留言集
愈美麗的東西 我愈不可碰 阮兆祥
2011年10月14日
對四十四歲的阮兆祥來說，剛過去的重陽節，很早已不是一個只代表放假的尋常日子。這兩年的春秋二祭，還加入新的行程，新的人和事。
「上年，有個認識多年的好友突然過身，有一段時間，好唔開心。但我們一班朋友十幾人，蔡一智都是其中之一，依家會約好在其生忌、死忌，一齊出去飲茶先，然後就去『探』他。
「大家幫他買衫、買鞋，一邊摺金銀一邊傾吓偈，好開心㗎！」眼前人的確在笑，還告訴我，他剛買了架七人車開工，那由別人代出的車牌號碼，竟巧合地是好友的生忌。是命吧，就如他在十七歲喪父，比多數人更早經歷生死。
「我很早便接受了人會死亡這個事實，但爸爸過身後，覺得比較可惜的是，自己沒有機會可以報答他，那種感受是最深的……」人間管不了天堂，世事原也不由人。
「以前都會好想再出碟，依家就唔再諗嘞。嗱，當然凡事都要盡力，但如果你已盡了一百二十分的努力去做，那結果就交給上天，或者其他人去決定。唔知點解呢？我開始覺得做人不要太強求，不要有太多無謂的壓力……」
提提你。阮兆祥的故事不像《荃加福祿壽探案》，若閣下只想輕輕鬆鬆笑一場，請直接跳過以下的四版專訪。或者，選擇看相。
先走，是為了重聚
訪問當天的第一個話題，是「人生目標」。不是預設的題目，是阮兆祥有感而發。懂說笑的人，從來更懂得思考。也難怪，我們的高官多只會黑面。
「最近，我開始諗，香港人的一生目標是甚麼呢？好像現在的樓，好少少的，都賣四百至五百萬！當你買間普通點的，都至少要二百萬，俾三成首期，即是要攞六十萬出來，而普通一個打工仔只是賺萬幾蚊一個月咋！
「我就當你賺二萬幾蚊一個月，每個月可以儲一萬已經好好。但儲六十萬首期，也要儲五、六年，但到時樓價又會升。哈哈哈哈！咁不如算啦！
「如果你每個月都要用一大筆收入去供樓，生活就會好大壓力。所以，我開始覺得要對自己好一點，做人除了求溫飽，仲應該諗吓點樣去令自己開心！以前覺得要死慳死抵去買樓，再樓換樓，但依家無諗咯。我情願嘥多些錢去租屋，最近就搬了入新界，現在每朝起身望出窗外，都笑㗎！因為環境和空氣都好了，好舒服。
「其實，我九七時都買過樓，變負資產，最後賣了。依家不想再供，可能未供完，我就死呢。樓，帶不走的。」
近幾年，看着身邊的前輩、好友一個個離去，阮兆祥自言睇化了，人總要學習跟死亡「共處」。
「去年看着朋友突然離去，當然唔捨得，但我們一班人的想法是，他其實去了另一個世界！就好像籮記、阿梅、 Leslie走的時候，大家都好唔開心，不過他們也只是先去了另一個國度，視察一下環境， check下哪裏有好嘢食，哪裏有好嘢玩，然後我們去到，他們就會話：『等你好耐！哪裏正呀，一齊去玩啦！』
「我們幸福一點囉。有朋友做晒所有的 research……」
爸爸，時光可以倒流嗎？
面對好友離世，阮兆祥可以嘗試看開，跟一班朋友互相扶持。惟有父親的早逝，是他心中永遠的痛。阮父當警察，跟兒子一樣愛唱歌，可是他看不到《荃加福祿壽》在會展開演唱會，也等不到兒孫滿堂的日子。多少年了？那個無處報親恩的兒子，每說起父親，依然紅了雙眼，放不下，忘不了。
「直到今時今日，我仍然會諗，點解自己唔可以早點出來工作？那就算爸爸早過身，也可以早點報答他。」事實上，當事人早在十五歲已開始在酒廊做兼職歌手，也不算晚吧？
「不過，如果我十五歲就好似霆鋒這麼犀利，那十六歲都應該可以請爸爸去歐洲玩吓呀！在上年的演唱會上，自己都講過：『我最想的是，爸爸可以見到我今日的成就，為我而驕傲！』
「點解？點解時光唔可以倒流呢？如果我可以將昨日的爸爸，帶到我今日這個年代就好！最痛心的是，開騷前，媽咪同我講：『如果呢一刻，爹哋在身邊，同我一齊睇住你的成就，咁幾好呢！』
「其實媽咪每一次見到我演出，都好 proud of我，但當她講這些說話，我又……唉！但自己控制唔到，這永遠是一個遺憾。
「世事就是如此，只有盡力而為。好似我們做喜劇的，唔同做正劇的演員，要不斷創作。即是一個靚仔去做戲，他今日着恤衫，明日着 T恤，嘩！都是一個靚仔吖！你唔會話：『有無搞錯呀？又咁靚仔！』你唔會詐型㗎。
「但如果我講同一個爛 gag，講第一次時，你會笑；講第二次時，你會話聽過；講第三次時，你直情會覺得我無料到啦！
