳，以異常堅定的語氣道出：「我唔係港女、唔係市儈，但如果男友負債嘅話，我未必有能力幫到佢，呢方面我會小心謹慎，要好認識同清楚對方先敢在一齊。我覺得搵到嚿錢，應該易過搵到個可靠 嘅男人。」只得 5呎 2吋的她，突然氣勢變強，何其壓場。葉念琛下次開戲，不妨考慮一下這位「樂小姐」。
撰文：孫月華
攝影：范仲良
化妝： Winki Tsang@ idees image
髮型： Bowie Lo@ CHIN.G
形象： Bryan@ the Flaming
服裝： Rosebullet
Orignal From: 遲到的青春 樂瞳
沒有留言:
發佈留言