07年，嘉欣憑劇集《溏心風暴》中「常在心」一角，「喊包」形象大受歡迎，往後再憑《溏心風暴之家好月圓》的「于素心」，以及去年的《點解阿Sir係阿Sir》，令「喊包」形象深入民心，更憑《點》劇成為「最佳女主角」大熱人選。
嘉欣哭崩全城，成功感動觀眾的同時，原來已令自己身心受創，飽受壓力的她，更一度懷疑自己好似鄭秀文一樣患上抑鬱症，為了保養好自己成為女版筍盤，最近她決定返老家加拿大，休息兩個月好好充電回氣。
鍾嘉欣最近在劇集《當旺爸爸》中首次飾演女警角色，本來不愛演飾好動角色的她，竟然大呼拍得開心輕鬆，亦是她入行七年以來，第二部劇集拍完時，因為不捨得而哭起來，其中一個原因就是跟劇中的「爸爸」夏雨，拍出真正父女情。
拍出真正父女情
原來拍攝期間，夏雨每日收廠後，都會親自揸車送嘉欣返家，令她感到「親情」的溫暖，「平時我哋喺車好多嘢講嘢，到最尾一日大家靜晒，本來我好想講：「多謝爸爸你日日車我，喺我心裏面真係好溫暖。」我最後都係冇講到，只係講呢次係你最後一次車我，佢仲話「傻咩！點會係最後一次！」見佢等埋我入屋先走，我即刻諗返初入行時，嗲哋嚟探我，我送佢入機場嗰幕，所以我返到屋企即刻喊呀！好唔捨得，拍咁多部戲，係第一套《皆大歡喜》先至會咁唔捨得喊咋！」
嘉欣坦言慶幸這部劇飾演傻更更重親情的「高如珠」， 可以每天帶着笑臉開工，「成日喊真係會搞到自己抑鬱，你知唔知拍喊戲好傷身㗎！滴滴都係真眼淚，先要令自己傷心，咁先感動到人，所以每次拍完套好悲嘅戲，係需要時間去收拾心情，但係每次都冇時間去做，積積埋埋好辛苦，拍到好似《當旺爸爸》呢啲輕鬆小品，我會撲埋去，成個人放鬆晒去演，好似休息咗一樣。」
唔想用喊包餵飽觀眾
對於「喊包」形象深入民心，嘉欣卻認為自己不是「喊包」材料，「其實有邊個女主角唔使喊？我唔係成日拍喊戲，只係大家將焦點放咗去喊度，我做Miss Koo只係最尾得三場喊。不過不停喊都會驚令大家麻木，我唔想用喊包餵飽觀眾，等如我細個好鍾意食巨無霸，一日食足六次都會厭，觀眾都係一樣，希望啲監製可以搵我試下其他角色，我真人唔係咁鍾意喊㗎！我都等緊機會做到奸、醜或者弱智角色，我自己有晒畫面喺度㗎啦！」
喊到傷身的嘉欣，最高紀錄一年拍六劇，在長期沒休息下，身體開始發出警號，訪問當天她亦有感冒發燒令她不得不停工兩月休息，免得捱到好似鄭秀文和張可頤一樣，「精神之外，體質真係好差，每個月就感冒一次，再起埋濕疹，就知道係一個警號，之後睇張可頤同鄭秀文個專訪，乜佢哋個症狀同我咁似，知道自己唔放假唔得。無錯，人生係有好多機會擺喺面前，但冇咗健康身體都把握唔到，長命工夫長命做，就算拍到只係畀到三成狀態，咁都無意思啦！」
化妝：Jessica Chan
髮型：Green@Chin'G
場地：FilMe Home
膠卷專門（2575 3355）
嘉欣與父母感情要好，不時一起外遊。
Orignal From: 拍喊戲傷身 怕變鄭秀文 鍾嘉欣返加國充電
沒有留言:
發佈留言