挨身挨勢
鄭嘉穎中 苟芸慧：我諗佢飲多咗
2011年10月26日
一套大陸劇《步步驚心》令鄭嘉穎喺國內紅爆，仲話有大陸製作公司出 16萬 1集酬勞邀請鄭視帝加盟，認真巴閉，唔只大陸有市，今年亦有機憑《怒火街頭》 Law霸一角再攞視帝。
有錢就身痕，最近忙拍《怒火街頭 II》的鄭嘉穎，據知對劇中第二女主角 34C高登女神苟芸慧相當嗒糖。上週五（ 21日）仲趁幾杯落肚，撩女神自拍。嘉穎主動出擊，可惜女神派檸檬：「我諗佢飲多咗啫」，好酸喎！
上週四苟姑娘喺深水埗拍攝狂跑戲分，雖然着住件唔算低胸嘅 tee，但跑起上嚟依然相當震撼。
41歲鄭嘉穎今年翻生，有份主演嘅劇集都喺中港兩地大收。不過感情生活就冇乜着落，緋聞要數到上年 8月被拍得同國產女模徐靖雯在屋企共度 72小時，但連徐最近都搭上奀星周子揚。鄭視帝冇女乾塘， dry咗咁耐，據知鄭嘉穎即對《怒火街頭 II》新拍檔 34C苟芸慧相當有好感。
熱情玩自拍
鄭嘉穎飲咗兩、三杯啤酒後，開始放鬆，之後仲攞自己部 iPhone同苟姑娘自拍。
見記者避忌即彈開
及後發現有記者在場採訪，鄭嘉穎即刻 chok番個正經樣，玩電話唔理苟姑娘。
跌宕 34C
28歲苟芸慧係 09年國際中華小姐冠軍，除樣靚仲有 34C魔鬼身材，一直以來都係宅男女神。由於無綫鬧花旦荒，苟姑娘亦成為力捧對象，在《怒火街頭 II》成為第二女主角，飾演鄭嘉穎前妻，在戲中與胡杏兒爭 Law霸，戲分由頭帶到尾。上週四（ 20日）苟姑娘到深水埗拍攝外景，其間要着低胸裝喪跑， 34C身材跌跌宕宕表露無遺，吸引近百街坊圍觀。
反地心
為拍好呢場戲，苟姑娘喺深水埗跑足半個鐘，難得佢話：「咪當減吓肥囉！」小心地心吸力呀！
一早中
09年苟姑娘代表多倫多參選國際華裔小姐，當時評判就係鄭嘉穎。
任人睇
女神難得喺深水埗高登商場附近出現，吸引近百街坊、宅男睇嘢，不過苟姑娘冇有怕照喺街化妝、着鞋。唔怕俾人望蝕，相當專業。
狂讚姑娘
鄭嘉穎對苟芸慧非常有好感，上週一（ 17日）接受《娛樂頭條》訪問時就係咁讚人：「佢真係好聰明……我同佢開咗兩日工……但佢係非常勤力嘅演員……」開兩日就知人聰明又勤力，你都好留意人喎！
借醉影相
女神雖已名花有主，跟 08年香港先生冠軍， 24歲的羅天宇姊弟戀穩定。不過嘉穎一樣冇有怕，早前出席公開活動已大讚苟芸慧，「好勤力，好聰明。」
到了上週五（ 21日）二人到深水埗拍攝隊啤傾偈講劇情，由於有生力啤贊助，所以二人即場「真飲」。不過甚有風度嘅嘉穎就錫住苟姑娘叫佢唔好飲，記者在現場聽見嘉穎細心地對苟姑娘說：「你扮飲得喇，驚你醉！」之後嘉穎亦罕有地攞自己部手機撩苟姑娘自拍合照。
嘉穎咁主動，不過女神似乎唔領情，更對本刊說：「嘉穎好靚仔，我以前以為佢好 cool，原來佢好搞笑㗎！（覺唔覺佢追你呀？）吓？我同 Joey（羅天宇）感情好 stable（穩定），（佢撩你合照喎？）我諗佢飲多咗啫！」唔只飲多，仲諗多咗呀！
上年 8月鄭嘉穎被拍得同國產女模徐靖雯喺西貢村屋共度 72小時。感情曝光後， 2人好快就玩完，最近女方更搭上奀星周子揚。
嘉穎爭女羅天宇淡定：「唔驚佢！」
苟芸慧雖然大羅天宇 4年，但呢對姊弟戀發展得唔錯，其他人想撬都唔係咁易。
鄭嘉穎對苟芸慧殷勤，視帝殺埋身，身為苟姑娘男友嘅羅天宇都咪話唔驚，雖然名氣、身價暫時唔夠視帝鍊，不過 24歲羅天宇亦勝在青春無敵。問到佢驚唔驚女友被撬， Joey好有信心：「其實我同 Christine（苟芸慧）有共識，拍劇係有機會出現呢啲情況。我唔驚佢（鄭嘉穎）！同埋影吓相冇咩特別啫！」
逐級上
28歲苟芸慧當選中華小姐冇耐，就已經拍劇。雖然廣東話仍然未講得正，不過機會亦唔少，除 咗一直係宅男女神，今年喺 TVB鬧花旦荒期間亦乘機上位跳上一線。 喺新劇《荃加福祿壽探案》亦有不少搞笑戲分，而今次喺《怒火街頭 II》亦成為第二女主角做 Law霸前妻。佢仲話劇中主要着 tube-top，「我個角色唔算太性感，但成日着 tube-top，只要劇情有需要，我唔介意拍床戲！不過電視都唔會太激啦！」
《福祿壽》咪神
《荃加福祿壽探案》中苟芸慧飾演習泳，劇中同王祖藍、李思哲、阮兆祥有唔少對手戲。
09年國際中華小姐冠軍 嘅苟芸慧，當日有翻版林熙蕾之稱。
Orignal From: 鄭嘉穎中 苟芸慧：我諗佢飲多咗
沒有留言:
發佈留言