滾熱辣
爆三國結局 林峯篤馬明入獄
2012年07月13日
近年內地大熱的電視劇《步步驚心》、《宮》及《靈珠》等，大玩穿越時空橋段，熱潮南下香港，帶挈《回到三國》首集高開 34點（約 220萬觀眾）。 MK仔馬國明（司馬信）大鬥足智多謀的林峯（諸葛亮）。講頭腦梗係諸葛亮勝一籌，但講到溝女，馬明就勁過 chok峯。馬明仲爆雖然在劇中搞笑為主，但結局好悲情。佢同楊怡分隔兩個時空，再見亦是訣別時，已經是老人家的佢，心臟病病發，死在愛人前。
馬國明解畫：我幫諸葛亮做事，但加咗自己意見去做，搞到出咗問題，點知俾諸葛亮篤咗出嚟，搞到要入獄，想知我犯咩事大家自己睇啦！
兩做無間道
司馬信原本幫諸葛亮做事，但被諸葛亮判入獄。司馬信出蠱惑招逃獄，更憤而投奔曹操，加害諸葛亮。後來司馬信終明白曹操不可靠，在赤壁之戰時，他反充當二五仔，做無間道為諸葛亮提供情報。
唔少人覺得《回到三國》與《尋秦記》差唔多，不過古天樂 喺《尋秦記》有勇有謀，而我就一事無成，最想不勞而獲。有好多人陰諸葛亮，我後來做埋佢徒弟，就梗係要幫佢剷除 啲小人啦！司馬信覺得諸葛亮真人好型，所以劇中我成日都會話林峯好 chok。
拍攝時由於老臨罷工，所以劇中人山人海嘅場面都要出動電腦效果。不過呢瓣一向係無綫弱項，而首集出現嘅打機場面（圖），亦被觀眾寸爆。
唱情歌 冧女
在現代，司馬信愛溝女，去到古代一樣風流。佢教古代靚女唱英文歌，仲教佢 哋擺 pose扮可愛。司馬信性格跳脫又口花花，同嚴肅 嘅八股佬相比，自然成為女人蜜糖啦。
本着「認真就輸了」的司馬信，向來最叻在網上溝女，估唔到佢嘅溝女招去到古代一樣啱用。
馬國明解畫：我會唱〈 You are always on my mind〉同張國榮 嘅歌楊怡同班女仔。歌詞改編咗，但古代 嘅楊怡都係聽到一頭霧水，不過就好有喜劇效果。
重遇楊怡即死
司馬信最初以為自己一年後就可以返回現代，本住獵艷心態的他，一心諗住溝番件古代菜，於是向楊怡埋手。同楊怡一夜風流之後，司馬信卻始亂終棄。直至楊怡死心欲嫁人，司馬信至知道自己真心愛上對方。
司馬信要靠天文異象至可以穿越時空。他重返現代之後，好想回到三國，但要苦等三十年至有機會，最終他可以重回三國，並死在楊怡身旁。
馬國明解畫：個結局我都幾悲情 㗎！我返到現代後，一直都等機會重返三國。但當個機會 嚟，我已經六十幾歲，畫面見到我心臟病發死 喺楊怡身邊。拍攝時其實留 咗一 啲空間俾觀眾諗下，到時大家可以自行判斷我同楊怡係咪可以再續未了緣！
打電話問歷史
三國涉及好多大家耳熟能詳 嘅歷史大事，不過身陷三國的司馬信就唔熟歷史，遇到危急關頭時，要 send SMS向現代 嘅細妹司馬娟（樂瞳）求救，要佢幫手 check歷史。
馬國明解畫：我每次 send完訊息都會即刻熄手機，希望慳番 啲電，不過劇情去到一半時，個電話終於冇電，好彩有班古代朋友幫忙咋！咁多歷史場面當中，我覺得火燒連環船呢一幕 match得幾好，真假歷史夾埋一齊好配合、好有趣。
發現電話冇電，馬明眼都凸埋！
司馬信同司馬娟（樂瞳飾）已經成日靠 SMS通訊，回到古代嘅司馬信又只可以聯絡到司馬娟，於是阿妹做阿哥軍師。
林峯被迫納妾
司馬信向劉備獻計，話要同諸葛亮對親家，至可以碼住諸葛亮。劉備信以為真，於是把親戚糜玉（何傲兒）嫁俾諸葛亮做妾侍，令到本已自卑的諸葛亮妻子黃月英（梁嘉淇）更感不安。諸葛亮為了安撫愛妻，一度想離開劉備，和妻子歸隱田園。
司馬信一心想將何傲兒飾演嘅糜玉嫁俾諸葛亮做妾侍，諸葛亮唔單止拒絕，更令兩師徒關係決裂。
林峯解畫：諸葛亮雄才偉略嗰方面大家睇得多，今次我哋就用多啲筆墨去描述諸葛亮私底下嘅為人。劇中我嘅太太黃月英係一個病壞，所以成日要照顧佢，講我點樣去平衡同太太之間嘅關係。我需要一個賢妻，黃月英絕對係，成套劇入面黃月英係幫咗我好多，我哋之間嘅感情都幾好睇。
港男十八式
林峯爆料，話馬國明最煞食嘅「港男十八式」，其實由監製劉家豪度出嚟，加埋馬明生鬼嘅舞步，搞到林峯都忍唔住話：「演唱會真係可以考慮跳佢隻舞！」
馬明嘅現代人思想方式喺古代係唔 work，我同馬明思維唔同，我做嘅嘢佢唔明，佢做嘅嘢我更加唔明，會有好多文化衝突，都幾得意！我自己都係一個三國迷，今次劇情同歷史有少少改動，希望三國迷諒解，不過觀眾都可以重溫三國歷史嘅！
Orignal From: 爆《回到三國》結局 林峯篤馬明入獄
沒有留言:
發佈留言