好男好女
等待高潮 梁琤
2012年07月05日
「打女」梁琤跟「模界」楊崢，經常被混淆。
我問一位九十後的朋友：「知道梁琤是誰嗎？」她說：「楊崢？」她從電視、雜誌上知道楊崢，但就不知梁琤是誰。不知道是正常，皆因她出道的那一年，朋友才剛一歲，而她近年在港的曝光率極少。
就連梁琤自己都說：「從來都冇高潮過。」出道廿一年的她說很想有部代表作，那團火「從來都冇停過！」
梁琤自覺幸運，「第一套戲已經係女主角。」但她希望有高潮來臨。
代表作
近年，香港藝人紛紛北上搵人仔，梁琤亦不例外，她更可說是較早的一批，「總之係啱我嘅角色，去到邊度我都做嘅，只不過係咁啱前一段時間，啲角色都係大陸演出多嘅，咁就喺大陸囉。大陸機會多啲就肯定啦，十三億人同八百萬人喎，錢就 OK啦，哈哈。」
錢是搵到，不過她自覺事業高潮、代表作通通欠奉，個人認為，電影《黑貓》是梁琤的代表作，但這是九一年的作品、亦是她第一部電影，出道廿一年，她仍然希望有部代表作，心中那團火，依然存在，「好坦白講，我暫時真係從來未覺得有個好嘅成績出嚟，除咗《黑貓》叫做大家認識嘅作品，仲未有一部俾到大家睇嘅好電影。因為我從來都冇高潮過，所以唔存在低潮呢個問題，哈哈。」
她在○四年無綫劇集《金枝慾孽》中不做打女，飾演弱質纖纖的福雅。
廿三歲的梁琤，一出道便奪得香港電影金像獎的「最佳新人獎」。
九五年因為拍《影子敵人》的爆炸戲被燒傷入院。
陰影
梁琤憑《黑貓》奪得九二年香港電影金像獎的「最佳新人獎」，以為從此一帆風順，但跟她簽了六年約的公司出現問題，令她不能夠外出拍戲，頓時令她由天堂掉進地獄，「有失望 㗎！因為啱啱撻起個火，之後又淋熄咗，唔係因為紅唔紅嘅問題，只係想繼續拍好多好戲，有喊 㗎！因為 嗰陣時唔係太多人可以問到意見，屋企同個圈又係另一個世界，我亦都從來唔會將唔好 嘅情緒帶返屋企。」
直至九五年，她因拍攝電影《影子敵人》的一場爆炸戲意外燒傷右手，休養了四個月，爆炸一刻，她以為自己人生跟事業都通通玩完，「嗰刻係好驚，如果我成身着晒火點算？ 嗰陣時啲火『蓬』一聲，正常反應係用手 冚住塊面，但我心諗：『如果冚住塊面，個鏡頭因為影唔到我個樣就嘥咗。』我就遞高咗少少手，就係因為咁我先至燒傷隻手。」
出了火場，她一第時間要鏡！「嘩！真係爆炸頭、我眉毛冇咗、眼睫毛冇咗，個嘴成個漢堡包，當時都未知道隻手有事，後尾先至知道，原來隻手成層皮甩 咗。」這次意外，令她留下一生不能磨滅的陰影，除了每次拍攝爆炸場面的時候，她都不停叫人小心點、要噴多點水，「而家一撻 gas爐着火，會驚，有種無形嘅壓力，會驚一撻嗰下，好似成座大廈都會爆，所以到而家我都係用電子爐。」
她一直有練習瑜伽和拉筋，拍起戲來更得心應手。
梁琤甚少傳出緋聞，○二年被拍得與男友揀窗簾。（《忽然 1周》圖片）
攝灶罅
梁琤是家中的大家姐，對下有三個妹妹及兩個弟弟，小時候父母在大埔開設租單車店鋪，中五畢業後，她在瑞士住過四年學法文，於九○年參加亞洲小姐而入行，今年四十三歲她仍是單身，她尷尬地笑：「呀，好醜呀，哈哈，剩番我未嫁得出，我阿媽 喺屋企已經有條灶罅俾我攝。」
細佬妹都已經結婚，所以她毫無壓力，拍不拍拖、結不結婚都沒有所謂，「我同阿媽講已經當 咗佢係我個女，以後佢嘅日子就由我去照顧佢啦。」
現時沒有拍拖，她笑說原因可能是打女形象深入民心，「唔知啲人係咪覺得我好打得呢？唔敢埋身呀，哈哈。好多時有啲新嘅男性嚟，大家識咗一段時間之後，跟住突然間問一句：『你係咪好打得 㗎？』咁我話：『咁你要唔要試吓吖？』佢話：『啊，唔使啦！』」
撰文：王健美
攝影：李敏軒
化妝： Be Kwok@ L B Make up
髮型： Bux Sheik@Hair Corner
服裝： MODELE de PRUDENCE
場地：都會海逸酒店 Harbour Club
Orignal From: 等待高潮 梁琤
沒有留言:
發佈留言