近日《FACE》和《蘋果日報》指林峯與潘霜霜拍拖期間，搭上廈門同鄉芳芳，又指芳芳在林峯家中自拍，更指林峯「劈腿」！對此，身在北京拍攝《忠烈楊家將》的林峯，對於負面報道忍無可忍，昨日透過律師發聲明，追究失實報道。聲明中，林峯怒斥8月24日的《蘋果日報》及第222期的《FACE》有關他的報道失實，他為純屬杜撰及憑空捏造的報道作出澄清，更即時委託律師提出強烈譴責，以及追究一切法律責任。
累及家人萌退意
昨日林峯接受本報記者長途電話訪問時，對報道仍憤憤不平，他說：「一直以來好多失實同負面報道中傷我，我都一笑置之，但今次真係忍無可忍！自從潘霜霜事件後，我承諾會努力工作，今次件事出咗嚟後，好似變咗我講大話，呢樣嘢真係超越底線！令父母好唔開心。」
林峯解釋照片出處：「啲相係好多年前擺入伙酒時，請班同鄉朋友上嚟玩，但除咗睇獎相同抱狗相之外，其他好似洗手間同客廳都唔係喺我屋企影，依家屋企已經翻新，獎項亦冇放喺屋企，就算樂小姐（樂易玲）已經話有啲相唔係真，但依然照寫，咁有違記者操守，好唔啱，今次要正視問題，希望大家適可而止！」
林峯直言入行至今，從未試過透過法律追究責任，他說：「雖然啲人話做藝人要『食得鹹魚抵得渴』，但抵得渴唔係要承受負面報道，令家人唔開心就更加唔可以接受，自己從冇諗過行到呢步，今次真係好過分！」
談及芳芳，林峯表示已有好幾年沒聯絡對方，他表示對方已婚，又謂擔心報道影響其家人：「自己係公眾人物，但朋友同家人唔需要承受呢啲報道，我入行嘅宗旨係要令家人放心同安心，點知咁多新聞反而令家人擔心，辛苦係唔會令我放棄呢行，令家人唔開心嘅報道，先令我放棄，自己唔想行到呢一步。」
自閉抑鬱生恐懼
接二連三的負面報道，令林峯曾感到自閉和抑鬱，而且對人及影相產生恐懼感，他說：「係會有陰影，有時同朋友及同學聚會，佢哋都唔敢同我影相，就算影咗佢哋都問相片可唔可以放上Facebook，喺街遇到Fans影合照，我都會猶豫，咁樣真係好慘！」此外，在昨晚《東張西望》主持亦讀出聲明原文力撐林峯。
提到失實報道，林峯憤憤不平。（資料圖片）
聲明原文
林峯發聲明指摘《蘋果日報》及《FACE》作出歪曲報道。
本律師行現代表林峯先生
向各大傳媒作出以下聲明：
林峯先生就8月24日蘋果日報，及8月24日第222期之《Face》周刊，對他的失實及歪曲報導，不但對林峯先生，尤其對其家人，朋友造成困擾。林峯先生特此為純屬杜撰和憑空捏造的報導作出澄清，並已即時委託本律師行對上述報章及周刊提出了強烈的遣責及追究一切法律之責任。
林峯先生十分感謝一直支持及愛護他的公司，同事，歌迷和影迷，他再次承諾會繼續努力做好其演藝事業和專注其音樂工作，以答謝大家。
范紀羅江律師行
2011年8月25日
樂易玲撐愛將怒斥離譜
對於林峯發聲明追究失實報道，無綫製作資源總監樂易玲力撐林峯：「林峯係公司一線演員，形象好緊要，如果係佢自己唔小心同埋係發生過件事，咁林峯要承受係冇辦法，但今次真係離譜得滯！我了解咗件事，啲相係林峯多年前擺入伙酒時影嘅，洗手間同客廳唔係喺佢屋企影，報道令芳芳個老公唔開心，連林峯媽咪都打畀我覺得好委屈冤枉，上次件事（指潘霜霜事件）已經令林峯好傷，自閉咗好耐，啱啱企番起身重新投入工作，又遭受另一次打擊。」她表示當日雜誌刊登報道後，有記者向她求證，當時她已否認部分照片影自林峯家中：「唔明《蘋果日報》依然照出，林峯透過律師發聲明時已徵求公司同意，之前咁多單報道好影響公司形象，嚟緊會開會討論有乜嘢可以做。」
報道辣慶群星
過往有不少藝人對周刊的失實報道感憤怒，並尋求各種方法作出大控訴，為自己討回一個公道！
何超雲
何超雲本月17日談到《壹週刊》對陳山聰的失實報道，她表示已叫律師出律師信聲討他們誹謗，其後她向《壹週刊》及《忽然1周》發律師信指報道失實及要求道歉。
黃宗澤
黃宗澤今年6月在寓所內遭偷拍全裸照，加上王浩信及陳自瑤等無綫藝人先後在寓所被偷拍，無綫封殺《忽然1周》與《FACE》，三名藝人到個人資料私隱專員公署投訴。
呂良偉
呂良偉今年7月無辜被《壹週刊》指育有兩名女兒，太太楊小娟帶律師開記者會怒斥報道失實。阿呂力斥報道有問題，並指該周刊「道德淪亡」，周刊後來登道歉啟事。
Orignal From: 林峯被屈劈腿法律追究
沒有留言:
發佈留言