2012年7月27日星期五

葉翠翠腳骨裂改變一生

人往往要經歷過大病一場,方體會到生死有命,前港姐冠軍葉翠翠早前到橫店拍攝無綫新劇《金枝慾孽(貳)》時,不慎跌倒令右腳腳掌骨裂,她頓感晴天霹靂,眼前只有兩條去路:回港就醫或死守橫店,最後她做了一個「愚蠢」的決定,選擇繼續逗留橫店拍攝以免影響劇組進度,萬料不到這個決定令她對人生改觀:「放開懷抱,當你能做到的時候,便會發現這個世界有多大,有多美麗,同時也會發現自己的能耐是無限的」。

當翠翠發現自己受傷時,最先想到的不是傷勢、自身的痛楚,而是會連累到劇組的同事、拍劇進度,就算每個人都勸她離開,她卻堅持留下。

「我一去到橫店頭幾日就整親,我間酒店房個地有水,我跣倒失平衡跌咗落地,我本來以為只係普通腳傷,自己坐咗喺個地度,點知過咗一個鐘左右,隻腳腫晒,覺得唔對路就即刻打電話叫同事嚟,後來送咗我入醫院,一照先知好嚴重,原來係骨裂。當時好大打擊,最驚係唔可以繼續拍落去,嗰時醫生有叫我打石膏,我唔肯打,我淨係知一定要拍晒自己啲戲份先會返香港,嗰時每日都有人叫我走,我堅持唔走,個心理關口真係好難過!」

受腳傷的葉翠翠當時拒絕回港醫治,用意志捱過10天的苦日子。
受腳傷的葉翠翠當時拒絕回港醫治,用意志捱過10天的苦日子。

啪止痛藥

「監製畀呢個咁好嘅機會我,我唔想浪費,好想拍好呢套劇,特登叫屋企人託同事喺香港帶啲特強止痛藥畀我頂住先,拍嘅時候我會單腳企幾個鐘,監製見到都唔忍心,之後畀張櫈我挨住。好多人話我好蠢,其實係我唔想就咁放棄,想畀其他人知道我好用心去做呢個劇,我喺香港已拍咗好多戲份,唔想因為自己拍唔到,影響到其他同事喺橫店嘅工作。」


葉翠翠在橫店開工,不料跣倒跌親,右腳骨裂。

翠翠(左一)自覺有幸參與劇集《金枝慾孽(貳)》。
10日之苦

翠翠從醫院返酒店後,當機立斷,決定先困自己在酒店房休息10天,再拍攝她的戲份,這10天與世隔絕的「休養期」,對她來說既是煉獄亦是啟蒙。

「呢次係好好嘅經歷,我喺酒店每日都有寫微博,將心諗嘅嘢都寫出嚟,每日我都要諗點樣可以開心啲,要完成拍呢個劇嘅心大過一切。嗰10日我直頭想喊,開頭唔慣一個人,好開心我嘅堅持好多同事都睇到,佢哋都話換咗係佢哋,一定已經返咗香港!今次嘅旅程有痛有甜,返香港之後,諗番真係唔知嗰時啲日子係點過,人生總會有啲經歷,要學識解決、面對,同埋要放低。」

絕不後悔

「好開心自己做到,下次地震、打仗要匿入防空洞應該都捱到!經過今次,我發覺自己都幾忍得,竟然冇癲到。就當個天畀機會我睇吓身邊發生緊咩事,做人最緊要開開心心,人生苦短,每個人都可以揀自己鍾意嘅、想要嘅、追求嘅,等自己每日都活得快樂。機會嚟到時好好捉緊,無論係人定係事,因為機會走咗,可能要花上好多嘅運氣先可以再次遇到,回望過去嘅時候,千祈唔好後悔自己做過嘅事,亦千祈唔好做一啲嘢令自己後悔!」

「因為無好好接受治療,我返到香港睇醫生嘅時候,個裂口大過之前,依家唔行得,要休息3個月先可以落地,醫生話唔可以郁到個傷口,一郁就會扯番開!」

後記:問高鈞賢借拐杖

翠翠身高有番咁上下,原來香港賣開嘅拐杖都係畀亞洲人,所以唔夠高,翠翠用開嗰支唔啱位用得唔舒服,佢都有問早排整親右腳腳踭嘅緋聞男友高鈞賢借拐杖:「我有問佢借,不過費事去攞,佢住九龍區,我住香港區,佢都有介紹醫生畀我,我都有請教佢嗰段日子係點過!」果真「同病相憐」!

場地:ZUMMER

口述:葉翠翠

筆錄:韋芷茵

Orignal From: 葉翠翠腳骨裂改變一生

沒有留言:

發佈留言