2012年10月31日星期三

廿九不惑 王浩信

FACE週刊 第284期

王浩信

一巴一巴又一巴,有網友數過,王浩信在《名媛望族》,一個 shot,被劉松仁連摑 11巴。
有錢老豆管教敗家仔戲種,劉松仁演來固然駕輕就熟,王浩信其實亦相當有說服力。 08年做唔成歌星,被戲劇組主動邀請去演處男劇《野蠻奶奶大戰戈師奶》,就係貪佢天生有陣「高富帥」味。
從小就住薄扶林二千呎豪宅、中小學讀聖士提反、高中留學到美國,王浩信的有錢仔氣質並非無緣無故。不過留學生涯僅一年,就因為家族生意失敗供養不起被召回港;廿歲仔大屋搬細屋搵工搵客養自己; 23歲先被人捧到上天做偶像歌手,再一夜之間成為棄將無人問津,再加上 28歲結埋婚做埋爸爸,今年 29歲的王浩信,已經比別人 40不惑的年齡還要經歷得多。
今年時來運到劇接劇又升呢做主角,臨近台慶被安排做台慶劇,被松哥連摑 11巴咁搶鏡,王浩信一樣睇得淡然:「以前得到機會,我會覺得理所當然:係因為我掂; o依家,我先至唔會胡思亂想個機會下一步帶到我去邊……諗少啲做多啲啦,我停咗,頭家點算?」

阿姐與松哥


王浩信

對二三線的電視台藝員來說,電視台風雲,新台崛起無疑是升呢良機。離巢的薪水暴漲,選擇留下的則終於等到位上。 08年才開始拍電視劇的王浩信,第一部劇就有得拍阿姐汪明荃,相隔四年又遇上松哥劉松仁,除了台慶劇《名媛望族》
讓他極有機會在台慶頒獎禮叫糊,今年高峰期還同一時間身兼三劇,明年劇集輪住出街真正等收成。

之前係拍完《女警愛作戰》,緊接開《戀愛季節》同《法網追擊》,最近就趕緊《好心作怪》。都唔算好辛苦啫……係尋日收得比較夜,四點幾至返到屋企。機會嚟緊嘅感覺……我淨係可以話好感恩,唔會諗係唔係更好呢。做人應該係咁,有機會就好好把握,唔好諗個機會下一步帶到我去邊。
唔好計呢個角色有冇機會提名、攞唔攞到獎先,淨係有得同松哥做兩父子,已經係圓咗我入行夢想。《大時代》細細個就睇喇喎,好耐以前就發夢都想有機會同松哥演兩父子、同佢拍一場情緒咁複雜嘅戲,呢啲真正袋錢落我袋。
攞獎,我又真係睇得唔重。早排我喺馬來西亞都攞咗個新人獎。係就係,攞獎嗰晚係好興奮,但第二日瞓醒覺,心情已經擺低,咪又係咁做……
我記得細個時我同爹哋關係好疏離,佢要做生意,成日周圍飛,冇乜幾何見到人。生活上,我覺得佢都冇參與過,從來都唔太服從佢,但係想要啲咩,媽咪唔買畀我時又識得去搵爹哋喎……因為佢想補償,通常有求必應。
工作愈嚟愈多,我雖然好想抽時間同囡囡相處,但係呢行最唔到我哋控制就係時間,再講,我唔搏,屋企點呢?

王浩信在《名媛望族》裏與馬國明一齊演劉松仁的一對兒子,馬國明的角色乖到無人有,王浩信則是敗家私生子
王浩信在《名媛望族》裏與馬國明一齊演劉松仁的一對兒子,馬國明的角色乖到無人有,王浩信則是敗家私生子。

劇接劇的王浩信,現時正在與周麗淇合拍劇集《好心作怪》,來年則有四部劇集輪住出街
劇接劇的王浩信,現時正在與周麗淇合拍劇集《好心作怪》,來年則有四部劇集輪住出街。

闊少與奀星


王浩信是 05年出道,同年樂壇新人有關楚耀、農夫
王浩信是 05年出道,同年樂壇新人有關楚耀、農夫:「唱歌始終係夢想,不過搵唔到食,仲有冇得唱,就要等公司安排。」

打從入行起,就一直有說王浩信是富家子弟,家族生意遍布大江南北。王浩信特此澄清,本來就不是巨富之家,中五畢業以後赴美留學,還因為經濟問題被急召回港,沒得再放洋、大屋搬細屋,兼且要半工讀自給自足。住過二千呎的薄扶林海景屋,再搬去六百呎西環舊樓,王浩信話:「六百呎其實已經住得好舒服!」

