黃婉曼報天氣報到被網友捧為「天氣女神」，在那僅僅兩分半鐘的時間裏，要贏得宅男注意，全靠她「Think Outside The Box」，其他人報天氣企棟棟，她佻脫開朗，惹來不少「道德塔利班」罵她偽善、假笑。沉澱過後，她只想繼續做「黃婉曼」：「我應承自己要喺呢兩分半鐘好真心咁笑住報天氣畀觀眾睇，唔會假笑，就算唔開心，我都會喺報之前打電話叫朋友講個笑話畀我聽，觀眾後來都慢慢接受咗我呢種報天氣嘅方式。」
慘遭喪插
當「天氣女神」成為過去式，她亦主持過世界盃，其後擔任now遊戲節目《撳錢》主持之一，再次掀起高潮。節目要求主持幫手答問題，怎料無論她答對或錯都惹來觀眾喪插，她說：「有人跟我，點知答錯咗我會畀人鬧，答啱又畀人鬧，佢哋話早知就跟你啦！我有時會好亂，畀人講到唔開心，會諗係咪自己識得太少嘢？」
一鳴驚人
「撳錢」不能撳一世，有適合的劇本她會考慮接拍，但做主持才是她的王道：「作為藝人，無論係演員、歌手、主持，每個範疇嘅人每日都要花時間喺自己嘅專業上，對我嚟講，專注一樣嘢再琢磨好過周身刀冇把利！」撈過界主持音樂節目《操控音樂》的她，曾訪問陳奕迅、張敬軒及孫耀威等歌手，有次與女子組合Robynn & Kendy現場Jam歌，她於螢幕初試啼聲，一鳴驚人，始發現她自小與音樂結下不解緣，每逢放學就趕回家，在爸爸的「K房」練歌，當年大熱的新歌琅琅上口，包括梅艷芳的《將冰山劈開》，她將每首新歌練到識為止，後因患上慢性鼻咽炎才放棄。對於做歌手，她搖頭表示暫無可能，不過卻想做「美女廚神」主持飲食節目：「我鍾意煮嘢食，市面上介紹飲食嘅節目比較多，好少主持會煮埋，睇吓有冇機會。」
後記：天氣先生拍拖去
有次黃婉曼報天氣時，本應要出現的「天氣先生」，突然因為電腦故障而失蹤！幸好當天是情人節，轉數快的她立時說：「哈哈！今日係情人節，連天氣先生都忍唔住去咗拍拖！咁惟有等我報吓天氣先！」直播節目的刺激感，永遠令她的腎上腺素維持在極高水平。
做藝人幾時都要「百足咁多爪」，有「周星馳御用主持」之稱的黃翠如（Priscilla），初出道是有線娛樂新聞台主播，及後因夥拍蘇民峰環遊世界吃喝玩樂聞名，期間獲賞識擔任電影《奪標》女主角。現為無綫新紮小花的Priscilla，曾是now及有線固定旅遊節目主持，不過半年前，愛四處遊歷的她，因釐清目標是拍戲，故毅然停工半年，靜待轉投無綫，希望事業創新高峰。
備受關懷
踏入無綫大門不久的Priscilla，雖然立即擔正做女主角，但負面新聞卻接踵而來，被外界標籤為「余詠珊黨」（註：當年Priscilla是由余詠珊提攜入有線），Priscilla聽罷即大笑幾聲，無奈地說：「呢個稱呼聽到我一頭霧水，明明余小姐喺綜藝節目組，而我就入咗戲劇組，都唔知點解個焦點都可以落咗我度。其實講咩都冇用，惟有做好自己啦！」
雖然今次擔正做《心路GPS》女主角，但因她曾在兩部電影中任女主角「打定個底」，故拍劇全無壓力，反而在劇組感受到關懷與愛：「今次拍電視劇冇壓力，台前幕後嘅工作人員對我好好，感覺好似一家人咁照顧我。珠姐（陳秀珠）好好人，帶住我做戲，有次我哋要拍一場喊戲，我喺佢身上學識演繹唔同喊嘅方法。仲有，陳展鵬同麥包（麥長青），我哋都好老友，每次大家坐低傾偈都係討論做戲，氣氛好融洽。」
面對閒言
Priscilla由大學畢業後一直擔任主持工作，由從前的孤軍作戰到現在與眾演員有對手戲，她說：「以前做主持就好似一人騷，乜嘢都得自己一個。但拍劇每次都Keep住有對手同你做戲，壓力反而覺得細咗。我好信對手，對手叫我點演繹就點演繹。例如劇中好多感情戲，當我唔識點去演繹嗰陣，佢哋會帶住我，感覺好舒服。」
對於現今社會，演技好與否改由尖酸刻薄的網民定奪，Priscilla表示已作好心理準備，面對迎面的閒言閒語：「喺TVB有太多演技好好嘅女演員，我都預咗第時套劇出咗會有人批評我嘅演技，今次咪當係測試一下自己能力去到邊囉！同劇嘅演員都有同我講過點都會有人鬧，叫我唔好太介意，我亦唔會特別去Count有幾多人去鬧我嘅！」
後記：身水身汗冇怨言
記者當日與黃翠如做訪問時烈日當空，事前記者已安排在室外地方影相，熱到汗流浹背的Priscilla卻毫無架子亦無半句怨言，當攝影師要求她擺出不同甫士時依然笑容滿面。做完訪問後，Priscilla還以短訊多謝記者，令人感受到「禮多人不怪」，敬佩敬佩！
黃婉曼不但做主持了得，原來歌喉也不俗。
曾有拍攝電影經驗的黃翠如，對於拍劇全無壓力。
平日愛下廚的黃婉曼，希望主持飲食節目。
黃翠如和蘇民峰主持環遊世界的節目。
黃翠如坦言做好心理準備面對閒言閒語。
Orignal From: 黃婉曼黃翠如越界蛻變
沒有留言:
發佈留言