2012年3月17日星期六

黃金視窗：馬國明遲來出頭天

在剛剛大結局的無綫劇《 On Call 36小時》中，馬國明（馬明）飾演的張一健叫好又叫座，人氣急升。藝員訓練班出身的馬明，做過甲乙丙沒名字的角色，又試過穿道具戲服扮「小強」為黃子華的《藍天》拍 MV，直到近年所拍的劇集，先後獲讚賞，令他的演藝事業漸露曙光。捱足 12年的馬明坦言：「我冇諗過有呢個成績，成功與否唔係自己一個人嘅努力，仲有好多配合。」

入行 12年，馬國明坦言畀心機之餘亦要靠運氣，終在事業上有所成就。　攝影：陳慧安

談到今次張一健的成功，日前馬國明接受訪問時說：「初初真係冇諗到會有呢個成績，呢個角色同我以前嘅比較，其實都係啲斯斯文文、性格上又冇乜特別，但係嗰陣時睇劇本覺得好好，聽故事嗰陣都有啲眼濕濕。」

馬明續說：「雖然我好鍾意，但唔敢有好大期望，好似之前有好多係劇集受歡迎多過我，點知今次出嚟，感覺多咗好多觀眾鍾意睇馬國明。」

楊怡與馬國明於《 On Call》有情人終成眷屬，觀眾當然叫好。　劇照

馬國明在《 On Call》飾演醫生，觀眾十分受落。　劇照

捱足十二年

事實上有網友大讚馬明今次的演出，可惜他正趕拍《名媛望族》的關係，仍未認真看過自己的演出：「可能今次嘅角色唔使再扮仔，係比較成熟，接近我現實嘅年紀，德哥（監製潘嘉德）覺得外型同性格都幾啱我做，咪搵我拍，我入行到家拍咗三套德哥監製嘅戲，收視同口碑都唔錯，佢讚我越嚟越好。」
不少前輩曾說最少要做十年才可登上小生的位置，馬明捱足十二年，現階段在事業上終於有所成就，他覺得心機和運氣不可或缺，最重要亦要視乎對娛樂圈的興趣，他說：「好坦白講，如果我今時今日都仲等緊機會，都唔知會唔會捱落去，呢行真係唔係易捱，除非你好好運，一出嚟就順風順水，不過通常都冇，唔知幾個人裏面先至有一個。」

馬國明與一班新人演的實習醫生，成功為劇集帶來新鮮感。　劇照

馬國明當年參與吳鎮宇孭飛的《衝上雲宵》，同劇的吳卓羲、黃宗澤、陳鍵鋒早已獨當一面。　資料圖片

老戲骨難求

即使事業有起色，馬明直言不會有飄飄然的感覺：「我都三十幾歲人，唔會突然間有呢個感覺，就算信心亦唔會特別多喎，咪同平時一樣，拍戲唔係次次都係做張一健呢類角色，一定會有其他嘗試，每個角色亦會有唔同特質，都係要同導演、對手研究。做戲同唱歌做運動一樣，你呢場做得好，唔代表下一場都係，都係要自己畀心機。任何比賽都唔會成日贏，一定會有輸嘅時候，打得唔好咪輸，做人都一樣，只要能力範圍做好，成功與否交畀個天。」
隨着免費電視台的數目增加，無綫台前幕後一度受挖角潮影響，無綫已經力谷藝員上位，亦在製作上投放更多的資源，可惜最近不少資深的老戲骨相繼離巢，馬明亦有感而發說：「我以前做訪問都曾經講過，小生唔難搵，喺訓練班搵啱人選，度身同佢拍兩、三套劇集，再搵啲老戲骨撐住佢咪冇問題；反而做咗二、三十年嗰啲老戲骨難求，呢班人真係好緊要，冇咗就冇咗，對拍戲多少都會覺得麻煩，如果一個主角嘅屋企人，全部都係特約同臨時演員都幾驚，好多嘢靠一個人係做唔到，冇咗互動同熟悉嘅面孔，觀眾都要去調節。」
凡事有弊亦有利，人事上的衝擊造就不少上位機會，馬明說：「好似《 On Call》有好多新人演出，我成日都同佢哋講，叫佢哋要畀心機，因為走咗咁多人，多咗好多機會，家係睇吓邊個畀心機做戲，只要你把握到每個角色，工作量就會越嚟越多，監製好實際，佢哋唔使你送乜嘢畀佢，因為佢要人拍戲，只要你 OK交到貨，下一套咪會預埋你囉。」

在無綫打滾多年，馬國明曾與郭晉安扮女人拍劇集《同撈同煲》。　資料圖片

馬國明坦言與松哥（中）拍《蔡鍔與小鳳仙》時，藉機向他偷師學做戲。　資料圖片

馬明又說：「呢度唯一係叫穩定，無綫呢度係一間好學校，就算你初頭出嚟拍得幾差，都會 keep住畀你拍，等你磨練吓再等吓一個機會，唔會冇嘢畀你做，只不過係學滿師啲人走咗。」

向松哥偷師

笑問他又是否已經學滿師？馬明笑說：「我唔知呀！呢啲要人哋話，唔係自己講，你問我會覺得仲有好多嘢可以再進步，松哥（劉松仁）成日都講呢行係無止境，佢到家都唔係百分百有信心做好每一個角色，佢仲話千祈唔好覺得自己得，得嗰個死嗰個。」
馬明還笑說：「之前同松哥拍《蔡鍔與小鳳仙》，已經喺佢身上學到嘢，今次拍《名媛》仲學得多，你睇到佢點做，點樣攞到個方向，我呢啲醒目仔袋咗好多錢落袋！」被笑稱是「遲來的醒目仔」，馬明亦不禁笑說：「遲到好過冇到，好多嘢係講因緣際遇，做咗咁多年都好認命，好似我上年全年都係做緊啲奸奸哋嘅角色，今年《 On Call》做忠嘅角色又有新鮮感，連帶啲做好 fresh嘅實習醫生，亦畀咗好多新鮮感畀觀眾，如果我一路 keep住做同一類角色，可能呢個角色嘅迴響冇咁大。」