2012年7月6日星期五

最好的時代最壞的時代陳展鵬

忽然1周第884期

單人訪

最好的時代最壞的時代　陳展鵬

2012年07月06日

最近，都在說回歸十五年。關於陳展鵬，也可以從九七說起。
那一年，他拍了《忽然丈夫》和《旺角大家姐》，看名字已知趕上「古惑仔」電影的尾班車。之後，簽約寶麗金（環球唱片前身），做陳曉東師弟。「點知九七之後，全部嘢冧晒！無碟出，無公司簽，無人影！試過窮到連街都唔敢出，因為個戶口根本無錢。」

陳展鵬

馬死落地行，「無碟歌手」後來連地盤都做過，兜兜轉轉，終於落腳亞視，又遇上沙士。「那時膽粗粗買了人生第一層樓，滙景花園，平吖嘛！ ○四年就賣，賺幾十萬。」大概，注定命不該絕。
○七年，環球金融風暴，一向不穩的亞視，更如打十號颱風。當時已是一線的陳展鵬，半年無工開。「所以好開心 ○八年可以返 TVB，我同自己講一定要搏盡，唔想返轉頭。」
接下來，你應該記得他做過幾年閒角、奸角、大配角，直至去年憑《真相》的律師一角跑出，最近在《衝呀！瘦薪兵團》首次擔正。「我知道自己幸運，人唔容易有第二次機會！未來希望再買樓俾屋企人住，不過依家『磚頭』實在太貴……」
是的，這是個「自由行」橫掃豪宅，「劏房戶」蔓延全城的時代；也是個維港煙花千金散盡，海旁遊行怒火街頭的時代。這，是我們的回歸十五年。

我蠢

娛樂圈從來跟紅頂白，我們也不例外。去年七月，《真相》剛出街，本刊跟陳展鵬做了三版專訪。一年後，他終於在新劇《衝呀！瘦薪兵團》擔正，換來的是六版長訪，還有訪問途中，不斷被少女盛女 OL師奶影迷認出，親熱地直呼「煎 Pan」（陳的花名），猛讚他做戲搞笑。
「呢一年出街，好多人搵我影相，同以前比，係零至一百的分別，好誇張！所以依家打完波，我會『嗱嗱聲』揸車返屋企，唔想俾觀眾見到自己頭髮蓬鬆、標晒汗個樣。觀眾想同你影相，一定話無所謂，但依家有微博、 facebook，我想自己每次出現，狀態都好一點！」
緊張，因為一切得來不易。
陳展鵬出身草根，爸爸是消防員，媽媽是車衣女工。自小無心讀書，熱愛運動，曾是香港乒乓波青年軍代表，參加過英聯邦比賽，要風得風。中學畢業後，考入無綫電視訓練班，才知道外面的世界，風有多大，醒了！
「其實入行兩年，已經無發明星夢。我蠢囉！最初又有點虛榮心，因為以前做開運動員，好似球星㗎！間間學校都知我係青年軍，攞獎牌，每次比賽有百幾人睇。

陳展鵬

「後來，讀完訓練班先發現，即使大家是同學，原來都好唔同！有人是經理人約，有人是歌星約，有同學好快有嘢做，但我就行行企企。好記得有次拍一場足球戲，導演叫我跌低俾主角過，嘩！我即刻覺得有無搞錯？咁假！好唔開心。那時十八、九歲，完全唔知工作是甚麼？社會原來不是只有我一個人的。」
如此年少氣盛，但竟讓他憑住當年圈中少見的稜角外形，拍下不少電影，又遇上 Blue Jeans的蘇德華，引薦入寶麗金，被捧為少年版劉德華，錄了幾首歌，找來徐子淇做 MV女主角。但萬事俱備，都敵不過九七效應。

