高海寧在08年參選港姐初時並不起眼，直至穿上三點式泳裝出來示人，隨即被傳媒及網民捧為大熱，日日見報。雖然最後三甲不入，但機會就比同界的港姐為多，更被封為「新一代咪神」！「其實由細到大我都唔覺得自己身材好，也沒有人話過我身材好。本身我唔識游水，所以唔會去沙灘，你都知以前讀中學，大熱天時都著冷衫返學，根本沒機會騷身材。記得初次面試就要著住Bikini上電視，我個心已經超驚，當時評判團有王晶、鄧達智、林敏驄等等，我在後台不停同其他佳麗講『千祈唔好抽中林敏驄』，因為怕被佢為難，點知真係俾我遇到佢，但其實阿驄都幾好人，我記得佢第一個問題係『可唔可以俾你個電話號碼我？』聽完即刻唔緊張。那年選港姐，聽聞是咁多年來行程最舒服的，坐遊輪去加勒比海拍外景，感覺就似去旅遊。當時每日被安排穿一套Bikini，前後11套，著得自己也習慣了。整個旅程自己也和不少佳麗成為好友，倩揚(陳倩揚)更成為我的好姊妹。」
為工作半裸問心無愧
高海寧本來是賽前大熱，可惜在決賽最後兩星期，突然網上流傳一張半裸照，有雜誌指摘她講大話唔認影過。不論如何，負面新聞對她有一定的影響，也令高Ling最後大熱倒灶，五強止步。「那時我做模特兒，相是模特兒公司安排的工作，沒有任何的不正經。入港姐訓練，Rosa（港姐保母）會畀歷屆港姐的剪報我們看，讓我們有心理準備記者會問什麼，但始終那時自己剛讀完書出來，忽然成為大熱，很多記者來問我料，真的很怕，又怕講錯得罪人。當時的半裸相只為工作，我做人問心無愧，但如果可以重來，我當然希望沒影過。初入行，我行性感最初都會介意街外人眼光，但經理人同我講『阿女，性感唔緊要，呢個係工作需要，但工作以外，你要做番自己。』佢講得好對，每一個人在娛樂圈都有一個定位、一個selling point，性感本身唔係一個貶義詞，係女人都可以性感，我只是睇場合去性感。」
真命天子需孝順專一
可能因為高海寧的定位，令外間覺得她是一個為「搵老細」、鍾意有錢人同貪慕虛榮的女仔，而不少關於她的負面新聞也由此而來。其中有一單是講她「半年前搭上A富豪住金屋，有望嫁個有錢人，極速上岸享受闊太生活。」提起此事，原本一邊食下午茶，一邊做訪問的高Ling放下食物，滔滔不絕地向記者訴苦。
「呢件事真的好侮辱，雖然我行性感路線，外間一定有偏見，覺得我鍾意識有錢佬，係好貪慕虛榮的女仔，但這只是工作上的需要。私下我連晚上去浦，去應酬也甚少，只因我一直花好多心機去保護自己的形象。假如你影到真人，就像你們影到我和旅行社太子爺食飯，我也可解釋。但這個A富豪根本沒此人，你(指雜誌)咩都影唔到，淨係出一個剪影，就講到似層層。又話我住豪宅，但其實識我的人，甚至我家的街坊，都知道我一直住旺角沒搬過。呢單新聞我真的好嬲，除非你有真憑實據，你咁樣寫我，我覺得抵囉。問題係我冇，所以覺得唔公平同唔開心。我駕駛的寶馬，每月都要供車，入行四年，從沒有任何人聯絡過我出席飯局或者其他交易，再者我根本就唔喜歡什麼富豪或富二代。將來我要選男友，不需要好有錢，只要叻過我、年齡大過我，最緊要孝順同專一，可惜我真命天子至今仍未出現。」
為陳山聰抱不平
去年高Ling憑飲食節目提名飛躍進步女藝員，今年添哥獨具慧眼，揀中她演出劇集《天梯》，和陳山聰配成一對。對於首次正式拍劇，高Ling如中頭獎，所以就分外珍惜今次機會。「入行4年，我好多謝公司給我的機會，因為得到好多知名度，發展已算比上不足、比下有餘。我一直都想拍劇，因為拍劇可以入屋。今次添哥找我演山聰的三姨太，真是開心到暈。山聰好識照顧對手，我想代佢平反一下，我可以做人證，山聰根本沒外間所寫的什麼遲到、早退，而且山聰記對白好叻，好多場鬧交戲，佢要一個人講晒兩、三頁紙對白，嘩，熟到冇乜NG，睇得出做足功課先返工。為了唔好阻人收工，我會做足最基本背熟劇本，做角色之前都會問好多唔同意見，希望遲些會有多些監製找我高Ling拍劇。閒時我也有學唱歌，及多看不同的電影去偷師，因為我知道機會只會給有準備的人。」
高海寧在《天梯》中演三姨太，有不錯的表現，她希望遲些會有多些監製找自己拍劇。
Orignal From: 首度拍劇踏出成功第一步 「咪神」高海寧 目標做花旦
沒有留言:
發佈留言