忽然1周第854期

大封面

日本裸浸溫泉　機場嗌「老公」　邵美琪秘嫁精壯打星

2011年12月09日

自99年被梁詠琪硬搶鄭伊健後，輸家邵美琪（Maggie）唔再輕易信男人，感情生活dry足十年，而曾許下承諾會照顧Maggie一生一世的伊健，形象亦一度插水。

事隔12年，「奪麵雙琪」來到最終回，梁詠琪月前與西班牙佬閃婚、鄭伊健亦傳出婚訊，原來邵美琪亦唔執輸。11月26日，邵美琪與細她9年的打星施祖男飛日本度蜜月浸溫泉。於香港機場禁區，她更一反倔強孤僻性情，不避嫌於人前多次叫施祖男做「老公」。

本周一（5日），激情10日之旅結束，對於秘婚一事，邵美琪未有否認，施祖男更叫記者筆下留情。46歲邵美琪終以「施太」之名趕上結婚尾班車，在其傷痕纍纍的感情路上，終於贏番鋪。

激情10日

12月5日甜爆返港玩足十日，兩人於周一（五日）晚上十一時多抵港，邵美琪見記者採訪一臉驚愕，但對所有提問笑而不答。一臉甜絲絲的她，明顯對今次蜜月之旅甚為滿意。

已屆剩女之列的46歲邵美琪，08年尾拍杜琪峰執導的電影《機動部隊─同袍》。在杜Sir穿針引線下，與打仔施祖男（現年37歲）秘密撻着。雖然男友早前被本刊踢爆疑似偷食，與熱褲索女酒店夜會六小時，但大方的邵美琪不計前嫌，選擇相信男友，兩人感情比之前更加穩定。據男方好友透露：「上次Vinz（施之洋名）俾人影到佢揸Maggie架車接女，Maggie只係問咗幾句就冇再追究。Vinz 覺得女友懂事又大方，佢哋經過呢件事之後，感情仲好咗。Maggie年紀唔細，早排聽Vinz講覺得自己已經搵啱人，係時候做老襯喎。佢話同 Maggie有共識，唔會公開，不過有唔少相熟嘅親戚朋友都知佢哋結婚。」

11月26日當眾叫老公

邵美琪和施祖男步入禁區後，警覺性較鬆懈，肩並肩走到免稅店選購香水，有商有量，十足老夫老妻。

邵美琪一句：「老公，呢支好唔好呀？」男的認真地試聞香味，為兩人的冰火旅行加添浪漫甜蜜香氣。

獲「老公」點頭，邵美琪即如小女孩般對着「老公」甜笑，乖乖打開銀包俾錢。

溫馨到埗

到達日本機場，施祖男即大男人上身。推着所有行李的他，用英語跟當地關員溝通，更不時與邵美琪四目交投。

見記者彈開

記者拍照，邵美琪即彈開，更愈行愈遠。不過施祖男護妻心切，着對方走近自己身邊，做個有承擔男人。邵美琪今次終於苦盡甘來。

為妻護航

邵美琪被記者咬實唔放，「老公」即上前用手遮擋為妻護航，他更主動跟記者交涉。

分車走

為撇記者，施祖男安全護送邵美琪上的士後，才與男友人登上另一架的士離開。

前後腳返家

邵美琪先一步返回北角半山威景臺寓所，施祖男在油麻地放下友人後，最終也是返回上址。

甜蜜揀香水
早前邵美琪留在國內連拍兩套電視劇，拍罷即計劃與施祖男外遊。11月26日早上7時許，邵美琪與施祖男前後腳出現香港機場，準備飛往東京。入到禁區後，兩人警覺性隨即鬆懈，並肩步行至免稅店，更懶理途人認出，繼續有說有笑。邵美琪購買香煙後，兩人轉攻香水櫃位。面對眼前多款精美香水，施祖男甚有耐性站在一旁等候。其間邵美琪對一支Chanel香水愛不釋手，遞上沾了香水的紙條給施祖男試味，然後望住男方甜笑說：「老公，呢支好唔好呀？」之後記者親耳聽到邵不止一次稱呼施祖男做「老公」。

見「老公」點頭示意，邵美琪隨即打開銀包俾錢，為其甜到漏的十天日本之旅，加添一絲香氣。兩人於店內逛，至機場最後召集廣播，才急步前往閘口登機。經過四個多小時的航程，邵美琪一臉疲態。步出機艙時，施祖男即細心問她：「今晚浸完溫泉就會冇咁攰啦，等陣使唔使買定啲嘢先去搭車?」看來二人於寒冷的日本冬夜裸浸溫泉，隨時有機會二人去三人返。

過了日本海關後，二人步出機場，由友人接送下驅車離開，向東京郊區方向出發。

今次日本之旅，主菜是去東京箱根浸溫泉，知情者透露：「Maggie早前返大陸拍嘢好辛苦，成日話想去日本浸溫泉。喺日本浸溫泉唔可以着衫，仲係男女分浸。為咗同Maggie日日二人世界浸溫泉，Vinz一早book定房內有私人溫泉嘅酒店，咁就可以慢慢享受啦！」

