娛頭
有牌肉酸 貼錢開姣男時裝 超雲迫令陳山聰改行
2011年10月20日
陳山聰跟賭王三房千金何超雲拍拖唔夠一年，做跟得男友陪女友周圍玩，就算被人話係「軟飯王」，亦充耳不聞。放得低男人尊嚴，陳山聰更任由女友當自己係人肉 Ken，改頭換面，打扮一次姣過一次。據知，超雲計劃將二手衫店鋪改為自家品牌，出售自己設計的飾物外，更會推出男裝，讓陳山聰打骰兼做生招牌。
此外，超級醋埕的超雲向男友立下兩大規條，嚴禁他跟其他異性聯絡來往，更要定時在微博晒恩愛；「雲」令如山，上週出席新劇《天梯》開鏡拜神時，陳山聰離遠見到 D胸咪神高海寧，即刻彈開。討好女友自我監控，何家準女婿，唔易做！
Honey，你係阿 Ken！（設計對白）
你係 Barbie，咁我哋就天生一對！（設計對白）
貪靚的超雲除了注重自己的打扮外，還會安排男友陳山聰由頭到腳的衣著，是現實版的 Barbie與 Ken。
愛得認真
攞正牌等做賭王準女婿後，陳山聰不但身光頸靚，更為氹女友開心，寧願俾人笑，依然任由超雲擺布，將自己當作「人肉 Ken」。
外界唔睇好，但超雲身邊好友卻指何家千金並非玩玩吓。「 Florinda啲朋友都知佢今次好認真，可能 Joel（陳山聰）年紀有番咁上下，人生閱歷多，追女經驗夠，知道點樣同 Florinda相處，好似平時買衫點襯法， Joel都任女友話事，好無所謂，加上佢讀過設計，好多時可以俾到意見點搞 Chew間鋪，令 Florinda覺得有個依靠，好欣賞呢個男人。
「 Chew原本以自家設計飾物做賣點， Florinda最近都搞埋男裝飾物，仲計劃出埋男裝衫，到時會俾 Joel負責男裝，兩個拍住上喎！」
何超雲認真對待陳山聰，對外界因為二人背景懸殊而對男友加以主觀評論，據知超雲一直耿耿於懷，曾經多次向友人訴苦。
「 Florinda好嬲啲人話佢包養男朋友，佢話 Joel個二哥 喺澳門做物流賺到錢，又成日叫個細佬返澳門幫手，只係 Joel唔肯；但佢二哥依然每個月入錢去戶口，俾零用錢個細佬，好錫佢。」超雲友人說。
Ken Barbie
超雲一直有設計女裝飾物放在店內出售，最近，更推出了首條男裝項鏈，以金龍為主設計是因為七六年出生的陳山聰屬龍，很重視男友。
在英國讀設計的超雲，一年多前在中環開設 Chew二手時裝店，據知她會將 Chew變為自家品牌，希望在未來幾個月內推出男、女裝，與男友一起打天下。
好啱嘴型
無興趣做物流，但時裝則不同看法。陳山聰二十歲已做過時裝設計師助手，正好與超雲有共同嗜好，這個也是快撻着的主要原因。
「 Florinda成日都想搵個同自己 啱嘴型嘅男朋友，而家俾佢搵到啦！兩個都咁鍾意 shopping，又鍾意設計。」
據了解，陳山聰每次出席公開活動，超雲都會悉心幫手準備衣著，由頭襯到落腳。「佢想個男朋友好似自己咁，著得 fashion啲， Joel係公眾人物，比較易接受 啲古靈精怪 嘅打扮。 Florinda揸晒主意揀衫，佢話唔擔心男友 carry唔到，亦一定會著。」超雲友人透露。
山聰大不同
係愛情魔力令人改變，還是攀富貴要失去自我？陳山聰自從成為何家千金正印男友，由打扮到身材，甚至處事作風，都百分百配合女友，口味風格一百八十度轉變！
打扮過火
未同超雲拍拖，陳山聰陽剛味重，又愛跑街 keep瘦，跟超雲拍拖後，衣著品味大改變，出街畫眼線搽粉、著透視裝、穿戴愈來愈大件頭的飾物，又姣又妖。
