近年無綫的頒獎禮，開始注重民意基礎，願意給予真正有實力的演員正面鼓勵，繼去年麥長青憑《巾幗梟雄之義海豪情》的「非凡哥」奪「最佳男配角」後，今年黃智賢亦憑《潛行狙擊》中的「辣薑」得到「最佳男配角」。入行22年，黃智賢以往最令人深刻的角色，莫過於《真情》中的「阿海」，但始終未能造成熱潮，直到今次《潛》劇的「辣薑」終受到網民熱捧，支持聲音比男主角「Laughing哥」更甚。黃智賢坦言今次奪獎猶如公司開了綠燈，得到正式的認同，將來監製亦夠膽派演一些更重要角色，離一線之路又近一步。採訪 : 杜淑霞 場地：Hair Corner 髮型：Willie@Hair Corner
今年的《萬千星輝頒獎典禮》被譽為最貼近觀眾口味的一屆，在《潛》劇飾演「辣薑」被觀眾激讚的黃智賢得獎，外界一致贊同之餘，他當晚的得獎感言，亦被外界認為最感人的一個，他除了公開多謝亡母外，還對結婚7年的圈外太太大講「我愛你」。
黃智賢日前接受本報專訪時，坦認感言一早想好，並非預了會得獎，只是不想萬一得獎，漏了要多謝的人，「嗰日下午喺現場，好多同事話我係大熱，恭喜我，嗰時我淨係諗捧到咁高，唔係我攞，撻番落嚟咪好痛，但都會諗定啲嘢講，其實原先個版本仲長，只係宣佈完好想攬住嘉穎同司棋佢哋，三十秒所剩無幾。」
「阿海」奠定演技基礎
黃智賢說當晚時間太倉促，其實還有很多監製都無機會答謝，譬如99年離開無綫，再到03年回巢後，給予他不少機會的李添勝，以及用得最長時間的《真情》監製徐遇安，但最後只可以多謝「珍姐」（曾勵珍），因為當年是珍姐指定他做「阿海」一角，奠定他今日演技的根基。
黃智賢承認，有今日全靠監製肯畀機會，今次得獎更加強了監製起用他的信心，「有個獎始終實質啲，有監製同我講，想將我擺高啲，依家可以放心，夠膽用我，因為得獎就好像公司開咗綠燈一樣，不過機會多咗，將來都係要靠自己努力，唔敢講話挑戰男主角，做好每個劇先係最重要。」
首次公開講我愛你
對於工作夥伴的答謝詞，黃智賢在上台前早已盤算好，對母親和太太的感言卻是真情流露，「我有諗過要點樣多謝屋企人同太太，但係最後無時間，咪唯有將同太太二十幾年嘅相處，用好簡單三個字『我愛你』包含晒！其實當年我哋喺紐西蘭旅行結婚，所以我無試過咁公開講我愛你，呢次先係第一次咋！」
外界都為這段愛的宣言感動，反而黃太竟然反應不大，黃智賢說：「我當晚趁休息打畀佢，佢都冇乜反應，淨係話同我哋隻狗CoCo一齊睇緊，之後嗰晚佢同我食日本燒烤慶祝，佢話好多朋友話我公開講『我愛你』好感動，仲問我『乜應該好感動咩？』雖然佢冇講咩，不過佢呢排對我真係好咗，哈哈！」
後記：緋聞得啖笑
黃智賢笑言得獎後，只敢開心兩、三日，因為第二日仍要為新劇《名門望族》開工，正所謂人紅自然是非多，他果然開心得幾日，便傳出跟張可頤的緋聞，他坦言根本得啖笑不用澄清，反而騷擾到太太令他最不安，「佢知道之後好驚，畀人跟住咁耐都唔知，我唯有安慰佢啲相影得唔太差，但係都係嗰句，唔好再搞我老婆啦！」
Orignal From: 奪男配角等同公司開綠燈 黃智賢：監製依家夠膽用我!
沒有留言:
發佈留言