我本身嘅性格係比較直接，人哋會知道我唔鍾意佢，或者我諗緊咩亦好易畀人睇出。
嘉穎認為己所不欲，勿施於人。
人哋覺得我成日黑面，其實影到我黑面嘅都係狗仔隊，見到佢哋真係笑唔出，可能我道行未夠。點解會同啲雜誌關係咁差，係累積番嚟嘅，我好有禮貌同佢哋做訪問，但出嚟嘅嘢同我所講嘅係完全唔同，佢哋其實已經諗好晒點寫，做訪問只係形式，係畀佢哋影幾張相，做啲假民主嘅現象，我訪問咗你喇、你講o架、畀假象讀者以為係我講，其實唔係我講，一次又一次咁樣做，我又點樣信你呢？
好似見到佢哋偷影又點樣對住佢哋笑呢，有好多報道傷害都好深，好似講老師嘅嘢、感情事、話我睇中邊個、之前話我故意踢演員啦，嗰陣係做緊戲呀，佢哋影咗啲做緊戲嘅相就話我故意踢演員，總之乜都有。
有底線 唔妥協
做人同做戲係兩回事，我係一個演員啫，我都有我嘅底線，好似每次見到嗰個人，埋親嚟都摑你兩巴，我又點笑得出呢？我梗係有防備心，有人會話你做得呢行就預咗，做演員就冇自尊o架咩？做演員就應該冇自己嘅立場咩？點解做演員就要預咗畀人砌、畀人屈呢？我唔明白呢個道理，亦唔會妥協。我會盡量令大家工作時氣氛融洽啲，但唔可以過我條底線，己所不欲、勿施於人。
對陌生人慢熱
事實上係蝕底嘅，依家都tune緊自己，其實我唔係咁cool，認識我嘅人唔會覺得我cool，冇錯對住啲陌生人係會慢熱啲，有時亦唔知講乜。以前講笑，人哋會以為我係認真，Law霸幫咗我好多，《怒火街頭》出街後，依家人哋會知道我講緊笑，原來電視劇可以幫埋你呢樣嘢，把你嘅真性格話畀觀眾知，哈哈，其實講笑唔一定要笑住講嘅，可以好認真咁講，依家大家終於知道我係講緊笑，哈哈……（完）
後記
鄭嘉穎以往的憂鬱小生形象令人覺得他cool爆，實情認識他的人也知其風趣一面，正如他說Law霸角色演回自己，讓觀眾也感應到他幽默一面。
專訪當日發生一段小插曲，有女粉絲要求與嘉穎合照，嘉穎講笑謂：「影相……要收錢o架喎，五百蚊張。」粉絲沒被嚇親，反被逗得笑逐顏開。現在鄭嘉穎講笑，大家都會笑了……
Orignal From: 鄭嘉穎：我道行唔夠
沒有留言:
發佈留言