2012年7月17日星期二

王菀之拍《老表，你好嘢！》鬼妹陳明恩廣東話拍劇

雞仔聲

一句對白 NG五次　王菀之衰誇張捱鬧

2012年07月18日

歌星齋唱點搵到食，點都要拍吓電影或劇集先入到屋，再賺登台、廣告錢。天生靚聲的王菀之（ Ivana）亦唔例外，出道 7年，早前做過舞台劇，最近終於殺埋電視，拍住王祖藍、郭晉安等好戲之人，處女拍無綫新劇《老表，你好嘢！》。

上星期首週開工即頻頻 NG，一句對白都要 NG五次，更俾導演當街鬧。講嘢唔掂，表情又浮誇，結果一個簡單 shot超時兩倍，拍足兩個鐘先完成。

導演訓話

你表情太誇喇！真實對白

拍完第一個 take，導演（左）即刻走埋去 Ivana面前：「你唔使咁大動作㗎！」 Ivana即刻點晒頭知衰。

私人化妝師

Ivana今次拍劇落重本，除咗有保母車跟出跟入，唔使同人迫無綫小巴，仲自備私人化妝師，盡顯一姐風範。

王菀之拍無綫新劇《老表，你好嘢！》

坐保母車

王菀之入行至今，演戲經驗唔多，除咗 07年幫森美小儀歌劇團拍舞台劇外（圖），上年亦同梁祖堯、湯駿業等合演《 I Love You Because》。唔知係咪拍得多舞台劇，做戲比較誇呢？《蘋果日報》圖片

33歲王菀之出道至今一直賣靚聲，上年一首〈水百合〉勁 hit令她有機會在紅館開個唱，又首度成為「亞太女歌手」。無綫錫晒，自然要報恩，今年王菀之趁 TVB花旦荒，失驚無神走去無綫拍新劇《老表，你好嘢！》做外援。

青筋演技

郭晉安，萬綺雯喺《老表，你好嘢！》擔正，二人喺劇中飾演社工，角色超正經，反而搞笑戲分幾乎全部喺王祖藍身上。論搶鏡度一定王祖藍贏啦！

拍劇新丁的 Ivana戲分唔少， 20集劇由頭帶到尾，仲同張繼聰、王祖藍有唔少感情戲，大玩三角戀。可惜 Ivana唱歌 100分，但做戲就未合格，開工即變 NG王。

上週四(12日)到觀塘取外景，該場戲拍攝 Ivana發現王祖藍偷琴，之後走出路口大叫：「佢偷咗我個琴呀！」簡單一句對白，但 Ivana演來吃力，破口大罵青筋現形，當場被導演埋怨：「唔使咁大動作！」亦話佢：「你表情太誇喇！」結果超時一個鐘先拍完。

鬼妹師妹撐場

王祖藍除在《老表，你好嘢！》幕前演出外，仲做埋編劇，亦搵埋編審。他亦搵曾經搞笑傳出是他老豆嘅黄光亮，加埋同門 100%西洋師妹陳明恩，雖然王祖藍表示唔係佢介紹陳明恩入無綫，不過當日見陳明恩同王祖藍雞啄唔斷。

演藝幫玩晒

新劇《老表，你好嘢！》除咗有王菀之外，亦有張繼聰、黃光亮等外援，但據知戲分最搶其實係第二男主角王祖藍，連第一男女主角郭晉安和萬綺雯亦唔及佢。事關今次王祖藍有插手編劇，事件更搞到一眾無綫編審、編劇發火，拒絕為王祖藍開工。激嬲班編審，演藝戲劇學院畢業的王祖藍惟有搵班師兄弟同學幫手，《老》劇編審龍文康正係電影及舞台劇在職編劇。幕前除黃光亮，亦搵埋教友兼鬼妹師妹陳明恩幫手。

幕前幕後都有自己友謢航。記者問祖藍是否搵自己友幫拖，佢就死唔認：「陳明恩唔係我介紹㗎，至於編審龍文康，佢係好出名，不過都係 TVB功勞，唔關我事。」唔敢邀功，費事再辣着 TVB編審啦！