天賦長腿饗客
陳敏之的「長腿」已成為她的標誌，即使出騷搵外快，客戶都會要求她大騷美腿，而敏之亦樂得以天賦饗客。
入咗行十年，從來冇代表作，因為每部劇得二十集，過咗就好容易令人忘記。十分慶幸喺《怒火街頭》嘅角色夠突出，「索腿」已成為我嘅標記，到依家出去做騷，好多客戶都會要求我着短裙，我都冇所謂。
陳敏之入行十年，深信努力總有出頭天。
長腿已成陳敏之的生招牌。
敏之拍劇受傷，足足醫了半年。
上天知我陰功
其實拍攝時間從來冇諗過收視咁好，反而係帶畀我一段恐怖日子，因為拍攝一場裸跑戲出咗啲意外，依家諗番仲係好驚，之後喺配音室錄番把聲，睇番發生意外條片時，我嘅眼淚忍唔住不停流，因為令我回憶番當時情況。其實都傷得幾嚴重，醫咗半年，郁又郁唔到，好似傷殘一樣，連沖涼都要人幫手，即使好番仲要擔心着low cut裙時現鎖骨唔靚，對一個女仔嚟講好陰功，所以我要求導演一定唔可以將呢段片播出街。
敏之在新劇《東西宮略》中與陳法拉齊齊做女主角。
可能上天知道我捱到咁陰功，所以依家畀番咁多工作機會我，希望不久嘅將來會再有第二部代表作，每個人都求進步。
敏之視樂易玲為伯樂。
敏之不諱言要跟陳志雲學足一世嘢。
陳敏之（左起）、姚嘉莉、伍詠薇及陳山聰四人特別投契，結義金蘭。
跟志雲學一世
敏之的演技備受讚賞，適逢無綫求才若渴，即獲高層樂易玲欽點接演古裝劇《東西宮略》。雖然有機會擔正，但卻惹來流言蜚語，指她是志雲黨羽，但敏之不理閒言，早前志雲涉貪被捕繼續相約志雲飯局。
「志雲幫」呢個名係傳媒畀我，自己冇特別諗。其實我同志雲可算係同姓三分親，佢除咗係我老闆，仲係我嘅長輩同朋友。可能因為爸爸過咗身，志雲就好似阿爸一樣睇住我，教我好多嘢。
記得最感動一次，係我出書時好想搵志雲幫我寫序，當時同佢唔熟，幾經轉折搵到佢電話，估唔到佢一口答應，仲要兩個小時後即刻有稿。諗唔到一個黃毛丫頭，志雲都會咁認真對待，我當時真係感動到喊咗出嚟。自此之後，我就認定呢個人係可以交心嘅朋友，仲決定呢一世都要跟佢學習。
冇人隻手遮天
最近我有機會接演《東西宮略》，第一次做女主角，可能會有人話我靠志雲幫手，但事實係樂小姐（樂易玲）幫我揮到夏迎春呢個角色。如果有人真係可以隻手遮天，一間公司就好難成立，大家亦唔可以抹殺我過去付出嘅努力。我亦唔怕畀人話「埋堆」，在我立場冇分黨派，佢哋就好似學校嘅老師一樣，唔同科目就搵唔同老師教授，最好大家開開心心打份工。
伍詠薇贈二手衫
早前伍詠薇和契細佬陳山聰關係決裂，身為四妹的敏之提起山聰名字即封嘴，但卻兜個圈讚契姐伍姑娘是個重情義的絕頂好人，自言受過對方不少恩情，擺明與契姐同一陣線！
我同伍詠薇、陳山聰、姚嘉莉04年以一杯日本清酒結義，當年我哋一齊為台慶表演打鼓，日夜不停練習熟落咗，覺得大家好啱傾啱玩，又係大癲大肺嘅性情中人。有次我哋一齊上伍姑娘屋企食日本嘢，心血來潮上契，就乾脆用一杯清酒作儀式，完全唔使交換禮物。
患腎炎走晒樣
山聰事件我唔想講任何嘢，但一定會撐家姐（伍姑娘），因為我同家姐真係好似，大家都係對朋友好真、好講義氣。記得啱啱入行，好多人都知做藝人表面風光，捱騾仔……畀完屋企已所剩無幾。家姐好好，知我冇乜錢置裝，得閒就送袋衫畀我，因為佢係闊太CEO，成日買完啲貴衫着一次又唔要，佢叫我唔好介意，我亦覺得咁靚唔好嘥，最衰我對腳大過佢，唔係佢啲鞋仲貴。
年前我患上腎炎，家姐幫咗我好多，患病初期我呃住大家，因為自己腫到走晒樣，完全唔想見人。後期家姐知道情況嚴重，覺得我有啲自閉，就不停傾電話開解我，仲叫埋楊怡、嘉莉同山聰一齊嚟探我，真係好感動。全靠家姐嘅正能量，令我逐漸接觸番個社會，原來一個人心情好真係會康復得快啲，比食藥更重要。所以我一早當咗伍姑娘係我親家姐，覺得係上天送畀我一份大禮。
後記：愛情昇華
最近有不少圈中「剩女」玩閃婚，敏之雖已介適婚年齡，而且有一位拍拖七年的圈外男友，但她直言「唔憂嫁」，她說：「我唔擔心七年之癢，因為我同男友已超越咗愛情，昇華到親人關係，結婚只係遲早嘅事，但一定要有好周詳嘅計劃。」
口述：陳敏之 筆錄：專案組 攝：劉智源
服裝及場地：Love Girls Market
Orignal From: 傷殘自閉 驚恐度日 陳敏之沖涼假手他人
沒有留言:
發佈留言