大封面
下月加國提親 爆王祖藍閃娶李亞男
2011年08月26日
近期圈中戀事多磨，金童玉女謝霆鋒與張栢芝終於宣布離婚，大隻仔羅仲謙又負上打女友傅穎及不忠罪名，爛塊面分手收場。表面上匹配的，統統係假象。
被指是「長短腳之戀」的王祖藍與李亞男（ Leanne），自去年公開戀情後，人前人後愛得堅定，雖然身高差 6吋，仲因為大家係基督徒要禁慾，但無阻真愛發展。
外界對呢段情雖然唔多睇好，李亞男母親最初亦叫李亞男睇定啲。
不過本刊收到最新消息，王祖藍終於冧掂李亞男同佢閃婚，仲打算下月齊飛加國，向腌尖岳母提親。
記者向李亞男求證，佢大方承認：「冇樓我都嫁佢！」
「長短腳之戀」隨着下月王祖藍去溫哥華拜見未來岳母，好快有定局。日前兩人分別回應好事近，都表露出幸福之情。
去年 11月王祖藍被踢爆與李亞男拍拖，戀情轟動一時，二人即時大方公開戀情。這段「長短腳之戀」一直不被看好，以王祖藍 5呎 3吋的五短身形，加上貌似黃光亮，竟溝掂 5呎 9吋高的華裔小姐冠軍李亞男，絕對是娛樂圈一時佳話。難怪王祖藍公開戀情時說：「我等咗佢三年，所以希望大家祝福我哋呢段感情。」
王祖藍與李亞男感情穩定，拍拖不久兩人已視對方為結婚對象，月前他們已達成共識， 9月遠赴加拿大溫哥華，向李亞男父母提親。知情人士說：「 Leanne（李亞男洋名）拍拖前掙扎咗好耐，接受祖藍因為佢真係好有誠意。一齊後發現真係好夾，而且大家目標都係結婚唔係拍散拖，加上 Leanne唔似一般港女咁物質主義，所以同祖藍拍咗年幾兩年拖已經有傾過結婚嘅事。咁啱 9月佢兩個要去美國做佈道會，祖藍就決定去埋加拿大見 Leanne父母，傾吓結婚嘅事。」
勇闖腌尖岳母關
早年李亞男不時返溫哥華探親，仲同媽咪去到邊食到邊。李媽媽（左）向來家教甚嚴，個樣睇落亦好權威，恐怕祖藍今次提親要做足準備至得。
賺夠放假
王祖藍剛完成個人 talk騷。周一（ 22日），他出席新戲《勁抽福祿壽》慶功宴。已經完成手頭上工作嘅祖藍應該諗好晒提親對白！
李母反對交往
貞潔情侶戒
拍拖兩年，王祖藍除先後送過自製小禮物同一粒天上嘅星星俾女友外，仲送過呢隻刻有「 Love+Purity（愛與純潔）」嘅情侶戒指俾李亞男做定情信物。
李亞男父母比較傳統，一直希望女兒嫁個條件好的男人，最好是醫生或律師的專業人士，所以最初對王祖藍並不接受。難怪李亞男公開戀情後曾說：「同祖藍拍拖半年，我先話俾父母知，佢哋都幾驚訝。媽咪叫我睇定啲，唔好太快肯定，同埋暫時唔好諗結婚。」今年初，王祖藍就自爆與未來岳母傾過電話：「 Auntie打電話俾我，話我仲未過關，要我對佢個女再好啲。」
據知今次王祖藍將與女友在溫哥華逗留一星期，由於李亞男早已答應婚事，故王祖藍提親一事勝數應該很高。知情者透露：「祖藍係第一次正式見未來岳母，不過佢好有信心。之前連 Leanne都感動到，今次佢會用足 7日去感動 Leanne父母，加上祖藍把口同誠意，佢一定掂嘅。我哋成班朋友都等緊飲佢嗰餐。」
周日（ 21日）剛在伊館完成《咪咁扮嘢王祖藍演嘢會》三場 talk騷的王祖藍，完騷後接受訪問時亦露口風：「我都好想結婚，野獸已經準備好，要睇美女嘅意思喇！不過首先要見家長先！希望盡快完成手頭上嘅工作，下個月正式拜會美女娘親。」周一（ 22日），本刊記者問王祖藍是否去加國提親，他說：「我係向無綫請咗大假，其他嘢就唔講喇！」
李亞男 Blog爆父母要求高
