最近在無綫劇《衝呀！瘦薪兵團》中，阮兆祥不再獨沽一味做扮嘢能手，而是與陳展鵬、田蕊妮和陳智燊道出打工仔的故事，引來不少迴響，收視也不俗，他說：「今次成個過程好開心，劇本好完整，又有啲新衝擊，我覺得有新火花，好多人睇完都覺得好笑。好似有日去做家燕姐嘅訪問，搭見到媽媽拖住兩個小朋友，佢叫小朋友快啲同祥哥哥加油，仲話恨咗好耐，想睇一啲可以一家人一齊睇，又有共鳴嘅劇集，呢個迴響好大。」
阮兆祥有一個願望，就是飾演勇猛幹探，可惜他的搞笑形象太深入民心，暫時未有這個機會。
祥仔訪問期間鬼鬼馬馬，動作多多。
阮兆祥（中）和陳展鵬（左）合演的《衝呀！瘦薪兵團》，收視不俗。 劇照
福祿壽再賀台慶
除了觀眾認同外，難得的是該劇令一班演員更團結，祥仔說：「家我哋成班同事喺電話搞咗個群組，有好緊密嘅聯繫，有時我哋一個人打拼會好孤獨，會有迷茫同冇方向嘅時候，又唔知自己做得啱唔啱，我覺得同事之間係應該咁做。」扮嘢工夫了得的祥仔，原來一直有個期望，就是想做些特別的角色，他說：「我試過問監製可唔可以做勇猛幹探嘅角色，點知佢哋話你做喜劇啦，你做唔掂先再諗轉型，我仲期待緊，但唔會主動要求，如果佢哋覺得啱我做，會主動搵我。」看來祥仔想擺脫搞笑框框，也是困難重重。
提到祥仔，總會令人想起令他事業突飛猛進的福祿壽，他說：「我成日都覺得係天賜畀我嘅禮物，好似做咗老竇突然間多咗個仔咁，突然將我哋三個擺埋一齊，你知同人合作係幾難，今次係撞啱幾個都係唔計較，又肯畀心機嘅人，三個人三個腦，好多嘢要三個人一齊同意，到家大家嘅默契同合作都唔錯。」
年初在演唱會上宣佈解散半年的福祿壽，最快會在9月重組，暫時計劃做四集台慶版，台慶當晚更會有特別演出。祥仔稍後也會參加湖南電視綜藝節目的比賽，莫非趁機進軍內地？他笑說：「我又冇諗喎，人大咗睇嘢嘅角度都唔同，以前希望每一樣嘢都唔衰得，一定要贏。家反而希望享受過程，如果過程覺得享受咪得囉。」
（左起）李思捷、王祖藍和阮兆祥的福祿壽，令三人事業更上層樓。 資料圖片
輕得失重視過程
祥仔續說：「家工作方針希望做好啲，唔好太重視得失，睇吓呢個過程有冇學識啲乜嘢，唔好成日想做到最前、做到最好。呢個擔子曾經令我好辛苦，有好多嚟自唔同地方嘅壓力，成日皺埋眉頭去諗嘢，祖藍見到叫我放鬆啲，佢點醒咗我，得唔得係冇人知，如果你成日記住得唔得，係好辛苦，成日都會有啲無形嘅壓力壓住自己，好多嘢你得未必一定好，唔得都未必係壞事，好似選港姐同新秀，落選唔一定係壞事，可能成就仲好過得獎嗰個，我好多謝祖藍畀咗呢個解決方法我。」
攝影：陳俊強
髮型： Eddy Kwong of Salon Square
服裝： RMC
愛情長跑 等奉子成婚
向來低調處理戀情的阮兆祥，與女友 Crystal拍拖多年，雖然早前他與何傲芝傳緋聞，但已雨過天青，祥仔最近更透露有結婚計劃，問到婚期詳情，他笑說：「定咗日子，年份未定，若然未到，時辰未到，曾志偉喺天明個婚禮度講，佢話有兩件心事未了，一個係錢嘉樂，一個係阮兆祥，如果呢兩個人肯結婚，就了咗呢件心事，佢出動呢張牌嚟大我，唔係打動唔到我，係未有呢個計劃。」
祥仔和女友拍拖12年，提到婚期，他笑言：「定咗日子，年份未定。」
何傲芝和祥仔早前一度傳出緋聞。 資料圖片
「要好周詳」
祥仔續說：「最初同女朋友約定，有小朋友先結婚，不過有咗小朋友好多嘢唔同，要全副心機畀晒佢，我家連瞓覺嘅時間都唔夠，又唔想女朋友一個人照顧，真係要好周詳。我覺得最緊要係要感情好，結婚只係一個形式，畢竟我哋都一齊十二年，呢個紀錄都唔錯，十二年都冇換畫，係咪值得信任先？」
Orignal From: 有話兒：阮兆祥幹探夢凍過水
沒有留言:
發佈留言