探熱針

陳自瑤有餡　趕嫁王浩信

2011年10月20日

30歲陳自瑤（ YoYo）跟細她兩年的王浩信（ Vincent）拍拖三年，一度吵大鑊分手，但分開唔夠兩星期，男方箍煲成功。分完又合，二人感情進入直路，王浩信日前突然宣布跟女友下月 11日註冊結婚，但否認女友奉子成婚。

據了解，急於做王太的陳自瑤其實有餡接近兩個月，為免大喜日子見肚，二人火速註冊，下月十三日於港島香格里拉擺酒，等老婆名正言順安心養胎。


老公，錫晒你！（設計對白）
老婆有咗，婚禮唔玩咁激。（設計對白）

唔搬屋

陳自瑤跟王浩信被踢爆於本月七日入紙申請結婚，雖然男方透露早有結婚計劃，又稱在六條一（ 11年 11月 11日）特別日子娶老婆，是經過精心安排。不過，心急趕結婚，其實跟搞出「人命」有關。

「佢 哋喺朋友面前認 咗有 BB，如果唔係都唔會趕住結婚，時間好緊迫，所以訂唔到大啲嘅地方擺酒，仲要擺酒同註冊分兩日搞，十一號註冊，十三號先喺香格里拉擺酒，因為場地所限，佢哋只擺得十幾圍。 Vincent同唐寧做完舞台劇，就會開始同兄弟開會做嘢，等老婆可以多啲時間休息。本來上次發生咗俾人偷影入屋嘅事， Vincent都決定搵屋搬，不過一直睇唔啱，而家 YoYo有咗，佢哋更加要跟傳統，唔搬得屋，等生咗先算。」王浩信身邊朋友說。


入紙申請註冊登記的名字叫王昊，是王浩信原名。


去年底分手後復合，二人已不避嫌公開親密關係，更以情侶檔出席活動齊齊搵銀。

王浩信正跟唐寧合演舞台劇，日前出席宣傳活動，全程唔停講老婆，十分 sweet。

陳自瑤正在拍古裝劇《東西宮略》，雖然懷孕兩個月未見肚，不過向來偏瘦的她，面部已有些微浮腫。


在拍戲現場，記者埋身叫影相，陳自瑤千叮萬囑影半身，更突然加披肩遮肚。

陳敏之跟導演彭浩翔都是一對準新人好朋友，先後在微博恭賀二人。

趕收工

老婆搵圈外朋友做姊妹，王浩信的一班兄弟團則全屬娛樂圈人，包括羅仲謙、黃長興，而請客名單中則有二人合作過的陳法拉、陳敏之、胡定欣、黃日華以及苗僑偉等。
「佢哋仲計緊人數，事關圈中人好多時都會突然要開工，就算收到帖都未必到，如果開工出席唔到嘅，佢 哋索性唔俾請帖，費時請多咗人失預算。監製黃偉聲都好好，知道 YoYo要搞婚禮，近排都特登趕晒佢啲戲份，本來套劇下個月中先埋尾， YoYo拍到十一月頭就可以收工，佢仲有半個月時間籌備婚禮。」


陳自瑤戀愛大過天，跟王浩信拍拖後亦多愛二人世界，少跟圈中人來往。


早前拍瘦身廣告著泳衣大騷身材，陳自瑤當時仍堅稱要專注事業，未有結婚打算。

羅仲謙跟王浩信合作《飛虎》後成為好兄弟，今次他也是伴郎團成員之一。

跟黃日華、胡定欣等人合作完劇集《刑警》後，王浩信跟一班演員仍繼續有來往，二人也是被邀請賓客。

補求婚

為老婆有餡做定預告，近日為舞台劇出席宣傳活動的王浩信表明婚後不設防，有仔趁嫩生，不過唔想老婆辛苦，兩個已經夠晒數。據知因為有餡結婚，王浩信決定要補番一個驚喜求婚給 YoYo。

「 Vincent未講會點搞，不過一班兄弟都會幫佢度吓橋。個婚禮搞得咁倉促，又唔可以請晒啲朋友，佢覺得有少少對唔住 YoYo，所以希望可以多啲人見證求婚過程。」王浩信身邊朋友說。

週二（十月十八日）下午，陳自瑤在荔枝角公園開工，由於臨時取消拍她的戲份，未換古裝，仍著鬆身衫、平底鞋的她，對記者表示仍未收到王浩信的求婚戒指，她說：「 Vincent會負責個婚禮，所以我乜都冇理，連入紙申請都係佢搞，我連律師樓都冇去過。」雖然有老公搞掂婚禮好放心，不過佗住 BB的 YoYo，面對鏡頭時十分緊張，不單用披肩遮肚，更叫記者只影上半身。

30趕嫁

陳自瑤與王浩信拍拖三年，女方已踏入 30歲，加上今年唔少圈中女星排隊出閣， YoYo亦急起直追，唔做剩女。

邂逅

08年初，陳自瑤跟王浩信合作《野蠻奶奶大戰戈師奶》邂逅，雖然無對手戲，但因不時出席演員聚會、打羽毛球而熟落。當時女方已和舊愛蔡淇俊分手，王浩信展開追求。

同居

09年陳自瑤拍攝《宮心計》期間，有傳媒拍到她連日放工後，第一時間返回男友維景灣畔的住所過夜。王浩信亦十分體貼，不時駕車送女友返電視城開工。同年七月，二人被踢爆於男友寓所屋苑的泳池內戲水互搽太陽油，並在池邊激吻，令地下情正式曝光。

修好

去年底，女方因男方愛蒲愛玩吵大鑊，執包袱搬離同居愛巢，男方發過千短訊箍煲，唔夠兩星期就氹掂女友。事隔一年，女方有餡宣布結婚。

2字頭老豆

上一代藝人鍾意隱婚，天王巨星劉德華都要接近 50先肯正式承認已婚有老婆，相比之下，八十後敢作敢為，結婚生仔一次過，三張唔夠，照做老豆。

MR鼓手 Tom 23歲

組合 MR鼓手 Tom（杜志烜）跟 Evelyn（蔡穎恩）甩拖無耐，即跟前度好友陽光妹 Leanne（何思諺）撻着，被指是小三撬死黨長腳，不過 Leanne一直否認，拍拖唔夠三個月，二人又突然閃婚，更聯合發聲明，講明奉子成婚，希望獲得大家祝福。

陸永 29歲

組合農夫成員陸永跟懷孕五個月，任職經紀的女友 Rainah上月結婚，同樣是奉女成婚的他，只邀請律師在屋企主持儀式，事後被指慳水唔夠誠意，為要 氹番老婆，陸永表示會擺百日宴，並等老婆產後收身再補影結婚相。

張繼聰 27歲

五年前只得 27歲的張繼聰，跟當時年紀大他兩年的女友謝安琪自爆有餡三個月，由於兩人事業剛起步，為要搵奶粉錢，張氏夫婦繼續出唱片開工，謝安琪更做埋迷你演唱會先去生仔。

---

Orignal From: 陳自瑤有餡 趕嫁王浩信