王浩信當眾跪地求婚 陳自瑤含淚答應嫁

王浩信當眾跪地　陳自瑤含淚答應嫁

好多女藝人呢排輪住嫁，嚟緊除咗有李玟、 S.H.E嘅 Selina同林嘉綺結婚，下個月 11號， 30歲嘅陳自瑤（ YoYo）亦都會同 28歲嘅王浩信拉埋天窗。早排王浩信透露想喺 8條 1當日註冊，即 2011年 11月 11號早上 11點，仲話嚟緊會用驚喜形式同 YoYo求婚，結果前晚王浩信喺香港大會堂為舞台劇《辛辣人妻》演尾場時，突然攞住束花同卡幾嘅鑽石戒指跪地向去捧場嘅 YoYo求婚，仲大大聲對 YoYo話：「你嫁畀我啦！」

YoYo開心展示王浩信送嘅一卡半鑽石求婚戒指。

王浩信前晚演出期間突然走到觀眾席跪地向 YoYo求婚，結果 YoYo點頭答應。



YoYo答應做王太後，王浩信開心到攬住 YoYo狂咀。

觀眾幫口

呢幕求婚令全場觀眾起哄，佢哋仲幫王浩信口叫 YoYo答應，冧爆嘅 YoYo於是點頭答應。噚日有人將王浩信求婚過程嘅相放上微博，相中見 YoYo攞住束花掩住嘴冧笑。
噚日馮仁昭打電話問 YoYo感唔感動？佢話：「嗰刻我反應唔到。」事前係咪收到風男友會求婚？佢話：「都感覺到，見大會攝影企晒喺度，平時唔會咁多人㗎。我覺得好似做緊戲，最感動係佢好有心思，安排晒我最好嘅朋友喺度見證。」 YoYo話自己當時感動到喊，而佢兩個仲順應要求當眾咀嘴！

 

---

Orignal From: 王浩信當眾跪地求婚　陳自瑤含淚答應嫁