「所以，呢條路是艱苦的，但也是開心的路。依家在 TVB入面，講爛 gag，我應該是『王』嚟㗎！呢期除了『 Chok王』，我就是『爛 gag王』！
「我會不斷諗，不斷講。是很攰的，但很多人覺得我好好笑。見到人笑，我就最開心！」
從音樂節目主持，到《歡樂今宵》的扮嘢高手，然後 07年憑《溏心風暴》的「舅父波」一角，得到「最佳男配角獎」，攀上高峰。今年，是《荃加福祿壽探案》的男主角之一，娛樂圈確是一場持久戰。
與現已嫁作「金利來」新抱的黎瑞恩，曾是圈中不公開的戀人。今天，他不欲再提往事，只說：「我覺得自己依家是一個好男人，會令身邊的人開心。但在廿多歲時，卻常會傷害人。」《蘋果日報》圖片
阮父當差，最愛新馬師曾，常帶兒子到大笪地食東風螺買卡式帶。「其實爸爸都想當歌手，但為屋企，先決定做一份穩定工作。」
生仔？怕不能長相見？
努力總會有回報。阮兆祥的工作已排到明年六月。除了二月會在紅館搞《荃加福祿壽 PartⅡ》演唱會，還可能推出主題 EP。雖然不是夢想的個人大碟，但事業有成，毋庸置疑。也是時候，成家立室吧？畢竟，阮媽媽只有一女一子。
「媽咪好好，無催我。自己知自己事，四十幾歲嘞！依家先結婚生仔？我怕唔知幾時有事，睇唔到個仔大學畢業。」最怕歷史重演？但總不是每個人也如阮父般中年得病，我們是否可以樂觀一點？
「不是每個人都會，但大部分也是這樣。哈哈哈哈！唔知點講，總之未做完手頭上的工作，仲要衝要搏！
「『福祿壽』呢個組合，我諗住做好多年㗎！要做另一隊『溫拿』，哈哈哈！其實我想做『 SMAP』，大家有唔同範疇的工作，但每年又會一齊做新的 project。好難得大家有 chemistry，又培養了默契，而且自己已經唔當祖藍同思捷是同事，直情好似家人！
「我和祖藍去雲頂登台，屋企兩老都會跟埋去玩。我們工作時，她們就自己去 happy。大時大節，兩家人仲會一齊食飯。
「其實，我依家的生活好簡單。不用工作時，就會陪吓屋企人，放吓狗。如果有時間，叫埋朋友上屋企食吓飯呀！已經好開心。因為身邊那班最好的朋友，都識了很久，我們現在有個共識，就是見到就見！只要有時間，點都見吓啦。
「可能依家比較年紀『輕』呢。哈哈哈哈！所以開始會變……」
好友遍天下，蔡一智便是多年深交，去年替其演唱會做嘉賓。而國際影后張曼玉和被傳麻煩的梅小惠，也在其好友之列。「我叫 Maggie做家姐，但不會煩她，她有空回港吃飯，就敍吓開心吓。梅小惠麻煩？我覺㗎，但每個人也有優點缺點。做朋友唔應該計較。」《蘋果日報》圖片
跟圈外女友 Crystal拍拖逾十年，不打算結婚生育，平日愛弄狗為樂。「我當牠是人一樣，最近打算養多隻，一個家庭有新成員，有多點生氣。」
EXIT出口
你可能記得，阮兆祥參加第三屆新秀入行（冠軍是張衞健，阮並沒贏得名次），但未必知道就讀高主教書院的他，曾橫掃學界歌唱比賽，成績不輸給「香港華仁」出身、同年的李克勤。那年頭，他的參賽歌曲是〈 Careless Whisper〉、〈前程錦繡〉等，比現在的「超級巨聲」更愛挑戰高難度。「對我來說，唱歌是一件很認真的事！」
為唱歌，他曾自薦做 DJ，迎合當年 DJ歌手的潮流，出過數張唱片。然而，當年的阮兆祥再瘦，畢竟也不是一副公子模樣的李克勤，歌手生涯靜悄完結。後來加入 TVB，以為可以累積人氣，卻自此洗不去「電視味」。出碟，更遙遙無期。
89年的《我心深處》大碟，看封面那支結他，就知道阮兆祥從來都是走實力派路線。
「我好少會唔開心，但有時都需要有出口。講真，如果將所有唔開心都放在心裏面，睇吓幾時會爆啫！咁自己放一放氣，是否好一點呢？」
已不記得從何時開始，他每年都會到中文大學的歌唱比賽擔任表演嘉賓。「我好鍾意去大學唱歌，每一次都會好認真去準備，真的唱歌，不是搞笑。只要我拎支結他出嚟！一班大學生已經好興奮，他們估不到祥仔真的懂音樂。每一年，我都好期待呢刻……」
忘了說，阮兆祥唸中五那一年，申請了十八間加拿大的學校，結果被十七間學校取錄。只是，父親沒多久便過世，他唸完中七，入行養家。
還好。不是每個人生的遺憾，都會直到永遠。
撰文：李綺雯
攝影：陳兆基
協力：李梓軒
髮型： Eddy Kwong
服裝： RMC
Orignal From: 愈美麗的東西 我愈不可碰 阮兆祥
沒有留言:
發佈留言