我唔覺得係富變貧……生活模式唔同咗啫。人係咁,對慣對熟就唔會識珍惜,我得到又失去過,咪知道對 o依家擁有嘅知足囉。
我由細到大都好鍾意畫畫,喺美國返嚟之後就去讀設計、做 graphic design。做咗無耐,又辭咗工自己做 freelance。十九歲咋,以為自己打自己工好舒服,其實搵客難、 keep住啲客唔好流失仲難,就喺嗰陣時冇乜嘢做,同朋友唱 K,俾唱片公司( Neway)邀請試音、做咗歌手。
初入行,唱片公司盡量喺所有範疇都照顧得我好好……由一個要自己周圍拉客嘅 freelance到去到邊乜都有人代勞嘅偶像歌手,真係好大對比。當時我覺得好正,自信心提升幾倍,你唔知點解佢哋要喺你身上投放咁多資源,唔知自己何德何能,但係會覺得理所當然:歌星就係咁㗎架啦……結果出咗兩隻碟,經理人離巢,工作少咗,出到去亦冇助手跟又冇保母車車。出去做嘢,自己唔識路、唔知搵邊個、落車又怕俾人見到我搭的士,以前前前後後傍住好多人, o依家一個人身影單薄,好似少咗啲嘢咁……呢啲咪諗多咗囉。我係無啦啦俾人喺街執番嚟,捧到我咁高,突然間又唔理我,嗰個階段我覺得好失落。好有趣地,就喺我唱歌唱得最唔舒服嘅時候,俾我有機會入電視台,做 TVB8主持。人工少,但假假哋都係份固定收入,無耐又俾人睇中去拍劇。

07年與唱片公司完約後,加入 TVB擔任音樂節目主持,監製張乾文睇中王浩信有「富家子弟」氣質,邀請他拍了第一部劇集《野蠻奶奶大戰戈師奶》,與阿姐做對手添
07年與唱片公司完約後,加入 TVB擔任音樂節目主持,監製張乾文睇中王浩信有「富家子弟」氣質,邀請他拍了第一部劇集《野蠻奶奶大戰戈師奶》,與阿姐做對手添!

去年底,王浩信在馬來西亞獲得拍劇以來第一個獎項「我的最愛最具潛質男演員」
去年底,王浩信在馬來西亞獲得拍劇以來第一個獎項「我的最愛最具潛質男演員」:「攞獎 嗰晚係興奮,但第二日咪又係要擺低情緒?」

做人就係咁,態度正確、唔好得罪人,餓你唔死嘅。以前我成日覺得自己掂,唔掂點會咁多嘢攞?成日諗多過做。 o依家知道每個機會都唔係必然,每個機會都要把握。

阿 Yo與阿囡


' 08不只是事業,亦是王浩信的感情轉捩點。拍《野蠻奶奶大戰戈師奶》,又讓王浩信與年長過自己兩年的陳自瑤相遇再撻着。兩年前,兩人一度冷戰瀕臨分手,復合後總算修成正果,於去年 11月 11日成婚。女兒王靖喬翌年四月出世,現在剛滿半歲。
我係巨蟹座,我覺得巨蟹座男仔一開始都會收埋自己喺個殼裏面自我保護,唔敢投放太多感情。了解得愈多、個殼會愈嚟愈軟化,會將個女仔愈拉愈近,最終收埋喺自己嘅殼裏面,再唔想轉變。
分開過又喺番埋一齊,係因為大家都唔想錯過對方。唔分開過,我唔知自己唔只好鍾意呢個女仔,佢仲好了解我,咁難得搵到呢個人,點解要錯過?其實嗰個啱嘅人,我哋未遇到時會充滿懷疑。當遇到啦,一件事一件事令到兩個人愈走愈近、愈嚟愈肯定佢就係嗰個人,我覺得個天咁樣去安排,真係幾正。
阿 Yo下個月就會復工,我唔想亦都唔需要阿 Yo繼續出嚟做,我淨係想佢舒舒服服咁做自己想做嘅嘢,唔要佢變成經濟來源。所以我以前嗰種 hea已經唔容許……以前我鍾意打羽毛球、放工會約啲同事吹吓水飲吓嘢、唔使開劇唔使開工嘅日子,我鍾意選擇完全放鬆自己。 o依家,收咗工我想快啲返屋企對住個囡;放假我會健身、學嘢 keep住自己嘅狀態,羽毛球都少打咗。除咗難約腳,仲因為怕受傷。一受傷就開唔到工,開唔到工老婆同阿囡食咩呢?

11年 11月 11日上午 11點,王浩信與拍拖三年女友陳自瑤奉女成婚
11年 11月 11日上午 11點,王浩信與拍拖三年女友陳自瑤奉女成婚:「唔係奉女成婚,個女係計劃之中,我哋都覺得係時間。」

王浩信女兒王靖喬現時半歲大
女兒王靖喬現時半歲大:「阿 Yo係個好懂事嘅女仔,我都想養到佢似媽咪咁懂事。」

飯都食唔落


王浩信

前一天晚上拍劇拍到凌晨四點,唔多夠瞓眼腫腫地咬着住家飯盒的王浩信,雖然看得出來辛苦,心情卻一直不錯,愛說愛笑。
直到記者循例問到他婚前與o靚模謝芷蕙( Cammi)的緋聞,他即臉一沉:「個囡都咁大咯,唔好再提得唔得?我根本就唔識佢,做咩要幫人宣傳?」解釋完午飯也沒心情吃了,收拾了飯盒,匆匆結束了訪問。
所以話,養女真係要矜貴養。為出名為賣多兩本衣不蔽體的寫真,搞到人哋一聽到自己嘅名連飯都食唔落,為乜呢?

撰文:朱小博
攝影:范仲良
化妝: Christy Lam
形象: Bryan@ the Flaming
服裝: MAGin
場地提供: OME OME( Tel:2736 9906)

Orignal From: 廿九不惑 王浩信

沒有留言:

發佈留言