娛頭
男友的士舌戰搞女 苦命滕麗名 3遇情場騙子
2011年09月01日
專招惹賤男的滕麗名，去年搣甩奀星郭政鴻後，今年三月終於有着落，同四十出頭，睇落好似成熟穩重，於 Canon從事行銷工作的打工仔朱建崑（ Matthew）行埋。
以為圈外人唔似戲子無情，豈料滕麗名的新歡同是烏鴉，眼見無綫姐仔唔使落重本就追到手，於是背住個拍拖多年的女朋友，一腳踏兩船享齊人福。
上週二（八月二十三日），滕麗名男友陪正印 happy hour，於的士激嘴兼孖咇返回男方位於紅磡的住所過夜，週五（二十六日）就撥空陪滕麗名食飯、唱 K，於尖沙咀街頭十指緊扣，但過夜就無份。
懵盛盛做咗小三的滕麗名，本週一（二十九日）睇過男友同正印的激嘴照後，忍住一泡眼淚死頂：「無問題喎！」
一而再，再而三墮愛情陷阱，女人最痛，莫過於此。
29/8含淚回應
男友偷食斷正，滕麗名眼泛淚光，否認 Matthew是她的男友。
狼擒正印
滕麗名男友朱建崑，八月十二日晚八點，開着白色寶馬現身跑馬地。司機位旁的，不是滕麗名，而正是拍拖多年的正印女友。一腳踏兩船，又零警覺性的 Matthew將車停低在 Laughing哥謝天華的住所附近，同女友一齊落車，到附近便利店購物，之後折返挨住寶馬煲煙談心，兩人有講有笑，但未見有親密舉動。
上週二（二十三日）晚上七時， Matthew離開他位於紅磡的辦公室，搭的士過海，在中環鏞記落車，再行去附近的酒吧會正印。晚上九時， Matthew同 OL打扮的正印及一名中女，離開酒吧，轉到附近的橫巷「打邊爐」，烚完同行友人先行離開。
其時，四周圍的士垂手可截，但唔想嘥錢兜路的 Matthew，拖住正印行到落皇后大道中才截的士，到銅鑼灣的皇冠假日酒店頂樓，繼續把酒談心。 Matthew同正印有講不完的話題，兩人越講越興奮，同時亦越坐越埋，但 Matthew仍然把持得住，未見有不規矩的舉動。
晚上十一時，兩人盡興搭的士離開，上車唔夠三分鐘，滕麗名男友便猴擒到等唔切返屋企，與女友在車廂又攬又錫，短短二十分鐘的車程，舌戰時間一半有多，返抵租住的紅磡海濱南岸住所後， Matthew急急俾錢落車，同正印一齊返回住所過夜。
爛蒲爛玩的滕麗名男友，孖住正印蒲完中環，再轉場到銅鑼灣皇冠假日酒店繼續飲。
26/8偷食唔抹嘴的 Matthew，陪滕麗名唱 K後與友人道別，十指緊扣女友招遙過市。
滕麗名於停車場繳款期間， Matthew從後熊抱，終於似番一對熱戀中的男女。
23/8飲到面紅紅的滕麗名男友，上的士後便急不及待同正印舌戰激吻，歷時長達十分鐘。
招搖過市
兩日後，上週五（二十六日）踏正六時收工時間，滕麗名男友與同事離開公司，再跳上在樓下等候多時的友人車，同到尖沙咀諾士佛台 happy hour。 Hea到晚上八時， Matthew同光頭同事孖咇離開，轉場到寶勒巷 Neway卡拉 OK，會合早與在內的滕麗名。翌日 Matthew放假，滕麗名亦無通告，但凌晨十二時半， K局結束，二人拖住行去金巴利道攞車，週末晚上，一街都是行人，但腳踏兩船的 Matthew冇有怕，全程同滕麗名拖到實。
對住正印， Matthew搭的士飲嘢全部負責俾錢，但對住滕麗名，不單只冇揸車接送，就連女友到停車場俾錢攞車， Matthew都只是袖手旁觀。難得滕麗名完全被蒙在鼓裡，為免男友住所曝光，更刻意在「海濱南岸」附近兜多兩個圈，確定沒有成為跟蹤目標，才放心放低男友，至於過夜，滕麗名當然無份。
情路坎坷
滕麗名的黃金青春期全部斷送給魏駿傑，拍拖九年，對方偷食斷正分手。
35歲的滕麗名， 19歲參加新秀入行，接拍《真情》為人熟悉，後來亦有份參演《難兄難弟》、《陀槍師姐》、《尋秦記》等劇集，但入行多年，滕麗名一直徘徊二線位置，事業未見突破。情路亦同樣坎坷，與拍拖 9年的魏駿傑，因男方偷食而分手，後再搭上郭政鴻，但原來對方早有家室，滕麗名無辜做了第三者。
魏駿傑
滕麗名與魏駿傑於 98年拍攝《陀槍師姐》撻着，拍拖 9年至談婚論嫁階段。 06年，魏駿傑到重慶拍劇，瞞住女友搭上女學生張利華， 07年 5月，二人對外公布分手，不足半年，魏駿傑便與新款閃電結婚。
郭政鴻隱瞞自己有家室，力追滕麗名搏上位，令女方無辜變成第三者，斷送清譽。
郭政鴻
07年，滕麗名接拍《野蠻奶奶大戰戈師奶》與郭政鴻戲假情真，二人被拍得車廂熱吻、行街拍拖，經常出雙入對，發展穩定。至 09年，有傳媒踢爆郭政鴻一腳踏兩船，更秘密與一名內地女子誕下女兒，不甘做第三者的滕麗名，唯有退出。
