黃宗澤翻生　謝天華恨鬥張家輝

2011年09月15日

掀起追劇潮的《潛行狙擊》上週五晚連續兩小時播放大結局，平均收視 35點，最高 40點，打低同是由謝天華主演，平均收視 30.5點的《魚躍在花見》， Laughing Sir威到盡。

Laughing系列收得，無綫照辦煮碗，繼 09去年的《 Laughing Gor之變節》，再拍電影版，同一板斧，搵有分量演員撐場，包括張家輝、劉青雲等影帝級人馬！

謝天華九月尾會拍 Laughing電影版，今次同樣會有大堆頭重量級人馬加入。

入獄做臥底

早在上月，無綫已開始為《 Laughing 2》電影版埋班，新片沿用 Laughing系列編審歐冠英負責編劇，邱禮濤執導，梁家樹及曾志偉做監製。

○九年《變節》有黃秋生、吳鎮宇、黎耀祥、黃日華及曾志偉等人傍住 Laughing，電影收千五萬，今次曾志偉繼續碌人情卡，出面斟洽有分量的演員埋班。

《潛行》尾段 Laughing坐監一幕，曾有一位身形瘦削的監犯出現，這將會是電影版的序幕， Laughing是警方安排入監查案的臥底，與這個「神秘監躉」將有連番惡鬥。

有指無綫屬意由七料影帝張家輝演出該「重犯」，記者求證電影監製梁家樹，他說：「我哋的確有聯絡過張家輝，但佢撞咗期，未必就得到。」另有傳劉青雲亦是考慮之列，但梁家樹不願正面回應，只稱有很多好戲之人正在聯絡中，暫時仍未落實。

在新片《大追捕》扮「重犯」，張家輝戒飯半年兼狂操，若他接拍《 Laughing 2》，便可「連戲」繼續做犯。

剛憑《奪命金》出戰威尼斯，劉青雲也是監製梁家樹力邀演出的熱門人物之選。

好難度期

除了謝天華，在《潛行》做上位古惑仔跛 Co的黃宗澤，雖已死在 Laughing槍下，但他奸到出汁的演技大受外界好評，已獲安排在電影版以另一個身份「復活」。至於陳法拉，因為要趕拍無綫新劇《東西宮略》未能演出，而另一女主角徐子珊，亦將會客串一角。

新片要趕在聖誕檔期上映，導演邱禮濤表示會盡快開工，但演員的檔期十分難就，令他非常頭痛。「唔好以為 TVB嘅戲，就一定好易搵番佢哋啲演員，除咗天華之外，其他人都拍緊劇，好似 Bosco咁，個期好難度。」雖然監製及導演都不願公開新片另一男主角誰屬，但月前謝天華曾公開講九月尾會同張家輝拍戲，又開晒口好恨同對方合作， Laughing對七料影帝流晒口水，不過，就期之外，價錢都係關鍵。