主持﹕黃柏高 統籌﹕林永匡 協力﹕袁東亮、龍婉琪
三哥的專業態度與顧家的形象贏盡口碑，這次能夠成功邀請他出任為太陽金業集團的代言人，三哥實在是當之無愧。
勝任有餘
三哥﹕「初初收到電話時非常愕然，以為係搵我拍戲，殊不知係搵我做太陽金業嘅代言人，真係好多謝大家嘅賞識。能夠成為金業代言人當然非常開心，因為大家都知道，『賣金』最講誠信，所以能夠成為佢哋嘅人選，證明我嘅誠信實在不容置疑，所以我的確感覺好榮幸同開心，加上太陽集團的嘅實力非常雄厚，而且我自己對『金』亦有一定程度信心，認為『金』比股票來得更實際，值得向一眾投資者推介來投資，所以好高興能夠成為該集團嘅代言人，初初為咗套劇留鬚，仲擔心會影響做代言人嘅形象，點知大家仲讚好，覺得更專業，可靠。」
排山倒海
人人都讚三哥做戲了得，的而且確，睇得又演得的小生實在少之有少，難怪三哥的工作量排山倒海，廣告、劇集，一個接一個。
三哥﹕「早前忙於拍攝、宣傳廣告活動，而最近就去咗法國拍咗一個洋酒廣告，係關於白蘭地，對方仲話搵我嘅原因原來同樣係睇中我留鬚嘅形象。下個月月中至月尾(即8月)，就會同Bosco(黃忠澤)、Benz雄(許紹雄)返TVB拍攝一套新劇，到時相信會比較忙，而早前所拍一齣關於時裝警匪片嘅《雷霆掃毒》，就會喺9月尾見街，嗰齣劇會同林峯、吳綺莉、官恩娜、徐子珊及黃智賢等人合作，我喺劇內飾演行動組嘅高級督察，劇內會有唔少打鬥、槍戰場面。」
北上發展
出道三十多年，三哥的演技早已達到爐火純青的境界，就連內地的導演亦因為他的演技而頻頻向他招攬，據知三哥的最新力作更將於今年8月，在內地湖南衛視隆重推出。
三哥﹕「我一直都同內地有接觸，而且亦計劃再到內地開劇。其實，去年年尾所拍嘅《花開半夏》已經喺今年年頭拍完，呢套劇係內地嘅芒果影業聯同導演所拍攝嘅時裝劇，大概會喺8月尾，於湖南衛視播映。呢套劇係改篇自一套網絡小說，故事講述一對男、女年輕人自小已經係孤兒，長大後各自被命運安排而遇到唔同嘅挑戰，女主角後來遇到我，成為我嘅女兒，但後來竟然發現佢係我同前妻所生嘅真正女兒﹗當中好重戲味之餘，男女主角之間嘅感情線亦錯綜複雜，係一齣好感人嘅當地重頭劇。」
細心選擇
雖然人人都知道大中華市場是一個發展的好機會，不過最近的內地網絡爆破後，問題隨之以來，正所謂「見機行事」，三哥亦言明要細心挑選有實力的班底，才決定來年大計。
三哥﹕「o依家內地嘅市場好亂，所以會睇《花開半夏》呢套劇嘅收視、效果、市場反應等等再決定來年大計，由於早前大陸網絡價錢泡沫爆咗，好多搶得好高價錢嘅劇集已經開始調低，變相令到好多藝人接劇時嘅價錢浮動得好厲害，加上好多拍咗嘅劇集都未知會唔會播映，所以要睇定啲，要小心留意製作單位、劇本、實力、配搭等等再決定。」
Paco、苗僑偉
黃柏高
早前拍攝《雷霆掃毒》時有不少槍林彈雨的場面，難怪三哥笑言唔易拍。
Orignal From: 留鬚形象得廣告客歡心 苗僑偉：全靠大家賞識
沒有留言:
發佈留言