鄭子誠近半年熱爆網上討論區，被封為「完美奸人」，但凡他的一切都與奸、陰謀扯上關係，對於「鄭子誠現象」，子誠倒沒所謂：「件事唔太負面，冇人身攻擊，只係針對我嘅角色同角色背後嘅陰謀，我反而受寵若驚，咁多人可以討論，佢哋都花時間討論我，真係無言感激。」子誠探討過現象，認為跟現在社會政治化有關：「話我做嘅嘢背後有陰謀，我諗係源於大眾對政府嘅不滿，延伸到個人感受，對身邊嘅人唔信任。」
轉型做奸人，子誠沒有陰謀，但背後有個小故事。 攝影：葉君海
在芸芸演員中，子誠對任達華（右圖）亦忠亦奸的演技印象深刻。
《黑社會》劇照
鄭子誠笑言不會對太太劉倩怡奸笑。 資料圖片
「自己都睇唔順自己」
擁磁性聲音又有不錯的外形，子誠偏偏被派演奸角，到底覺不覺得自己奸，他笑笑說：「我自出娘胎都唔覺得自己奸，直到《真情》後，有次朋友聚會影相，朋友叫我唔好笑得咁奸至檢討下，經過十幾年磨練係有啲職業病，哈哈哈……自己都睇唔順自己。」子誠96年首次拍劇，《真情》中李子浩深入民心，奠定新一代奸人地位。
一奸就奸了16年，子誠笑言：「我由介意到唔介意，到家睇得好開，仲幾享受㖭！嗰時《真情》、《烈火雄心》總係姦淫擄掠無惡不作，我介意因為由細到大性格唔係咁，我阿媽直情唔睇《真情》，邊有阿媽鍾意睇阿仔做衰嘢。」
原來當年DJ出身的子誠，加入無綫夢想是做個成功主持：「嗰時潘宗明啱啱移民，只剩鄧梓峰，自覺有機會，續約時提出想多做主持，但公司話等我洗甩奸仔形象先，點知跟住一部接一部，變本加厲。」子誠演的劇集約三成演好人角色，但即使連朋友的感覺都跟網民一樣，總覺他後尾會變奸，令他感無奈。
踏上成奸之路，曾經抗拒做奸角的子誠，現已樂於做奸。
「日日踎喺永祥大廈」
由抗拒到享受，子誠奸盡電視圈，背後沒有陰謀，但有一個故事，他說：「其實入無綫第一件工作係做《城市追擊》主持，嗰時新人被安排日日踎喺永祥大廈做祥哥（新馬師曾）爭產，點解見唔到我呢？因為娛記勁，訪問時我只能遞支咪入去，永遠只見咪頭見唔到我，有次我問公司見咪牌有冇騷計，唔畀騷我咪白做？後尾我係唔係都遞個咪牌入去。」最初子誠入《城追》以為會像鄭裕玲般坐廠做主持，誰知日日踎街令他意興闌珊，子誠說：「由祥哥爭產做到祥哥離世，日日就等小艾、九舅父講嘢，有日喺醫院等祥哥，收到藝員科電話，話《真情》想我試鏡，呢個電話改變我嘅命運，冇呢個轉捩點我可能捱唔到幾耐要離開無綫。」
「做好人唔夠阿海好」
命運確實令子誠走上奸人之路，因李子浩一角原非奸人，當初這個新移民角色像《甜蜜蜜》中的黎明，但之後有突變，子誠說：「做咗一輪監製話我做好人點都唔夠阿海黃智賢好，仲話發覺我眉宇間帶點奸意，係第一次有人咁講，家諗番轉頭要多謝監製獨具慧眼，角色由力爭上游變成不擇手段。」
角色變了奸人，子誠很是抗拒，演得不夠投入、流暢，直至監製點醒，造就這個新奸人icon，子誠說：「監製話呢個世界冇奸人、好人，每個人都係為自己，奸人嘅手段外人睇似好衰，但喺奸人心中只為生存。我都諗，如果自己奸計得逞真係會會心微笑，每個人都會咁，我唔排除自己有奸質，其實每個人都有，未必係陰謀論，但總都會有心計，對某人好啲可能係有嘢求佢，我只不過係演繹緊某個人。」
「唔會對住老婆奸笑」
曾望脫離奸人行列的子誠，現已樂於做奸，他說：「我拍劇不斷做奸人，要多謝港台節目可以做番自己平衡番，我又可以安於喺電視繼續做衰人。」不生厭？他哈哈大笑：「所有監製都樂此不疲，惟有當係肯定，其實有少少厭㗎，咪喺角色上加多啲奇形怪狀囉，仲有好多奸嘅做法，如果我生存空間只限於奸，我願意繼續奸落去。」
那在太太劉倩怡眼中，子誠可是奸人？他笑言：「佢笑咋，唔覺我有呢種奸意，我都唔會對住老婆奸笑啦！眉宇間嘅奸意好淡，係耐冇見朋友至發覺，個個星期見我阿媽佢都冇話我奸，我都同啲廣告客戶講要理性分析，哈哈哈……好在旁白得把聲好啲，見樣嘅話，啲人話我咁衰仔，一定有陰謀，哈哈哈……」子誠的招牌式奸笑響起，背後真的沒陰謀？
惡行檔案：奸男Style
被喻為完美奸人的鄭子誠，外表陰濕不可測，就算他飾演大好人，觀眾都凝住他有重大陰謀。
Orignal From: 我主場--鄭子誠：我有陰謀
沒有留言:
發佈留言