強忍淚水
於微博中指自己「幸福着」的滕麗名，自上週五唱 K後未再有同熱戀中的 Matthew Chu會見，本週一（二十九日），滕麗名為《怒食街頭》開工，收工後，她孤伶伶於中環、銅鑼灣一帶遊街。晚上十時，修完手甲離開的滕麗名接受本刊記者訪問，初次面對男友腳踏兩船的事實。
壹：上星期影到你同男友拖手，好 sweet喎！
滕：（甜笑）啲相幾靚呀。
壹：拍咗幾耐拖，會唔會公開？
滕：（冧爆）唔會啦！
壹：見過家長未？
滕：（嬌嗲）唔講啦，呢啲私人嘢！
壹：你知唔知你男朋友本身有個女朋友㗎！
滕：（瞄到 Matthew同正印合照）係咩?!同事啫，朋友啫！
壹：你男友同個女人喺車上激嘴，仲返屋企過夜。
滕：（細閱照片，面色一沉，眼泛淚光） OK吖。
壹：你知唔知自己做咗第三者？
滕：無問題呀！無問題呀！
壹：你男朋友同第二個，仲返屋企過夜都無問題？
滕：（沉默 10秒，聲音抖震）無問題喎！
壹：你可以容許你男朋友偷食？
滕：我從來無講過佢係男朋友！
壹：會唔會同 Matthew劃清界線？
滕：（嬲爆）咩劃清界線呀！普通朋友，劃清咩界線呢？
死口唔認拍拖的滕麗名，早前在微博指自己「幸福著」，間接承認正在蜜運中。
Matthew Chu同正印揸車到跑馬地附近幫襯便利店，再於路邊煲煙談心。
24/8男友偷食翌日，沐浴愛河的滕麗名同林子善（黃衫）、張美妮等人為《怒食街頭》於尖東開工，全程笑容滿面。
偷食男
十個男人，九個偷食，有女友有老婆都好，下身指揮大腦，累己累人。
練海棠
與伍詠薇結婚多年，去年被踢爆趁住伍詠薇外遊，同一名年輕女子到中環撐枱腳，練海棠更公然摸對方手仔，飯後又用七人車接載對方。
梁榮忠
05年，梁榮忠背住女友鍾麗淇，與朱慧敏到小西灣玩「車震」，事發後，梁榮忠形象插水，被指「賤男」，鍾麗淇亦搬離愛巢，跟他一刀兩斷。
倪震
08年底，倪震被拍得背住女友周慧敏到蘭桂坊夜店尋歡，偷啜 22歲城大女生張茆，事後獲周慧敏原諒，更戲劇性地結婚。
朱培慶
前廣播處處長朱培慶 07年到銅鑼灣夜店 Must Kawa夜蒲，離開時，被拍得拖住北姑 CoCo，朱培慶慌張到躲在北姑背後，醜態百出。
爛蒲偽君子
自去年八月同奀星郭政鴻斬纜後，不論無綫中人，抑或滕麗名的朋友，都積極為她安排飯局，再覓第二春。多次受創，步步為營的滕麗名，直到在朋友的飯局上，認識於 Canon從事行銷工作的朱建崑 Matthew，才開始動心。平日多以西裝示人的 Matthew，外表斯文，談吐又有幽默感，同滕麗名好啱嘴形，即使只是打工仔，滕麗名都未有放在心上。拍拖個多月，開始被傳媒影到，但對住公司同事， Matthew仍死口唔認，只說：「我同佢（滕麗名）只係朋友！」
有部分公司同事，早知道 Matthew有個拍拖多年的女朋友，但對於他搭上滕麗名亦不感驚訝。「 Matthew個西裝見客 look真係呃得吓人㗎，以為佢好成熟穩重，實情佢爛蒲爛玩，中環出名嘅蒲場幾乎個個都識佢，一個禮拜蒲成三、四晚㗎！佢不時都會背住女朋友食散餐，只係冇諗過佢咁高招，連無綫姐仔都得手啫！」 Matthew的同事透露。
滕麗名拍拖講心唔講金，花費無幾，有姐仔做女朋友， Matthew自然唔會放過，難為滕麗名懵盛盛以為執到筍盤，仲要保住戀情唔認拍拖，女友變第三者，滕麗名好苦命。
蜜運中的滕麗名，早前成為豐胸代言人，以為事業愛情皆得意，原來只係假象。
上月尾 Matthew於開工期間，抽空陪滕麗名到尖沙咀 shopping。
今年五月，滕麗名同 Matthew遊泰國返港，在機場公然攬到實，當時女方笑容甜到漏，幸福滿瀉。
懵上心口
郭羨妮
好勝同愛情，都會令人失去理性。為求得到心中所想，不擇手段破壞他人幸福的，「狐狸精」當之無愧，例如郭羨妮！不過，圈中亦有唔少無知天真純女，以為自己搵到真愛，殊不知另一半早有正印，懵上心口！代表人物，鍾嘉欣。
郭羨妮
06年，郭羨妮與陶大宇拍攝《學警出更 2》撻着，當時，陶大宇的妻子阿寶公開向傳媒力斥：「郭羨妮係第三者！」一年後，二人正式離婚，郭羨妮被指「狐妮」，形象直插谷底。 08年，陶大宇浪子回頭，與郭羨妮斬纜，女方去年搭上內地武指朱少杰，並已訂婚。
鍾嘉欣
今年 6月，鍾嘉欣被踢爆與舊同學李傲富秘密行埋，但後來發現男友原來一腳踏兩船，瞞住鍾嘉欣，背後有個拍拖多年的大律師女友 Joyce，鍾嘉欣在不知情下做了第三者。
Orignal From: 男友的士舌戰搞女 苦命滕麗名3遇情場騙子
沒有留言:
發佈留言