跛 Co的破格，不讓 Laughing專美，黃宗澤甩掉靚仔糖衣做得狠，全劇攬子珊狼咀，直情餓獅求歡，咬你食你摧毀你；家中睇戲的真命天子胡杏兒冇「嘰趷」，因為在娛樂圈行走江湖講個信字，況且男友識做，有「保護二人組」守實伊甸園，莫講宅男女神徐子珊，就連秒殺小生的國產大眼尖面爆乳女， Co哥一句了斷：「我唔鍾意呢類型。」真定假先？但最緊要杏兒啱聽。
撰文：朱倬誼
無綫人氣劇《潛行狙擊》下周進入高潮位，由警隊 CIB轉做社團卧底的 Laughing謝天華，會與黑幫大佬跛 Co黃宗澤鬥智鬥力。其實跛 Co一角對 Bosco而言很新鮮、很有血肉，跛 Co因家道中落而走上黑幫之路，他被大佬打斷腳，此後受盡欺凌，被打被玩被罰舔鞋底，遭遇賤過地底泥。跛 Co一直深愛徐子珊飾演的律師 Paris，他壞事做盡只為供子珊去外國讀書，豈料最後被子珊出賣，所以跛 Co對她又愛又恨，每次見她都激吻連場如餓虎撲兔，睇到網友咿嘩鬼叫。
Bosco在《潛行狙擊》中扮社團大佬跛 Co出晒位，講 chok都唔輸畀 Laughing，有甫你睇。
攝影：陳順禎
服裝： initial
場地：潮人飯堂（東港城）
跛 Co舔威利哥鞋底一幕勁受委屈，但其實鞋底黐有膠片隔塵。
Bosco於《潛行狙擊》中擒徐子珊狂咀，兇狠肉搏如雄獅求歡。 電視圖片
子珊污糟嚇親人
夠台型的 Bosco近年歌影視三線發展，有傳無綫欲加長合約綁他 10年。
Bosco和子珊的激情戲成為網民熱話，多得監製莊偉健帶挈， Bosco說：「未開工前莊生已經話益我，有好多咀戲，佢專登嘅，佢想我同徐子珊嘅關係，同 Laughing、 Madam Jo（陳法拉）嘅完全相反，我係用摧殘方法，越愛佢就越憎佢，我睇完劇本同莊生講，你唔介意我用獅子公搞獅子乸交配嘅時候，咬佢、扯佢隻後腳喺度撕呀咁，因為跛 Co做蠱惑仔供佢讀書，先搞到自己嘅人生好大缺憾，好愛佢但又好憎佢，係非一般錫佢。」
狼胎到咁， Bosco事前當然要跟子珊溝通，他憶述：「我哋第一日開工就咀，我話徐子珊你有定心理準備，我頭十集八集都係獅子公咬獅子乸，扯頭髮、咬膊頭、咬頸、咬嘴唇乜都齊，佢望住我，『我唔驚你咁對我，我驚你有鬚咋。』原來佢最憎男人兩樣嘢都喺晒跛 Co身上，就係食煙同有鬚。」
兩人愛得激，但 Bosco誓言冇真火，「我當佢男人。」子珊假假哋都係網民女神， Bosco一味笑：「你唔好見佢平日見觀眾個樣，佢返工個樣呀，係咪仔嚟㗎？我仲靚過佢！我出門口都襯吓吖，佢着條爛鬼牛仔褲踢對人字拖，求其笠件 T恤。佢開外景揸車嚟，見到佢架車我就，亂七八糟，電線周圍插、衫周圍劈，都唔係女仔車，我整齊過佢百倍。我覺得佢係『厘啡』，我望到佢架車已經幻想到佢屋企係點。」你唔愛佢又點拍？「同佢係熟，但冇話愛，如果套套戲都話愛一愛咪好唔得閒？」
跛 Co的愛情戲是賣點，另一條線惡鬥 Laughing也非常絕。跛 Co初期是 Laughing線人，後來他做大佬威利（梁健平飾）條針跣同門辣薑（黃智賢飾），實情他幫辣薑反威利，換言之他是三重二五身份，觀眾都緊張跛 Co真身，到底是否卧底探員？
求認同唔恨攞獎
Bosco被黎耀祥大讚是視帝黑馬，反而他對攞獎睇淡。
Bosco就爆響口《潛行》已準備兩個結局：「跛 Co係卧中卧中卧，結局係點大家追啦，今次要讚導演手法，有啲鏡頭拍咗，如果加落去係一個 ending，冇擺落去又係另一個 ending，但我同 Laughing到家都冇睇過 final version。」