李亞男不時喺無綫的官方網誌內大晒親情，除公開溫哥華嘅生活照外，更曾自爆父母對她期望甚高，令她受壓。
李母、李父
李父
慈母下廚
15歲胞妹
三母女遊溫哥華
預支蜜月行程
王祖藍與李亞男向無綫請咗成個月假， 8月 31日起程展開美加之旅。佢哋會先飛去三藩市同洛杉磯參加佈道會。逗留個多星期，跟住去溫哥華向女方父母提親。最後一站先係戲肉，佢哋會去紐約過二人世界，預支蜜月之餘，仲會去欣賞百老匯音樂劇。
31/8-7/9
三藩市及洛杉磯參加佈道會
10/9-17/9
返李亞男溫哥華娘家
18/9-25/9
紐約自由行
李亞男：冇樓都嫁佢
藍妹封嘴
周三（ 24日）王祖藍細妹從外返家時，記者問有關祖藍結婚事，她即以新買魚缸遮面說：「我唔知㗎，你哋都係問番我阿哥啦！」
本周二（ 23日）李亞男出席公開活動時，直認會帶祖藍見父母。「依家我仲拍緊劇， 31號就走喇，好緊張！（今次會帶祖藍見屋企人？）係呀，媽咪曾經喺教會見過佢，不過嗰時我哋未拍拖，所以唔係嗰回事。今次我哋做完佈道會，就會過加拿大見佢哋！（祖藍會買乜嘢俾 auntie？）我唔知呀！生果啩？其實帶個人去已經好夠啦！」記者問到今次見面會否提親？李亞男甜笑：「會啩！我唔知呀！都係食餐飯啦！（打算幾時結婚？）其實大家一開始已視結婚為目標，都有傾過，總之唔會拖好耐啦！（係咪要祖藍有樓有事業先嫁？）咁又唔使！冇樓都嫁佢！」
藍男配
戇佬提親
已 31歲嘅王祖藍，追到美女李亞男後，再向難度挑戰，拍拖兩年多即向岳母提親，希望你一擊即中啦！
王祖藍
原名：王浩然
出生日期：80年 1月 9日（ 31歲）
身高： 5呎 3吋
家庭狀況：與母親及胞妹同住，父親早年腸癌病逝，另有一已婚胞弟。
學歷：香港演藝學院一級榮譽藝術學士
入行經過： 03年加入無綫為收費電視兒童台主持節目及為報幕配音， 04年被調派到主持翡翠台兒童節目《 DaDaDeDe精靈樂園》。 06年終被調到戲劇組，憑為郭晉安於劇集《東方之珠》凌風一角作幕後代唱，開始上位。現為無綫經理人合約藝員及英皇 Music Plus合約歌手。
獎項： 08年無綫飛躍進步男藝員
高䠷新娘
5呎 9吋高的李亞男穿上婚紗明艷照人，相信祖藍都好想見到真正嘅一刻。
李亞男
出生日期： 84年 11月 25日（ 27歲）
家庭狀況：父母及年幼 12年的胞妹居於溫哥華
身高： 5呎 9吋
學歷：畢業於英屬哥倫比亞大學（ UBC）
入行經過： 04年參選溫哥華華裔小姐競選奪魁，隨後參選 05年國際華裔小姐競選奪冠，現為無綫經理人合約藝員。
吸金扮嘢王
電影《勁抽福祿壽》劇照
王祖藍上位後獲曾志偉和汪明荃賞識，主持《獎門人》及《荃加福祿壽》都爆紅，今年更有大量演出機會，如電影《我愛 HK開心萬歲》和《勁抽福祿壽》、無綫劇集《你們我們他們》和《荃加福祿壽探案》。早前更參演兩場《荃加福祿壽》演唱會，以及剛完成的個人 talk騷，保守估計 2011年上半年已穩賺近二百萬。
好友齊祝福
呢段「長短腳之戀」修成正果，相信好多人都大跌眼鏡，不過亦有唔少圈內人送上祝福。
鄭嘉穎
「好呀！佢哋兩個都係基督徒，都好難搵個矮過佢(王祖藍)啦，搵到個咁嘅女友，俾我都要啦！」
商天娥
「到佢哋結婚嗰時咪會恭喜佢囉，你哋好難套我料喎！」
蔡少芬
「吓？我未收到風喎！呢排湊女好忙，佢未同我講，所以未敢回應，不過點都會祝福佢哋！」
細心有承擔