默認做施太
經過十天的朝夕相對，本周一（5日），兩人於晚上11點返到香港機場，邵美琪出閘時春風滿面。對於記者一連串是否已婚、蜜月裸浸溫泉等提問，邵美琪雖未有正面回答。不過觀乎她每聽到老公、施太等稱號，都由心而發地笑不攏嘴，答案盡在不言中。
施祖男見「老婆」被記者追訪，主動上前搭實本刊攝影師膊頭，禮貌地求情：「都影得差唔多啦，請筆下留情。」對於記者追問是否已婚？施生未有否認，只笑住表示：「俾啲空間我哋啦！」說畢即為邵美琪護航前往的士站。有老公沿途遮風擋雨錫到燶，邵美琪真係要感謝梁詠琪當日橫刀奪愛，她才能覓得今日的幸福。

09年電影《機動部隊─—同袍》舉行首映，正熱戀的邵美琪與施祖男不避嫌企埋一齊合照。《蘋果日報》圖片

同居兩年
施祖男原本住土瓜灣舊樓，與邵美琪拍拖不久便搬往女方的北角半山寓所同居，出入駕駛邵的白色豐田bB（圖）。

揸邵美琪車

會女斷正
今年7月中，施祖男趁邵美琪在大陸拍劇，駕駛邵的座駕接送一名穿熱褲的妙齡少女，不過邵美琪不計前嫌，與施的感情有增無減。

奪麵雙琪最終回
正所謂爭得到亦未必好，情路坎坷的邵美琪，雖曾獲伊健承諾照顧一世，可惜最後事與願違。伊健轉投梁詠琪七年，最終亦難逃分手收場。時至今日，好勝 Gigi繼續好勝，選擇於今年10月3日伊健生日前夕，與拍拖只有半年的西班牙籍Sergio閃婚，婚後不時拖住老公高調巡遊。「奪麵雙琪」三主角中第一個跑出的她，上周六（3日）更以勝利者姿態為其餘兩人送上祝福。

打到去法國
今年37歲的施祖男生於香港，三歲隨家人移居法國，操流利法語，七歲開始研習跆拳道和空手道，是黑帶高手。

施祖男27歲回港，經朋友介紹加入演藝界，曾參演《殺破狼》、《龍虎門》、《男兒本色》、《機動部隊——同袍》等電影。09年更獲法國導演垂青，擔演《Urban Wolf》男主角，更憑該片奪得The Weddy Awards頒發「最佳個人演出獎」。早前他亮相港台節目《功夫傳奇詠春無華》，更拜名師雷明輝門下學藝。08年尾力追邵美琪後，施便入住女友位於北角威景臺香閨。

施祖男（左）除了是動作演員，也在不少電影擔任武指。早前他為港台拍了《功夫傳奇》一展武功。

拍過不少電影的施祖男，曾與吳京合作《男兒本色》。

記：記者梁：梁詠琪

記：前幾日見到你同老公行街，好sweet喎?

梁：我哋去睇家具，裝飾屋企。

記：之前有傳伊健下年結婚，仲有冇同佢聯絡?

梁：（先愕然，後笑得燦爛）多謝你呢個問題。

記：知唔知連邵美琪都結咗婚？

梁：我會祝福佢……我結婚生活都好好，總之希望人人都開心啦。

伊健放下心頭大石
搵到個好歸宿的梁詠琪，大方向眾人送上祝福，反之當年被指負心的鄭伊健，撇Gigi即拖Yoyo（蒙嘉慧）。雖有傳兩人好事近，不過至今仍然未有實質行動。上周六（3 日），伊健與Yoyo首次被影到十指緊扣返回伊健黃埔老家探父母。離開時伊健對邵美琪結婚一事，先是愕然，然後微笑，未有回應。其間Yoyo聽到「邵美琪」三字，邊笑邊想鬆開手，惟伊健一直拖實唔放，兩人直奔停車場取車。

「奪麵雙琪」中的兩位女主角都已搵到好歸宿，當年山盟海誓未能兌現的伊健也應如釋重負，難怪他笑得特別開心。如今三位當事人各自拖實另一半，事過境遷，昔日的恩怨情仇，都應該正式落幕。

梁詠琪鬥幸福
當年被指硬撬伊健的梁詠琪，上周六（3日）大方祝福邵美琪之餘，亦不忘透露自己婚姻生活幸福。

我都好好

Gigi老公Serigro婚後主動向公司申請調來香港工作，早前兩人拖實去中環為愛巢添置家具日用品。

鄭伊健了心結
「蒙麵」拍拖一向低調，甚少於公眾場合拖手。上周六（3日）兩人十指緊扣離開伊健黃埔老家任記者拍照，之前婚訊只一直聞樓梯響，今趟應該真係好事近啦。

十指緊扣

聞「邵」想縮手兩人一聞邵美琪婚訊，伊健只笑未有回應，反而蒙嘉慧一度想甩開男友手，被伊健拖實唔放。

《天與地》離婚收場
現實生活中的邵美琪修成正果，不過無綫熱播中的《天與地》，邵美琪飾演的單純富家女翁卓桐就冇咁幸福喇！邵美琪發現老公陳豪再三對佢不忠，與朱慧敏偷情，陳豪訛稱是邵美琪家姐卓樺（金燕玲飾）為拆散二人而報下的局，一度成功挽回婚姻。不過邵美琪最後發現陳豪的最愛是阿Yan（佘詩曼），深感對方再次欺騙她，才心死離婚。

邵美琪在《天與地》中先踢爆老公陳豪與朱敏慧有姦情，再揭發陳豪最愛是佘詩曼，傷心欲絕。