當年，「千億新抱」徐子淇都為陳展鵬拍 MV。「子淇好靚好乖好斯文，媽媽管得好嚴，一定跟住個女，所以話嚴母出孝女。」

陳展鵬亞視年代，跟大自己十多年的陳秀雯做情侶，拍《愛在有情天》

亞視年代，跟大自己十多年的陳秀雯做情侶，拍《愛在有情天》，難得不覺突兀。「可能我個樣比較老成，又鍾意同前輩傾偈，所以成件事都自然。」

一千蚊

「最初好開心㗎！未出碟都已經有幾百個歌迷，出出入入又有幾個助手跟住。點知成個市好快就冧，翻版又勁，寶麗金同我解約，好長時間無工開。試過一千蚊用一個月，同女朋友出街都無錢，惟有在家煮飯食。不過香港女仔有情有義，無一個女朋友嫌過我窮，就算最後分開，都不是因為錢。
「由細到大，我未認過輸，但在這個圈『嘭』一聲就無影，自己開始會去諗，點解無公司簽？出活動無人影？只要認真去檢討，你就知道自己裏面根本空無一物，又無攞過任何獎，一切都是公司捧出來，根本無得唔認輸！好似打波咁，輸就是輸。」無飯開，地盤工都要做，一日賺三百五。陸續又有大陸劇、小本電影等零星工作找上門。
「後來碰到祥仔（黎耀祥），他跟我說：『你返電視台啦！是時候去學多一點！』那時 TVB無人搵我，就去亞視。」雖說樹大好遮蔭，但細台也有細台的好，人少資源少，戲劇旅遊飲食節目全部由你做，努力總會被看見。不過，可能要像陳展鵬，等足六年！
「 ○八年返 TVB，好多監製都話有睇我在亞視拍的劇集和節目，覺得陳展鵬有俾心機。」下的苦功，包括跟冼灝英師傅學武術，放假就煲碟。
「這幾年，我不斷諗，點樣可以改進自己？有錢可能買一套好一點的 golf棍，提升球技。換車，亦揀日本車，因為比之前的舊 Benz慳油錢，可以買多些衫，出來見人，好好睇睇。」

陳展鵬回歸 TVB，捱了四年，終於等到視圈挖角潮，小生買少見少，乘勢上位拍《真相》，同黃浩然扮正義律師

陳展鵬回歸 TVB，捱了四年，終於等到視圈挖角潮，小生買少見少，乘勢上位拍《真相》，同黃浩然扮正義律師

回歸 TVB，捱了四年，終於等到視圈挖角潮，小生買少見少，乘勢上位拍《真相》，同黃浩然扮正義律師，唔紅都難。「有段時間經常做奸角，放工之後，整個人都繃緊。但那些都是機會，無以前就無今日。」

師奶睇唔明《心戰》，陳展鵬的《衝呀！瘦薪兵團》就易消化得多，最高有卅點收視，他跟同樣曾為亞視人的田蕊妮，做宣傳都特別落力。

不足男友

為事業，費盡心神。愛情，注定要犧牲。去年，本刊率先爆出，陳展鵬有一位亞姐冠軍女友——姚佳雯。只是，愛原來已變成往事，繼陳豪後，陳展鵬成為 TVB內，另一陳氏「筍盤」。報稱「空置」，歡迎「落訂」。
「以前鍾意高瘦的運動型女仔，但依家想搵個啱傾啱講，是一種感覺！因為我發現就算搵到自己鍾意的類型，都未必可以長久，那不如放開一點，擴闊眼界。哈哈！不過女朋友最好都喜歡運動，大家有共同興趣會好一點，而且我鍾意健康女仔。
「依家無拍拖，但自己是個『先天不足』的男朋友。我願意凌晨三點收工，都抽時間見一見女朋友，食個麵，做甚麼都好。但有時忙起來，真的連傾電話都無時間，上一段感情就是這樣完結。或者，用訊息囉！不過我試過為工作，投入到連覆訊息都唔記得。由細到大，自己只要專心做一件事，是癲的！阿爸阿媽都知。
「好似十二、三歲時，就試過叫阿爸買好多大水喉給我做遙控車賽道，又日日夜夜研究摩打結構。依家？無玩咯！大個嘞，想儲錢再買間屋，安頓好父母。他們沒甚麼要求的，六百呎應該夠住了。不過依家『磚頭』好貴，成萬蚊一呎！慢慢儲囉。而且梁振英上台，又會有新政策……」
讓我粗略幫陳展鵬算算，就計買層六百萬的樓吧，付三成首期，即需現金一百八十萬。對報載三個月就跑夠五十萬數的他來說，指日可待。但對我等人工加幅追不上通脹，強積金又連年硬蝕的小市民來說……途長路遠！

陳展鵬前女友姚佳雯，是 ○八年亞姐冠軍。拍拖時，二人齊齊行商場購物，外形相襯。「是我沒有時間，性格都有點分歧。如果再拍拖，應該會公開。」拭目以待。

最近陳展鵬（前右）在長洲拍新劇《情越海岸線》，有傳同劇的李詩韻（前左）和李綺雯（後右三），爭相向他獻殷勤。「大家是朋友。不過有緋聞代表自己都有價值，唔過分的，我唔介意。」

偶像

提到今年七•一遊行，被萬民怒轟的梁振英，才知道他是陳展鵬的偶像。更正確點來說，是陳家的偶像！
「我細細個，阿爸已經好欣賞梁振英，認為他做事有目標，好掂！我覺得阿爸有眼光囉，呢十幾年就見到梁振英慢慢搞政治、入行會，再幫董建華，一步一步爬上去。
「我不是太熟政治，但在香港這個民主地方，如果呢五年是得的，就由他繼續囉。如果過分了，自然會有另一班人上。試一試啦！」
抱歉，本人對陳爸爸的眼光存疑，但我大概比部分香港警察，更記得基本法第廿七條：香港居民享有言論、新聞、出版的自由，結社、集會、遊行、示威的自由，組織和參加工會、罷工的權利和自由。所以，大家會看到以上一段陳氏父子的偶像論。只希望梁特首也沒有忘記，這短短的四十一個字。
否則，五年後的今天，香港人應該無心舉杯！想爆樽。