在討論區被稱為「法拉BB」的女神陳法拉，早已在三色台站穩陣腳，她想衝擊視后之餘，連最受歡迎女歌星都不放過！法拉口口聲聲講過沒野心，但自小是合唱團中流砥柱的她老早已發歌星夢，這個夢比立志當視后還要早：「我真係好鍾意唱歌，一早就想做歌手。從中學到大學，我都係合唱團成員，成日出去表演，真係好Enjoy！」
Solo展真我
合唱團跟Solo是兩碼子的事，法拉愛上Solo，是從合唱團開始的：「大學讀書好忙，但幾忙都要唱Choir！嗰時開始唱歌劇，有Solo成分，係我一生中最開心嘅時刻之一！」現實是殘酷的，入娛樂圈後，法拉1年拍最少3套劇，又要拍廣告及出騷：「早幾年真係忙到連食飯時間都冇，好彩有機會登台唱吓歌，開始有人知道法拉都唱得兩嘴！其實我做到歌手好講緣分，TVB一直都幫我搵緊唱片公司，而星煥又想簽歌手，唱片公司肯投放資源落我度，完全唔理賺唔賺錢，我知呢個機會絕不能錯過，錯過就唔知要等幾時！」
歌影視通殺
法拉以前只是唱別人的歌，如今有自己的歌，她興奮地說：「Feel Like爽囉！有自己嘅歌好似發夢！我知距離專業歌手仲有一段距離，但我以前唔係唔識做戲咩？都係咁練番嚟，我有信心做到！做演員係扮演其他人，做歌手先可以展現真正嘅法拉！」她認為成敗亦不在於賺錢與否：「係咪要啲碟好賣得、有Hit歌先算成功？如果唔作新嘗試我又點知自己可以做到？做歌手係一個夢，依家將夢想化為現實，我冇嘢好輸！」問到若演戲跟唱歌同樣做得好會如何取捨？貪心的法拉說：「有邊個天王巨星唔係兼顧幾瓣？好希望有一日可以煩惱取捨做演員定歌手，我會同自己講，兩樣都想要！」
後記：人靚聲甜
常說「人靚聲甜」，究竟樣貌標致的法拉歌喉怎樣？小記跟法拉打趣說希望她清唱，讓我錄音做電話鈴聲，她哼了一首《有隻雀仔跌落水》，高音甜中音準低音勁！這就成為了小記的電話鈴聲。
高大威猛的馬德鐘，睇得又打得，他飾演的「展Sir」入型入格，揸槍甫士有板有眼，皆因他曾是正牌飛虎隊！對於當年毅然放棄高薪厚職加入娛樂圈，他說：「警隊嘅工作太穩定，我怕悶！而且我已經試過唔同嘅崗位，例如G4（要員保護組）同飛虎隊等，當時我決心離開，如果唔係成世打死一份工！人生一定要多啲嘗試，我冇後悔過離開警隊！」至於飾演警察是否駕輕就熟？他坦言有壓力：「大家對我喺無綫劇集《飛虎》飾演嘅飛虎隊長官展Sir好有期望，好彩觀眾反應同收視都唔錯！」
霉到冇租交
離開無綫娘家大半年，有傳馬德鐘以約16萬元人民幣接拍一集內地劇，羨煞旁人。但原來他曾拖欠卡數、沒錢交租：「啱啱入行嗰兩、三年真係好難捱，工作量唔多，試過無錢交租，要周圍問朋友借錢。」曾兼職做搬運工人的他，坦言男人要有膊頭：「嗰時我做搬運工，每日賺幾百蚊，一出糧就即刻還錢！呢段經歷亦有助我演戲，雖然要喺娛樂圈成功唔易，但如果當初輕易成功，我又點會珍惜？」
相愛19年
馬德鐘與太太張筱籣風雨同路19年，是圈中模範夫妻，他更對太太作出愛的宣言：「好多謝佢一直不離不棄，當初仲支持我入娛樂圈，佢係我家人！就算遇到咩困難都會一齊面對！」問到如何維繫感情？他說：「我間唔中會煮飯畀佢同囝囝食，仲會買小禮物畀驚喜佢！我返內地拍劇，老婆會嚟探班，有空檔我會陪佢觀光，我哋賺錢都係兩份使！」他笑言現在是拍拖好時機：「囝囝已經14歲，好獨立，唔使我哋擔心，我同老婆多咗時間拍拖！」
後記：守時抵讚
警隊出身的馬德鐘非常守時，他於訪問前半小時已到達，而且不消兩分鐘就換好衫，專業態度令人敬佩！他笑言與多次合作拍劇的宣萱分外投契，皆因二人均是圈中出名守時及工作態度認真的人！
一心要在娛樂圈闖出一番成就的法拉，由拍劇到唱歌乜都肯試，好有鬥心！
由窮到燶到十幾萬拍一集劇，馬德鐘乜都經歷過，他笑言不怕變，最怕悶。
在《東西宮略》飾演鍾無艷的法拉（左），角色入晒屋。
麥長青跟法拉於2010年以大熱姿態分膺最佳男、女配角。
跟梁烈唯（右起）及羅仲謙等在《飛虎》飾演警察，馬德鐘駕輕就熟。
囝囝跟老婆都是馬德鐘（中）奮鬥及勇於改變的動力。
Orignal From: 陳法拉 馬德鐘Change
沒有留言:
發佈留言