娛一叮

挖梅小青班底　王維基三千萬翻拍《宮心計》撼無綫

2011年10月21日

9月初，王維基透過佘詩曼做說客，向娘家無綫挖人，兩人聯手以漁翁撒網式攻勢加薪搶人，「挖角潮」搞到無綫滿城風雨！
經個多月來搶攻，王維基頗有成績，繼姜大偉、冼灝英及周家怡後，唔少甘草、綠葉及幕後人員，甚至連金牌監製劉家豪、梅小青夫婦亦被撬走。
據知，王維基為明年 7月啟播的免費電視台打響頭炮，投資 3千萬翻拍 09年叫好叫座的《宮心計》。有梅小青及佘詩曼擔大旗，再搵冇無綫合約的林保怡、馬德鐘及羅家良當男主角，陣容勁似無綫劇，令翻版《宮》劇賣埠價錢更高，這個如意算盤絕對打得響！


睇住妹妹呀！（設計對白）
有錢齊齊搵！（設計對白）
由梅小青監製的《宮心計》，收視最高有 50點，阿佘和楊怡的爭寵鬥法成為熱話。今次多得反骨佘做說客，楊怡隨時成為王維基頭炮宮廷劇的女主角。《蘋果日報》圖片

免費電視台牌照還未正式發出，王維基已信心爆棚四處挖人，無綫被挖去唔少幕後精英，而與阿佘關係儼如母女的金牌監製梅小青，最近亦向無綫請辭。
「阿佘好識做，幾年前已經埋小青姐堆。每次有重頭劇，小青姐第一個就會搵阿佘攞期。依家播緊《法證 3》，張可頤嘅角色原本係阿佘做，就算臨開劇前阿佘因手傷甩底，小青姐嬲都冇嬲。換轉第二個，肯定被掟入雪櫃啦！」知情者說。

下年才正式開電視台的城市電訊，為了打響頭炮，個多月來不停向無綫招兵買馬。周二（ 18日），更在微博發功，宣布在將軍澳興建電視城，擺明向無綫下戰書。

阿佘穿針引線

今年 2月阿佘約滿無綫後，改簽兩年部頭約，一年拍 30集劇。佢早前趁有時間，即同陳豪開拍無綫新劇《 4 in love》，雖然阿佘身在內地拍徐小明的《建元風雲》，但早就吩咐助手 Tina，安排梅小青夫婦見王維基，搭路過檔。

本刊致電梅小青，可能因為與無綫仍有合約在身，她十分避忌說：「依家我同家豪哥都唔會考慮住，我監製嘅《法證先鋒》出緊街，而家豪哥亦準備下個劇。機會一直响度，但我哋唔諗住。（係咪辭職後都要等半年？）至少半年，詳細我唔方便講。」哦！明晒！原來還要等半年過冷河。

07年的《溏心風暴》再次掀起追劇熱潮，全靠監製劉家豪設計的金句，看來他將會為王維基省靚招牌。


效力無綫近 25年的金牌夫妻檔監製劉家豪和梅小青，多年來為無綫製造收視神話，可惜最後亦被王維基用錢撬走。


周一（ 17日），馬浚偉在微博跟梅小青說：「緣份絕不止於此」，暗示梅小青將會離巢。

甘草大恐慌

兩位資深演員姜大偉和冼灝英，唔知有冇睇清楚該兩條蠱惑條款，但不少甘草演員也擔心自己中招。


姜大偉
問到姜大偉蠱惑條款，他以趕時間為由，匆匆收線。《蘋果日報》圖片


冼灝英
在亞視和無綫打滾二十年的冼灝英，現跟無綫尚有三個月合約，不過據知已和王維基一早傾掂數。《蘋果日報》圖片


張國強
咁樣嘅合約大家聽落都會覺得唔舒服，上咗隻船去又唔係，唔去又唔係！


李司棋
甘草演員眼又矇、耳又聾，如果公司合約加附帶條件好危險。

傳聞兩大蠱惑條款

1.簽約時會加薪，但亦按員工表現而定，公司有權調整或終止合約。（隨時減人工或炒魷）
2.公司可將合約轉手賣給其他公司。（演員分分鐘被賣豬仔）

兩條辣條款

為打響頭炮，王維基斥資 3千萬翻拍《宮心計》。「佢簽咗唔少無綫甘草同二線演員， John哥（姜大偉）、冼灝英已動筆簽約。如果加埋金牌班底嘅梅小青同家豪哥，再搵中、港一線小生如林保怡、馬德鐘、羅家良及吳啟華等，拍出嚟嘅劇就同無綫出品如出一轍，大陸、東南亞同加拿大一定 buy，加上《宮心計》呢類受歡迎嘅宮廷爭鬥劇， 3千萬一定唔會蝕！」

不過，據知有幕後及綠葉演員簽約王維基後，才發現合約內有兩條蠱惑的條款。其一是公司若不滿意員工表現，有權隨時調整薪金或終止合約；二是公司可將合約轉手賣給其他公司。「呢兩條蠱惑條款傳遍無綫，有同事呻笨之餘，亦提醒其他人小心簽約，而無綫方面亦曾發通告提醒演員小心。」知情者話。

姜大偉避談

10月 9日，本刊致電姜大偉，身在內地拍劇返港為母親奔喪的他，承認已過檔：「係呀！你哋都知道晒啦！（幾時履行合約？）明年四月要開工！」不過，問到合約訂明公司可以隨時終止合約或賣俾其他台？姜十分避忌說︰「我好趕時間，辦完家母喪事，仲要趕返內地拍劇，唔好意思，我要收線啦！」至於冼灝英則表示︰「我依家同無綫仲有幾個月約。王維基係搵過我，但我未動筆，依家等無綫搵人同我傾。」

對於王維基挖走姜大偉、冼灝英，樂易玲表示︰「真真正正簽嘅唔多，演員得幾個。（有冇聽聞王維基份合約有兩條蠱惑條款？）我諗同事與同事、藝人之間，大家都會溝通，提醒小心啲乜。

「不過就算簽咗王生嘅員工，如果有咩覺得為難，我會盡量幫，我希望佢哋唔好簽咗後悔囉！就算真係後悔都唔使擔心，時間好快過。」

談到冼灝英等緊無綫傾約？樂易玲就話︰「我之前搵過陳光輝（無綫顧問）同佢傾。如果佢真係未簽，我梗係即刻搵佢啦，佢係個不可多得嘅演員，好多同事係佢徒弟。」

至於王維基對本刊記者的查詢，只回應︰「我依家唔喺香港。」說罷匆匆收線。

鎖定班底

據知王維基下年初製作的頭炮宮廷劇，在卡士方面已作好部署。

馬德鐘
據知跟無綫傾唔掂數的兩位中生馬德鐘和林保怡，已睇過劇本，月內將會落實。

林保怡

周家怡
至於花旦方面，除楊怡外，月底約滿無綫的周家怡，亦將會轉投王維基。由於周是阿佘姊妹，過檔後亦水漲船高，升呢做第二女主角。《蘋果日報》圖片

---

Orignal From: 挖梅小青班底 王維基三千萬翻拍《宮心計》撼無綫