兩年前因合作而撻着的「卓予」戀，由起初地下情，發展至後來傳出女方多次施以苦肉計，迫令Ron公開其名分，而Ron於本月15日首次開腔表態：「大家愛大家咪得囉！」正以為守得雲開之際，張馨予前日突然透過經理人表示已跟Ron分手，又傳出內地男星李晨夜潛馨予香閨，事件峰迴路轉。
「之前有啲拗撬」
飽受情傷的Ron昨日頂硬上，在廣州出席健康品牌行健堂的頒獎禮，只見他心情並無異樣，他甫到場，大批內地傳媒即追問分手一事，未知是否為免觸碰傷口，他禮貌地以私人事為由未有回應。其後本報記者多番追問，他終於剖白心情，言談間顯得不捨及無奈。
「唔關第三者事」
對於有傳與韾予已分手三個月，Ron說：「分手呢樣嘢，都係尋晚記者問我先知，唔明點解佢同記者咁講我哋嘅關係，你知啦！可能男女拍拖，之前有啲拗撬。（佢唔滿意你一直唔公開女友身份？）不嬲我哋嘅關係都冇親口講，但好多人都知我哋嘅關係。（你依家心情點？）我嘅角度希望佢好，佢開心就足夠。」
至於傳聞出現第三者李晨，Ron立即否認：「應該唔關第三者事。（你識唔識李晨？）唔識，只係知佢哋兩個一齊拍戲！」他又表示暫時會專心工作，心情沒有太大影響，只是面對傳媒有點壓力，再問到可有聯絡馨予，他三次強調有，問到是否分手，他說：「仲有聯絡嘅！（依家想專注工作？）其實都想有少少時間陪吓屋企人，希望收工陪佢哋。（冇時間處理私人事？）依家都係做嘢先啦！」
至於張馨予在微博上載一張敷Mask照，似有弦外之音的說：「眼睛看到的，不一定是真的。」而對於Ron的言論，其經理人表示不回應。
潛行床照人氣爆升
內地女星張馨予，自從潛行吳卓羲微博並上載床照後，地下情變為地上情，雖然男方多次否認，不過女方名氣卻一直上升。張馨予除拍攝電影《戀夏戀夏戀戀夏》、《喜上加囍》和《非誠勿擾2》等大片外，前年更獲導演徐克賞識，拍攝《龍門飛甲》，還憑內地電影《不怕賊惦記》首次踏足東京電影節紅地氈。今年五月，張馨予更獲張栢芝賞識邀加盟旗下，並開拍內地電視劇《裸愛》，力捧她成為女主角。
取笑Ron唔會有事 鎮宇：咁多空姐畀佢揀
吳鎮宇昨日為新劇《衝上雲霄II》試造型，而通告上顯示吳卓羲（Ron）亦是試造型演員之一，但因他身在廣州出席活動而缺席！問鎮宇最近有沒有見Ron，他說：「呢幾日都有見佢，佢冇嘢呀！同平時一樣，頭兩日（指分手）會好輕鬆，過幾日就會心掛掛，失魂落魄都係幾日之後先有，不過，佢拍新劇就唔會有事o架喇！咁多空姐畀佢揀。」昨日鎮宇為新劇試了四、五套西裝，他揚言四十集才試得四、五套屬於少，不過每套逾萬元都算揼本。
另外，無綫製作資源總監樂易玲昨日亦有致電Ron了解事件，但因他在內地工作故未能詳談。樂易玲接受電話訪問時說：「我會勸佢冷靜幾日先，畀心機工作先，利用呢段時間好好諗清楚想點，睇清楚大家嘅關係，可能會悟出更多道理，又或者事情會有轉機呢？其實大家都咁年輕，專心工作先，對大家都好。」
網友贈興：分手咪好囉
張馨予前日獨家向本報證實與吳卓羲（Ron）分手後，中港兩地不少網友均留言討論，正反兩面也有。有網民說：「呢頭唱K高調晒恩愛，嗰頭條女就話分咗手，想玩咩呀兩個！」有說：「分手咪好囉！之前唔講一齊，之後又補飛話一齊，見到都煩！」
亦有網民指吳卓羲是「傻仔」等，其中有網友在張馨予的微博留言：「雖然很想你跟Ron在一起，也很想他做我們昆山人的女婿，不過如果你真的是因為兩年了，他都不願意承認你，才跟他散了的話，我想可以理解你。」
Orignal From: 吳卓羲分手剖白：張馨予開心就足夠
沒有留言:
發佈留言