「以前佢唔會咁著，仲話過呢世人都唔會著 see through，話男人之家著乜鬼透視裝。而家啲口味轉晒，出嚟見人嗰身打扮有時好乸，真係有啲過火。
「可能佢女朋友覺得潮啦，最重要係佢自己都接受到。好似以前山聰唔會俾自己走樣，肥少少都會即刻 keep番，而家肥 咗成個碼，聽佢講話係女朋友唔想自己太瘦，又話超雲整甜品再成日整俾佢食，好難唔肥！」陳山聰身邊人說。
陳山聰收到女友的禁色令，在新劇《天梯》開鏡當天將自己變成孤獨精，男、女都保持距離。
十月二日生日的陳山聰，在微博上回應了契姐伍詠薇的祝賀後惹來超雲不滿，在女友的要求下要與圈內女性朋友斷絕來往，所以才打電話給伍姑娘提出絕交。
禁近女色
要高攀戀賭王千金，陳山聰當然要付出。據了解，雙魚座的超雲是十分敏感的人，很容易呷醋，明知男友很多機會接觸不同類型的女藝人，為免飛來蜢投懷送抱，早已定下規條，不准陳山聰跟其他異性聯絡，就算是相識已久的圈內女性朋友，都要斷絕來往無得傾。
「早排山聰話自已玩 true or dare，搞到要打電話俾契姐伍詠薇同佢講絕交，其實大家都知乜事，之前山聰生日，回應咗伍姑娘喺微博嘅祝賀，超雲唔俾佢同班圈內女仔 friend要佢咁做，雖然事後山聰公開道歉，不過都冇用啦！佢而家連湯盈盈、陳敏之全部以前玩開嘅都冇聯絡，但超雲就有叫山聰介紹郭政鴻俾佢識，圈中男人就冇問題，可以繼續 friend。」陳山聰友人說。
為免令超雲打翻醋埕，陳山聰在大合照時刻意企埋一邊，拍檔高海寧曾向工作人員透露與陳山聰沒有交流的原因，是他的女朋友很易呷醋。
伍姑娘對於陳山聰的絕交來電感到很震怒，就算他公開道歉也不作任何回應。
微博晒愛
上週四（十月十三日），陳山聰出席電視劇《天梯》開鏡拜神儀式，被記者追問會否過廠，跟同在電視城開工的伍詠薇謝罪，他表現驚青；其間，因為太多人塞住路口位，無退路的他被迫跟陳茵媺打過招呼外，面對高海寧，他更好似驚女友有「天眼」見到，第一時間彈走避免同咪神接觸。影大合照時，他寧願黐住其他三、四線男演員企埋一邊，切完燒豬後，馬上返廠，免得久留被記者叫同其他女藝人合照。
「我哋仲以為佢兩個（陳山聰、高海寧）有牙齒印，點知問過高 Ling，佢話陳山聰個女朋友好易呷醋，唔鍾意佢同其他女人接觸喎！」劇組工作人員說。
除了唔俾男友近女色，超雲又規定要陳山聰定時將兩人拍拖的甜蜜事件放上微博，習慣收收埋埋，結咗婚都無人知，只講公事的陳山聰收到女友 order後，亦依法辦事，將拍拖甜蜜片段公開與眾同享。咁聽話，陳山聰準駙馬之位，穩陣！
最近戴上假髮的超雲，比以往成熟了很多，站在三十五歲的陳山聰身旁，愈來愈有夫妻相。
陳子聰與何超儀結婚後暴肥 60磅，何家養肥女婿有前科可鑑。
透視裝是超雲最愛的服飾，為了與男友成為絕配，所以她也安排了多款透視裝給陳山聰穿著。
賭王及三太沒有反對超雲與陳山聰拍拖，還多次請他回家飯聚，陳山聰大有機會成為何家女婿。
籠中鳥
成功做到何家千金男友後，陳山聰卻喪失自主權，做乜著乜，一切由超雲監控，陳山聰變為籠中鳥。
送車
相戀不久便送寶馬給陳山聰代步，當堂升呢。
供住
原本住清水灣半島，但超雲為方便大家見面，安排陳山聰入住陽明山莊。
揀朋友
醋埕超雲禁陳山聰與圈內女性朋友聯絡，男性朋友則可免役，又要求男友帶她見好兄弟郭政鴻，入侵陳山聰的社交圈。
氹上司
為了男友的前途，超雲降格與樂易玲晚飯，為陳山聰之前失蹤幾個月曠工補飛，十分體貼。
Orignal From: 貼錢開姣男時裝 超雲迫令陳山聰改行
沒有留言:
發佈留言