歷屆港姐大多不是出身富裕，就是來自小康之家，對於衣食住行從沒擔心！不過港姐冠軍朱晨麗（Rebecca）卻是例外，因這位蘇州姑娘16歲被香港演藝學院選中來港修讀芭蕾舞，在並無任何親人依靠下初到貴境，語言就是她首要面對的障礙！
初初嚟香港，廣東話唔識聽唔識講！最記得有一次去街市，我想同個阿嬸講：「可唔可以畀個膠袋」，就係「膠袋」呢兩個字佢聽唔明，跟住阿嬸好惡同我講：「你講乜呀？」嗰一次之後就推動我要努力學好廣東話，不斷咁睇劇集！其實我都要多謝阿嬸，如果唔係佢，我可能依家都仲講緊普通話！而當時就係睇《衝上雲霄》學廣東話嘅同時，依家就有份參演《衝上雲霄2》，仲可以見番裏面啲人，你話幾正呢？可能真係命中注定！
朱晨麗現時的心願是努力搵錢，買樓並接屋企人一起居住。
當選港姐冠軍後，是朱晨麗的人生轉捩點。
朱晨麗選港姐時穿比堅尼大晒身材，她自爆原來參選前母親曾反對她以泳裝示人。
朱晨麗在最窮的日子也能咬緊牙關闖下去。
食飯搭車 無一不慳
在街市阿嬸的無心插柳下，Rebecca現時已經能操流利廣東話！還記得上年港姐競選中，她憑一句「窮得有志氣」而贏得全場掌聲，但原來說此話的同時，她卻是百般滋味在心頭。
食正餐正價，食下午茶就半價，所以我會食下午茶唔食晚餐，不過最慘都係唔捨得畀錢搭車返學，因為我嗰陣住港島，真係試過由屋企行去演藝學院，起碼要花半個鐘！如果唔行路，有巴士同叮叮（電車）選擇，我都一定會揀叮叮，搭的士完全唔會諗。平時我會拎本簿寫住每日用咗幾多錢，到咗一個月之後，我就會睇到啲錢剩番冇幾多，從而知道自己要食少啲。呢段時刻係我一個艱難嘅經歷，幸好都捱過咗！
來港學舞 甘於平淡
Rebecca當時度過的可以說是「沒有最窮、只有更窮」的經歷，你或者會問：「一個內地女仔無人無物、千里迢迢嚟香港為乜？」而直覺會引領你回答：「梗係泊個好碼頭然後做少奶奶啦！」不過對Rebecca來說，學芭蕾舞才是她來港的真正目的。
當時被揀嚟香港讀書，我覺得芭蕾舞係外國文化，而香港呢個地方對我嚟講都算係外國，所以覺得嚟香港之後可以吸收更多跳芭蕾舞嘅精髓！讀完四年演藝學院之後，我就入咗香港芭蕾舞團做芭蕾舞演員，嗰陣真係冇擔心過生計，因為當你做緊一樣鍾意嘅事就唔會計較咁多！我覺得只要啲錢夠平時用，生活係唔使太鋪張。
就算生活多苦，Rebecca都可以把它品嘗為一種甜味，因跳芭蕾舞是她的理想和收入來源！可是隨住密集的練習和表演，跳舞對於Rebecca的身心都造成了不少負面影響，在無可奈何下，「芭蕾夢」只好中斷！
有段時間比較失落，記得割完盲腸、好咗冇幾耐，就遇到腳筋受傷同撕裂，而且周身都傷。我突然覺得接觸芭蕾舞十幾年，應該都足夠啦。一位舞蹈員上到台，就算你對腳流緊血、拗柴甚至斷骨，你都要完成你嘅舞蹈，因為你要對得住買飛入嚟睇你表演嘅觀眾！一諗到咁就覺得日子好艱難，所以我都下定決心去quit咗呢份工去搵其他想做嘅事！
腳筋受傷 另謀高就
雖然Rebecca放棄成為一名芭蕾舞演員，不過在她鬆脫跳舞鞋的同時，亦放下心中的枷鎖，其後更膽粗粗參選港姐，幸好「皇天不負有心人」，最終她亦贏得冠軍寶座，更可延續演藝之路！
參選港姐係冇人逼我，我知道隨住自己年紀愈來愈大，我更加要趁後生去做我想做嘅嘢，所以我搵咗朋友做我提名人，而參選時亦冇同屋企人商量過！直到參選前我打電話同媽咪講，開頭佢都好欣然接受，後來我同佢講參選要着泳衣，跟住佢好驚訝講：「可唔可以退選o架？唔好啦，你着泳衣，喺台上個個都見到！」後來我疏導佢情緒後，最終都接受到，仲好支持我去參選！講真，人生有幾多個十年，所以好多嘢都需要嘗試，遲啲望返轉頭先知道你嘅人生係冇浪費。
好一句「人生有幾多個十年」就把Rebecca人生從此改寫，雖然理想與當初不一樣，不過她愛錫家人卻從沒變過。Rebecca從小就跟家人分隔二地，所以她認為當務之急就是努力賺錢，期待一家團聚的一天。
一直以來都好少同家人見面，我十歲去上海讀書，去上海嘅五年期間，媽咪曾經試過因為我燒到四十度嚟上海探過我一次，不過回程嘅途中媽咪仲慘過我，因為佢身體唔好，搞到我要照顧番佢轉頭！雖然都習慣咗唔可以同家人見面，不過我都好掛住佢哋，希望遲啲生活穩定少少、賺多啲錢就去買樓，咁就可以接佢哋一齊住！
做女強人自己搵錢
訪問期間，筆者告訴Rebecca她令我想到讀大學時的室友，因她同樣也是從內地來港讀書，惟她比本地的學生更有毅力，而Rebecca亦大有感受：「當你去到異地，你一定要投入當地，仲要識得點去生存！如果你照顧唔到自己，冇人可以幫到你！呢個世代有好多女強人，佢哋識得賺錢去照顧自己，而我都希望自己係咁！」
文、攝：文珊
場地、服裝：IPOSH
髮型：Sidney Lau＠HAiR
化妝：Kenneth Milk
Orignal From: 朱晨麗人窮有志 舞出銀色路
沒有留言:
發佈留言