黎耀祥都有追《潛行》，他大讚 Bosco演得好，是今年視帝黑馬， Bosco卻說：「多謝祥仔睇得起我，我唔係話自己清高唔自在，但我睇得好淡，對獎項冇乜大感覺，如果你畀我揀，攞到獎梗開心，但有人認同我嘅戲，仲開心過攞獎。」他在無綫劇接劇未停過，但這位影壇新貴也大受片商注意，有傳無綫欲加長合約，綁他 10年防走佬。
「冇人提過加合約」
Bosco則說：「拍電影梗係開心啦，我拍劇大大話話都 8年，轉新環境有新刺激，電影模式對我嚟講係新手，家都習慣緊。但外傳嘅簽 10年合約，係從未出現過，都冇人同我提過加合約。我仲尷尬呀，成日咁傳我，樂小姐（高層樂易玲）打畀我，問我啲風喺邊度傳出嚟㗎？我都未同你傾就有人同你傾？我話唔知呀，唔關我事，誤會啫。我同 TVB仲有好多年約，公司都唔會咁心急要我續啦。」
唔吼巨乳 獨愛杏兒
黃宗澤在《潛行狙擊》中對徐子珊如狼似虎，任由他這隻雄獅更擒青都好，世上總是一物治一物。馴獅記的女主角叫胡杏兒，她對 Bosco收放自如，令 Bosco不得不俯首稱臣。
「結婚一定會講」
Bosco曲線自讚桄榔樹一條心，只愛胡杏兒一個。 資料圖片
Bosco和徐子珊在《潛行》中啜到嘴歪，他卻聲言毋須向杏兒報案：「拍戲我係乜都唔理，唔好煩我，千祈唔好『拮』我㖭呀，咁佢拍戲，佢都一樣有自由，我唔會問。」他和杏兒拍拖多年，只差一點點行多步公告天下，他笑說：「要保持神秘感呀。」但全世界都知，那來神秘感？他死撐：「係爭嗰少少就少少，我覺得家咁樣幾好呀。」
其實是 Bosco不願給杏兒女友名份，還是杏兒不願給他男友名份？他大笑：「哈哈，我冇講嘢呀！我已經好習慣呢個方式，自然，又唔使特登，你哋見到咪見到囉，又唔使自己刻意舉手講嘅，但有日我結婚嘅話，就一定會講。」但他直言至今未有結婚打算。
Bosco和杏兒在 05年拍攝《我的野蠻奶奶》時撻着，眨眼 6年，男大當婚女大當嫁，諗結婚好平常，他聞言又是笑不停：「乜你計住晒幾多年㗎大佬？我覺得未到想結婚嘅時候，始終有啲嘢我未做到，譬如有啲電影我好想拍，自己仲要為未來努力，又譬如會諗做生意，我啱啱先打本畀媽咪喺灣仔開眼鏡舖，等佢有啲細藝，當儲錢又好乜都好啦。坦白講，我廿幾歲時有諗過 30歲結婚，到咗 30歲真係冇諗過，你問我家 40歲會唔會結婚，我真係唔知，順其自然啦。」
Bosco與杏兒在同一個圈工作，電視台的是非傳得快如閃電，若非互相信任，感情就很易被唱散， Bosco也認同互相信任很重要：「呢樣我哋 OK嘅，到呢個年齡我越嚟越開始做番自己，以前反而避忌，家咁諗係唔關自己有冇女朋友事；另一個原因係啲人對我認識多咗，知我為人點，住同區咪車埋你囉，人哋仲問我怕唔怕？怕乜啫？兜埋之嘛。咁當然都會揀人上車啦，當係朋友先會咁，亂咁嚟咩。」
二人特攻擋緋聞
現在的國產美女真巴閉，上位手法包羅萬有，一黐埋嚟就緋聞纏身，經常往返內地開工的 Bosco卻向杏兒大派定心丸，「我有保護二人組，我請嘅助手（陳小琳），最兇狠係佢，點知最堅嘅助手同我傳緋聞，笑到我哋嘔電；另一個係司機，昂藏六呎大大隻乜都擋晒，我有晒配套㗎啦。」點擋啫？個個國產美女都尖面大眼又大胸，樣靚身材正， Bosco答得更狠：「我唔鍾意呢類型。」
講就易，看幾多 TVB小生中招， Bosco卻說：「咁情到濃時，拍吓拖，我哋唔係聖人，正經咪得囉，男仔識女仔好正常，大家用啲字眼搞到好大件事啫。」
Orignal From: 有話兒：黃宗澤愛恨獸慾
沒有留言:
發佈留言