新港女 icon
葉念琛撮合 陳嘉桓林峯試愛
2011年10月26日
18歲陳嘉桓（ Rose）自從同林峯傳緋聞後，人氣高企，幾乎隔日就有騷出，近期上映的《競雄女俠——秋瑾》亦有佢份，拍住近排新聞多多的黃奕齊齊打。
打女出身，不過 Rose擁有 5呎 9吋半超模身形及 43吋長腿，包到上頸打打殺殺絕對嘥料。據知 Paco（黃柏高）睇中 Rose外形夠 sweet，打算搵葉念琛開拍一套愛情喜劇畀 Rose擔正，而男主角則會是 TVB一線小生，大有可能是與 Rose傳過緋聞的林峯。本刊更發現一直居於美孚新邨的 Rose，正積極到附近豪宅「曼克頓山」睇樓，準備升呢做豪宅業主！
本月 15日，本刊發現家住美孚的陳嘉桓，與助手出現區內一間地產鋪頭。原來 Rose約了經紀睇樓，當晚 Rose主攻區內豪宅曼克頓山，周麗淇亦是此盤住客。其間不停向經紀發問，主攻約 6百萬的 7百多呎單位。睇足半個鐘， Rose捉實經紀去咖啡店再傾，又同助手研究單位座向及間隔，爭在未即場扑鎚成交。
游水 private啲！真實對白
住慣美孚，陳嘉桓即使搵新屋都要搵番同區，不過就由美孚新邨升呢到曼克頓山。
屬區內豪宅的曼克頓山， 7百幾呎兩房單位賣近 6百萬，不過 Rose想媽咪住得舒服，供樓吃力少少都冇計啦！
曼克頓山保安嚴密，經紀帶 Rose上去睇樓都要先登記，啱晒明星住。
睇完樓， Rose同經紀坐低繼續傾，揸住張樓盤單張嘅 Rose傾到笑晒口，唔通真係好想買？
會所夠私隱
廿歲未夠已經向豪宅埋手，上星期本刊便問 Rose是否準備升呢做豪宅業主， Rose承認儲夠首期，「我係想換間大啲嘅屋，等媽咪同 4隻狗仔住得舒服啲，而且呢度有會所，我做 gym同游水都可以 private啲！我賺到 嘅錢都會交晒畀媽咪，自己又唔大使，所以都儲夠首期買樓，不過係細單位咋，要買大屋就要再努力！」
複製《試愛》系列
導演葉念琛
新人嚟講佢算做得好好，佢外形好 sweet，但啲八婆仔角色佢又做到，唔係淨係識打！
監製 黄栢高
佢好有潛質，外形亦都好討好，我都睇過晒佢嘅戲，做得真係唔錯！
男角林峯
有傳 Rose係林峯同潘霜霜之間嘅小三，但 Rose極力否認，仲話嵋家已經冇同對方聯絡，堅決唔靠緋聞上位。《壹週刊》圖片
Stephy同方力申連拍三齣葉念琛嘅戲彈起， Rose有望超越 Stephy做愛情片小天后。網上圖片
在《人約離婚後》只屬客串，但演技已獲葉念琛狂讚，錫到燶。
有外形又交到戲，難怪葉念琛同王晶套《猛鬼愛情故事》都預 Rose一份。
Paco捧上位
出道 2年已獲經理人公司老闆冼國林力捧， Rose先後拍過《葉問前傳》及《秋瑾》等，最近更泊到葉念琛碼頭，有份客串《人約離婚後》，又在葉導新戲《猛鬼愛情故事》做其中一個主角，成功埋堆。
據知葉念琛即將開拍 Paco有份投資的新戲，女主角鐵定係 Rose，而男主角極有可能係拍慣電影、兼係 Rose緋聞男友的林峯。葉念琛就話：「 Rose個樣好有觀眾緣，而且得十幾歲咁後生，好適合拍愛情喜劇。佢拍開打戲，但我估唔到佢搞笑都掂喎！雖然呢一刻仲未傾好劇本，不過 Rose應該唔會好似娜姐咁多床上戲喇。」唔使賣肉， Rose賣青春一樣掂！
密賺 3百萬
自從 3月同林峯傳出緋聞，陳嘉桓人氣有升冇跌，今年已接了 65個騷，幾乎每星期都有得曝光。現時 Rose的身價約 5萬，保守估計已穩袋 3百幾萬！吸金力咁強，要儲夠首期話咁易啦！
$50,000 x 65=$3,250,000
驚冇獎
《亞太男歌手》勢危 林峯六嬸爭獎
2011年10月26日
兩年前因版稅問題而同五大唱片公司決裂嘅無綫，轉谷親生仔林峯做「亞太區最受歡迎香港男歌手」。
但如今五大破冰，堅紅歌手如陳奕迅、李克勤、張敬軒等個個吼住個「亞太」獎，林峯冇死雞執，據知他惟有出必殺技狂冧六嬸方逸華同高層樂易玲留獎。林峯識晨早玩預留，邊個夠你醒先？
自 09年開始，無綫同五大唱片因版稅問題而擘面後，冇歌手上節目，無綫惟有力捧親生仔林峯，並執死雞連攞兩屆「亞太區最受歡迎香港男歌手」獎，可惜據知無綫為同五大破冰，不惜以《勁歌金曲》獎項作交換籌碼，有 Eason、李克勤等堅紅歌手爭食，林峯當然自知危危乎。
林峯貴為無綫親生仔，一講到樂易玲，助手即刻話唔好問之餘仲急急帶走林峯。
大媽錫燶
除咗有樂大媽錫，林峯亦好得六嬸歡心，上年被指票房仆直時，六嬸即親筆寫「十二真言」力撐林峯，真係錫到出晒面。
冇見樂大媽
六嬸真言
為保「亞太」獎項，據知契仔林峯已醒目同高層樂易玲和六嬸方逸華爭取預留獎項。本刊上週六（ 22日）就「留獎」一事問林峯，佢話：「年年都有呢類嘅新聞，自己當娛樂新聞睇就算，（擔唔擔心個「亞太區男歌手」獎被人搶咗呀？）唔擔心，呢啲都係炒作嚟啫！（係咪同樂小姐傾掂數，應承畀個大獎你啦？）吓？（大反應）我呢排忙喺內地拍劇，所以好耐冇見喇！」條線忽然劃到咁清，林峯反應會唔會過大呀？
同路
與林峯同屬英皇嘅古巨基，一向都係無綫友，如今多幾隻鬼爭獎，唔擔心就假。
三面受敵
契仔
有「靚聲王」之稱嘅李克勤即將推出國語碟，身為無綫契仔，可以重返娘家唱歌，無綫點都睇住佢嘅。
大敵
破冰後唱片公司已即時為 Eason做好準備，安排新歌喺無綫播放及配合 11月出新碟宣傳攻勢，男歌手大熱。
黑馬
軒仔唱得又識作曲做監製，一直被睇好有創作才華，絕對係大威脅。
網友寸林峯未夠班
林峯 09年奪勁歌頒獎禮的「亞太區最受歡迎香港男歌手」時，已被寸未夠班，到去年冧莊再攞時，被網民恥笑為「亞皆老街至太子道西掃街獎」，而廣管局更接獨 37宗投訴《勁歌》賽果不公，捧佢變害佢，一線之差咋！
林峯連攞兩屆《勁歌》「亞太男歌手」，結果被網友勁寸。
Orignal From: 葉念琛撮合 陳嘉桓林峯試愛
沒有留言:
發佈留言