王祖藍與李亞男相識六年多， 09年才正式拍拖，兩年多來二人愛得甜蜜，其貌不揚的王祖藍，原來是個浪漫情人。「好多年前佢曾經對我表白過，但我冇應承。嗰 3年佢無條件等待，令我好感動。我好有信心，佢個心唔會去咗第二個度。 09年聖誕節佢竟然送咗粒用我個名命名嘅星星俾我，叫 The Star of Leanne，我真係好開心！」李亞男早前公開大讚男友。
王祖藍雖屬五短人（身短、雙手短、雙腳短），卻能擔起照顧屋企的重任。 02年王父因癌去世，王祖藍便揹起頭家，除照顧王母外，妹妹的學費亦由他一力承擔。去年搵到人生第一個 100萬的王祖藍，更在尖沙嘴開設糖水店，一嘗做老闆滋味，此舉令李亞男更覺男友有安全感。據知有心與李亞男組織家庭的王祖藍，心知未能負擔得起買價錢飆升的私人樓，加上女友對住屋不是太大要求，故近半年開始，他多留意居屋行情，有意向居屋入手。
拖手斷正
去年 11月，王祖藍與李亞男在沙田拖手仔斷正，雖然女方高男方成個頭，不過畫面一樣咁 sweet。《壹週刊》圖片
揸 12萬韓國車
近年搵錢能力勁高的王祖藍，唔係揸 Benz同寶馬，出入只以韓國牌子 Kia細車仔代步。
公開拍拖
被踢爆戀情翌日，王祖藍與李亞男即大方回應兼合照，仲為以後拍拖唔使偷偷摸摸而高興。
月租 1萬西貢村屋
王祖藍現時與家人同住西貢村屋，雖然李亞男話冇樓都嫁佢，不過王祖藍已計劃置業，希望買定屋娶老婆。
情侶檔表演
二人的戀情得到各方祝福，以及無綫的支持。早前更情侶檔演出，為《咪咁扮嘢王祖藍演嘢會》表演「巴黎鐵塔反轉再反轉」。
拍拖禁慾兩年
李亞男 05年奪華姐冠軍後選擇留港發展，在港無親無故更覺空虛。與王祖藍拍拖後，她閒時都會到男友家作客，李亞男曾透露與未來奶奶感情不錯，「我同祖藍媽咪關係好 friend，有時佢煮咗飯，都會叫我上去一齊食。」據知李亞男又會教祖藍妹妹做功課，雙方早已一家親。
由於二人同屬基督徒，故一直堅拒發生婚前性行為，但忍足兩年幾， 31歲的王祖藍又點會唔想早日攞正牌過夫妻生活。王祖藍揚言有時會把持不定：「好視乎當日狀態，如果 feel到意志唔係好強，怪獸就要出嚟，就唔好上佢屋企，或者叫多啲人嚟；如果心裏誠實知道唔會有事發生，就上去食餐飯。」
呢對「長短腳之戀」拍拖只有兩年多，不過睇得出二人的真心真意，即使活在用金錢、虛偽、是非和物質堆砌而成的複雜娛樂圈內，王祖藍與李亞男對感情的堅定，可說是出於污泥而不染，實在是圈中難得的一對。
長短腳開花結果
入得娛樂圈大部分都係靚仔靚女，不過都有少數好似王祖藍咁唔靠樣，憑才華殺出血路，成為娛圈奇葩。至於談戀愛更加唔能夠以貌取人，好似祖藍同亞男咁高矮配，其實圈中都有好多 pair。
郭富城 熊黛林
06年熊黛林與郭富城因合作拍 MV而撻着，仲有傳今年尾兩人正式拉埋天窗。兩人雖然從未正式企埋一齊公開合照，不過可以幻想一下， 5呎 11吋嘅熊黛林拍埋 5呎 7吋嘅城城身邊，肯定係「電燈柱掛老鼠箱」。
甄子丹 汪詩詩
自稱身高有 5呎 6嘅「宇宙最強」甄子丹，與 5呎 9吋女模汪詩詩結婚 8年，兩人身高雖然差起碼 3吋，不過無阻生兒育女，兩人現育有 7歲女兒 Jasmine及 3歲兒子 James。
杜汶澤 田蕊妮
屬於「五短」身形嘅杜汶澤，與老婆田蕊妮經常喺微博大晒恩愛，兩人仲成日自拍放上網，不過身高比老公高兩吋嘅阿田，為咗就住老公，經常屈膝扮矮。
Orignal From: 下月加國提親 爆王祖藍閃娶李亞男
沒有留言:
發佈留言