無綫台慶劇《大太監》下周一正式上場，該劇未播出已備受注目，萬眾期待之下，本報記者獲邀請，率先收看首十集，發覺劇情緊湊絕無冷場，而男、女主角祥仔黎耀祥和米雪的演技，絕對是今年台慶頒獎視帝和視后之選。監製羅永賢接受本報記者訪問時，亦大讚兩人是天才和地才的演員，完全演活了角色，有信心兩人在頒獎禮得到好成績，而身在外地的祥仔和米雪，對於讚賞未敢自滿，但兩人坦言都渴望奪視帝和視后！採訪：杜淑霞
攝影：張詠森、吳君豪
監製讚男女主角：天才與地才
監製羅永賢決心要打造一個更有血有肉的李連英和慈禧，希望將這對被視為惡毒陰險代表的主僕變得更立體，「呢個係李連英成長故事，佢能夠變到後期所謂『奸』，當然唔係一朝一夕，當中一定經歷咗好多事，編審參考咗好多正史同野史，亦搵咗好多關於宮中低下層生活嘅資料嚟豐富個故事。」
對於祥仔和米雪演出，羅永賢認為無懈可擊，「祥仔同米雪演得好出色，應該攞視帝視后，但都要睇觀眾投票。李連英咁複雜角色，真係諗唔到邊個做得到，算係祥仔度身訂造。慈禧雖然最初唔係得米雪一個選擇，但係佢做咗之後，我就覺得冇搵錯人。祥仔同米雪係兩種好唔同嘅好演員，祥仔就係天才嚟，佢就算講緊笑，但一埋到位，就好似上咗身咁，即刻入晒戲，而米雪就係地才嚟，佢好努力，會做好多準備工夫。」
祥仔讚米雪：正版慈禧
祥仔坦言以一貫的手法準備角色，「戲劇始終係戲劇，雖然有歷史背景，但係跟番劇集去做就夠，我唔係特別去搵資料，我相信編審同監製有佢哋想表達嘅方向。」對於被監製讚是天才，祥仔未敢自滿，「就算係天才，都要有機會發揮先得，李連英呢個角色，真係好啱我演。（有冇信心三度封視帝？）有當然開心，但係我好想米雪姐攞，佢真係做咗慈禧出嚟！佢嗰份貴氣，唔係個個演員有，啱晒個角色，仲有佢啲演技，真係啱啱好，唔係淨係惡，而係好有威嚴嘅壓場感。」
米雪讚祥仔：神級演技
正在內地拍攝劇集的《土地公土地婆》的米雪，坦言當日接拍慈禧一角，感到很大壓力，「劇本同對手都咁好，我唔想令大家失望，所以成日催編審早啲畀劇本我返去準備。」原來米雪一直恨跟祥仔合作，今次終於恨到，亦沒令她失望，「今次接拍同祥仔合作，係其中一原因，佢呢個兩屆視帝今次升咗級，應該係神級演技，佢又唔自私好照顧對手，大家合作好開心。」至於被睇好挑戰視后寶座，米雪表示不敢當，「能夠拍到咁出色劇集，已經好似得獎咁，當然有獎項係鼓勵邊個唔想，但唔會好期望，最緊要有觀眾讚賞，已經好足夠。」
必睇劇情
《大太監》以李連英和慈禧的主僕情為故事骨幹，首十集會交代慈禧看到李連英的忠心和有情有義的一面，決定收為己用。
僕為主犧牲
連英侍奉的婉太嬪（李詩韻飾）發現當年太子病死另有內情一度尋死，連英代為追查真相，連英代主子向慈禧求情兼願代犧牲，但婉太嬪終離連英而去。
代教小皇帝
慈禧求神望子成龍，為鍛煉小皇帝，安排他到連英工作的打掃處做事，連英沒因對方是皇帝而縱容他，反而耐心教導他，兩人因而建立了深厚感情。
單車見真情
連英為救徒弟凌添壽（蕭正楠飾），不惜跟不肯接受西方文化的慈禧吹反調，學習踏西洋單車，最後在他影響下令到慈禧改觀，更由他親自教踏單車。
Orignal From: 率先睇台慶重頭劇《大太監》首十集
沒有留言:
發佈留言