黃智賢（Ben）、陳敏之是今年「最佳男、女配角」頂頭大熱門人馬，Ben表示「辣薑」一角十年難得一遇，自己亦向來對自己有信心，故把握十足。而敏之坦言這幾年經歷太多，那些感覺令她做戲可從心而發，她更坦言若攞獎會拿去愛錫、支持她的父親墓前送給他。
黃智賢與陳敏之分別以《潛行狙擊》「辣薑」及《怒火街頭》「索腿天后貞貞」一角，角逐「最佳男、女配角」獎項的呼聲甚高，二人有十足信心，更視此獎為囊中物。
黃智賢與陳敏之一早視獎項為囊中物。
「阿海」紮緊根基
黃智賢表示今次乃第一年提名男配角，他謂：「辣薑呢個變節臥底角色雖然場口唔多，但角色好搶，呢個角色十年都未必遇到，（會否覺嚟遲咗？）呢啲嘢可遇不可求，慶幸自己從沒放棄過！」至於有否度定得獎台詞？黃智賢說：「我會首先多謝珍姐（曾勵珍），係佢搵我做《真情》中嘅阿海，阿海呢個角色畀到黃智賢一個好好嘅根基，而添哥（李添勝）係用得我最多嘅監製，畀咗好多磨練我！其次係要多謝監製莊偉健及編審歐冠英，寫咗辣薑呢個角色畀我。」
陳敏之認為做演員要有團火，對自己冇信心就即係輸，所以她有十足的信心！
胡定欣感謝觀眾對她的肯定。
胡定欣驚喜有提名
至於陳敏之同樣對自己有信心，她表示：「索腿天后呢個角色好突出，一個長髮、短裙長腿造型，令到好多客戶搵我做嘢，都係要求呢個造型。」不過敏之亦覺得自己有不足的地方：「我覺得自己做戲、處理角色未夠成熟，做戲係要靠人生經驗，自己呢幾年都經歷咗好多，03年爸爸逝世、拍《怒火街頭》時跌斷鎖骨，上年患腎炎，呢啲都係我嘅經歷，幫到我做戲可以從心而發。」她表示若然奪得女配角獎項，會拿到爸爸墓前送給他。
此外，被視為「黑馬」的胡定欣憑《法證先鋒III》亦角逐女配角，面對強勁對手如敏之等，她坦言：「我同敏之差唔多時間入行，但獎就得一個，不過邊個攞我都開心，因為我都冇諗過有提名，今次都算係一種觀眾對我嘅肯定，所以我都有信心架！」
陳茵媺施誘陳豪有Feel
陳茵媺在《真相》中的戲分不重，仍憑該片入圍「最佳女配角」，她興奮的表示：「證明觀眾認同我可以做到唔同嘅角色，形象百變！」
陳茵媺對得獎的信心不大，只希望觀眾能夠接受她。
反而其男友陳豪就讚她可塑性高，陳豪說：「佢幾有天份，除咗本身努力之外，做戲最緊要畀到一份舒服嘅感覺人、而啲觀眾又接受，呢方面佢係做到，佢仲有好大嘅發展空間！」同時他又透露一直都有支持女友的劇集，對於女友於是次獲提名的電視劇中有誘惑橋段，他亦甚為受落的說：「撇除我哋嘅關係，佢真係做到角色需要，『誘惑』講係好易，但唔係有好多人真係做到個感覺！」
唐詩詠對手強唔望再下一城
今年憑《真相》首次入圍「最佳女配角」的唐詩詠，臨近頒獎禮心情愈來愈緊張，她說：「去年攞咗『飛躍進步女藝員』獎，今年角逐『最佳女配角』係好大進步，入圍已經係一個肯定，畀自己一個好大信心。」她自言雖然角色討好，但對手太強，不敢過於自信：「個個都係勁人，真係唔講得笑！」今次對手包括前輩江美儀、長腿美女陳敏之及同樣憑《真》片入圍的「豪嫂」陳茵媺，相信競爭激烈。
向來走乖女路線的唐詩詠已開始準備戰衣，她說：「我會打扮到最靚出席，亦會展示性感一面，希望畀觀眾驚喜，有幾性感就要賣吓關子！」
唐詩詠去年奪獎已心滿意足，今年入圍女配角獎則當Bonus。
其他女配角簡評
胡定欣半冷之選
陳茵媺有力一爭
滕麗名機會稍次
江美儀可爭欠穩
其餘男女配角候選名單
張國強《紫禁驚雷》 短評：多產綠葉，隨時跑出。
李璨琛《怒火街頭》 短評：斯文社工，成功轉型。
郭政鴻《潛行狙擊》 短評：機智狗頭，剛中帶柔。
江美儀《潛行狙擊》 短評：落難阿嫂，爐火純青。
敖嘉年《九江十二坊》 短評：繼續敗家，有機Encore。
羅樂林《點解阿Sir係阿Sir》 短評：溫情黑幫，擺脫「死」運。
滕麗名《怒火街頭》 短評：苦情師奶，演技考驗。
楊秀惠《仁心解碼》 短評：變醜扮肥，勇氣可嘉。
Orignal From: 黃智賢陳敏之自信搭夠 唐詩詠對手強唔望再下一城
沒有留言:
發佈留言