娛一叮

背後發功冧高層　陳法拉徐子珊鬥攝佘位

2011年10月14日

前無綫一姐佘詩曼離巢後，加上挖角潮，無綫青黃不接，當下惟有推一、二線花旦上位接棒。眾多花旦中，高層鎖定陳法拉及徐子珊有潛質，下令明年力捧。至於楊怡，因與佘詩曼是公認好姊妹，大有機會過檔王維基的城市電訊，所以近日被飛出力捧名單。

徐子珊雖已脫殼（殼王陳國強），但因有高層樂易玲撐，今年連續推出 6個劇，曝光率可謂眾花旦之冠。而志雲黨的陳法拉，自陳總回朝後，形勢大好，已經鋪好路明年拍三齣重頭劇。兩人識得冧高層，攝佘位指日可待！


寸到出口
慶功宴開始，兩位阿姐被傳媒拉住合照，徐子珊特別揀咗件 T恤襯番佢劇中角色名字「 Paris」現身，即成為傳媒焦點。法拉見狀即寸爆：「你件衫好窄喎！」之後又各自出招冧高層。

10月 11日，《潛行狙擊》舉行慶功宴，無綫副行政主席梁乃鵬自掏腰包，宴請劇中演員及幕後人員。席間，兩位女主角陳法拉及徐子珊各自發功冧高層，暗爭明年當家花旦之位。

談到被捧上位替代阿佘，徐子珊說：「言之尚早，仲有好遙遠嘅路，依家做好本份就夠。」至於法拉則說：「睇出年啦，最近拍《東西宮略》壓力好大，之後個期仲疊住《名媛望族》，都好辛苦。」

法拉出招

陳總開路
10月 11日，《潛行狙擊》慶功宴上，眾星影大合照時，陳志雲特別照顧法拉，輕傍其纖腰企靚位，至於徐子珊則惟有靠邊站。




埋樂易玲堆
陳法拉雖然是志雲黨，但一向識冧高層的她，近日亦頻頻出招埋樂易玲堆。大合照後，法拉即捉實樂易玲密斟。

子珊出招

冧爆陳總
你有張良計，我有過牆梯。子珊亦主動黐住陳總坐，兩人還不斷細聲講大聲笑。睇陳總個樣，似乎好受落。


梁乃鵬當眾讚
無綫副行政主席梁乃鵬，當眾大讚子珊拍戲夠瞓身：「 Paris（徐子珊）喺套戲蝕底（同 Bosco親熱）咗咁多次，真係好嘢！」而徐子珊捉緊機會，上前向樂易玲及梁乃鵬祝酒吹水。

定力捧名單

早前，陳法拉曾在微博坦言講廣東話對白有難度，更話期待用英語及國語拍戲。

知情者透露：「上個月，成班高層開會，包括六嬸方逸華、梁乃鵬、陳志雲、樂易玲、曾勵珍及梁家樹等人，商討來年力捧花旦及小生的名單。
「花旦中，樂易玲及梁家樹力薦杏兒同子珊，話佢哋肯搏肯捱。梁乃鵬亦點名讚子珊戲路廣，亦正亦邪。至於陳總及珍姐，則偏向捧法拉，話佢有觀眾緣。不過席間有人暗寸法拉連廣東話對白都未講得正，暫時未能擔大旗。」

重頭劇插旗

陳法拉及徐子珊各有高層撐，上位指數叮噹馬頭。陳法拉明年已定了拍三個大劇，包括《東西宮略》、《名媛望族》及《衝上雲霄 2》。《東》劇她飾演鍾無艷一角，演技有發揮，之後兩部都是明年重頭劇。
《名》的卡士有吳卓羲、楊怡，更有劉松仁及陳玉蓮助陣。而《衝上雲霄 2》，自 03年首集《衝》收視理想，外界一直要求拍續集，明年終於拍板開拍。「有陳總撐，法拉明年拍嘅全部係重頭劇，角色都為佢度身訂做。」

至於徐子珊，亦有樂易玲為她鋪路，有份演《衝上雲霄 2》，再次拍住黃宗澤拍親熱戲，將會成為劇集宣傳焦點。「樂小姐一早為子珊部署好，明年除了兩部重頭戲外，仲會同佢搵片商拍戲，打入大陸及東南亞市場，就好似阿佘當年咁。公司即將開拍《潛行狙擊》電影版（即《潛罪犯》），子珊係女主角，另外仲有一部傾緊，若傾得成會 3月開拍。」

陳法拉與徐子珊各有高層背後發功，但論人緣子珊勝一籌，兩位上位阿姐有排鬥！

子珊新劇咀贏法拉

本月 11日凌晨 4時，徐子珊與陳法拉到機場為來年新劇《衝上雲霄 2》拍宣傳片，兩人各有咀戲，但明顯係子珊冇避忌瞓身咀爆黃宗澤，但貴為 Neway新抱仔法拉，則錫身借位。


真啜爆
徐子珊與黃宗澤的咀戲，非常肉緊，仲拍咗 3 take。


借位錫
法拉與張智霖拍咀戲時，用鏡頭遷就，現場睇兩人好大「距離」。


拍前對戲
徐子珊大玩親民，不但與劇中男友黃宗澤有講有笑，更與導演高佬鍾有商有量。


零交流
法拉與對手張智霖零交流，未埋位時各自上網。


零交流
法拉與對手張智霖零交流，未埋位時各自上網。


親民拍照
子珊十分親民，與 fans說笑任影唔嬲。


藐爆 Fans
Fans要求合照，陳法拉黑面藐爆，局擠笑容勉強合照。

子珊稍勝

陳法拉有陳總照，而徐子珊有樂易玲撐，不但劇接劇，更全部是大卡士製作，今年徐子珊稍勝一籌，加上明年無綫已為她鋪好路攻電影市場，上位亦睇高一線。

徐子珊　贏
今年 6齣
單元劇︰《你們我們他們》
劇集︰《仁心解碼》、《洪武三十二》、《團圓》、《潛行狙擊》、《法證先鋒 III》

明年 3齣
電影︰《潛罪犯》
劇集︰《金枝慾孽 2》、《衝上雲霄 2》

陳法拉
今年 3齣
劇集︰《誘情轉駁》、《潛行狙擊》、《女拳》

明年 3齣
劇集︰《東西宮略》、《名媛望族》、《衝上雲霄 2》

---

Orignal From: 背後發功冧高層 陳法拉徐子珊鬥攝佘位