2012年3月20日星期二

天生不是鐵娘子陳敏之

FACE週刊第252期

面對面

天生不是鐵娘子　陳敏之

2012年03月21日

女人的強硬總是比男人耀眼，尤其是身高 5呎 8吋、擁 43吋長腿的陳敏之，天生懾人的氣勢，加上說話語調從不矯揉造作，看外表壓台得很。去年她接受訪問，剖白前年飽受傷病折磨，從而道出十多年來胼手胝足的養家辛酸，女兒心堪比百煉鋼。

自劫後餘生，陳敏之便脫胎換骨了，更洞察世事。

天生不是鐵娘子　陳敏之

「 10年發生嘅事畀咗個 sign我，原來身體好緊要。
呢個教訓令我知道，以後我要點樣行呢條路。
我好感恩，病完之後又可以攞到獎，覺得係一個安慰，辛苦咗 10年，終於得到大家認同。」
以為當下一個踉蹌，就失去平衡栽下，反而摔掉過往捨本逐末的看法。
33歲才大器晚成，演藝事業如女人的青春一樣可以稍縱即逝，一刻值千金啊！然與年長 7歲、燈飾商人男友 William拍拖 6年多，此時又正值上位之秋，會否有誤婚期？

「始終婚係會結嘅，但真係暫時想做嘢先……公司又畀好多機會，唔想嘥咗。」

曾被 Lady Gaga形容為「自己唯一的對手」的 Adele，取得 6座 Grammy Awards後，便宣布「急流勇退」，用 5年時間來談戀愛去了。

甫至花旦之位的陳敏之，當然不能相提並論，不過，所有的女人在愛情的面前，都是一樣的卑微，恨不得低到塵埃裏去，管你天生是銅皮鐵骨。

生銹女鐵人

2010年前， 14歲當 model入行的陳敏之目標清晰，就是努力賺錢養家和當上女主角。 2010年，她拍攝《公主嫁到》因頭飾過重而弄傷頸椎；其後，《怒火街頭》的一幕追賊戲令她撞斷鎖骨。禍不單行，在家養病期間，又發現腎功能出問題。當時的她，已作最壞打算。「媽咪都有叫我唔好做，最多大家辛苦啲。但等到自己好番之後就冇當一回事，因為唔想收番屋企人嘅嘢。其實簡簡單單都有一餐飽飯，但係當你畀慣一啲好嘅嘢畀佢哋，突然要向佢哋收番，我就點都唔想！」幸好否極泰來，休養後撿回小命，還憑《怒火街頭》的一樓一「索腿天后」貞貞一角，贏得「最佳女配角」獎，全速往一線花旦之路進發。

「身體係好番，但傷過始終傷過，我一直都 keep住驗身，差唔多 2個月就驗一次。如果我捱夜、食錯嘢、食鹹呀辣呀，腎又會出事。當時拍《東西宮略》都驚㗎，由 06踩到 28，祈禱時都話唔好死呀！但同自己講 miss咗機會，就唔知呢世人幾時再有。其實《東西宮略》係一個指標來 test自己做唔做到 main cast。拍古裝最辛苦，惟有自己乖啲、食清淡啲，爭取時間瞓。捱得過以後就咩都得，原來我咁樣 take care身體就 ok。以前乜工作都做，搞壞身體，家就睇住身體先，自己知自己事。」

像我這樣的一個女子

陳敏之跟我說「原來做主角好過癮」，當然啦，加入無綫 10年首次擔正，在《東》劇中扮演美女夏迎春，跟收視福將郭晉安作對手戲，上星期一幕「口咬提子」輕易成為話題，看來比刻意扮醜的陳法拉更搶眼討好。但下筆之日，兩位女主角不和的消息再升級，媲美戲中兩宮爭寵。

「不和報道真係當宣傳。我同法拉性格唔似但好夾囉。睇我微博都知，又同佢慶祝生日、又一齊食飯，不和又點會做呢啲嘢呢？咁我覺得法拉係一個好叻嘅女仔，煮餸又叻，最近先煮咗餐西餐請我食。佢邀請我去佢屋企，由買材料到煮，一手一腳整咗一個西餐出嚟，好有 heart。……拍《東西宮略》我受傷嘅（化）妝其實係佢幫我化，連特技化妝都識，甚至佢嘅（古裝）頭都係自己 set。……我由佢選完華姐之後就認識，一早已經知佢會紅，又叻又有語言天分，靚女又身材好，本身人又好。」孰真孰假，不得而知了。但陳敏之在 TVB出名人緣好，不少合作過的藝人都成為好友，如黃日華、苗僑偉、楊怡和林峯，還有陳志雲。

之前我訪問郭晉安，問到《東西宮略》的是非，他說：「敏之諗嘢簡單啲，笑就係開心，開心就要笑。報道講嘅所謂崩潰可能只係一刻，我見佢第二日返嚟又嘻嘻哈哈話要化靚個妝。」而當事人則自辯：「我冇崩潰，冇匿喺廁所喊，有壓力都係想件事好啫。今日做完嘅嘢，放低咗就算。以前都會好緊張嘅，但自從大病之後，就學識有啲事搵人幫啦，自己唔好咁辛苦。

陳敏之在《東》劇任女主角之一，「今次差唔多場場都有好重戲分，一來緊張自己身體；二來原來做一個帶頭嘅人好緊要，好有壓力㗎！」

本週播放的《當旺爸爸》，陳敏之應監製梅小青邀請客串蕭正楠女友一角，「小青姐話想延續《公主嫁到》裏面大公主同大駙馬的感情喎。」

自 06年起陳敏之不斷獲提名，直至去年《怒火街頭》奪「最佳女配角」獎，得獎時又喊又笑，表情豐富。

雖貞貞一角已於《怒火街頭》中被殺，但陳敏之在《怒火街頭 II》中仍獲邀請客串，以作交代劇情及紀念。

99年陳敏之（左二）成為小室哲哉在香港的 5名徒弟之一，花了一年時間卻最終出不成唱片，幸好 01年被介紹入 TVB工作。

「其實我都唔想大家只覺得敏之係靚嘅。要靚好容易，叫人幫你扮到好靚就似個美人。所以當《怒火街頭》叫我做一個性工作者時我好開心，貞貞係好靚但係好另類。自己都想有人搵我做一個賣 CD、 DVD…… down to earth嘅角色，我成日都做一啲千金小姐、有錢女、刁蠻公主。可能因為外形，但實則生活上我唔係一個有錢女，只係一個出生小康之家，我都係自己去賺錢、一手一腳建立自己嘅事業。我點樣捱呀、病呀、整親、要點樣企番起身，其實都可以係一個故仔囉。」
說罷敏之還向我扁嘴投訴：「有好多朋友未認識我，都同我講過『你都係賺錢買花戴嘅』、『你都唔使辛苦㗎啦』！」

等嫁的女人

這樣美麗又殘酷的誤會，對自 03年任職裁縫的陳父因肺病急逝，身為長女的她迫不得已擔起照顧母親和弟弟後，更見諷刺。
「家我收入係多咗，搞掂層樓，但我一樣幫阿媽租緊屋住。我都想阿媽唔使做（任職保險公司）歎世界，有工人畀佢用、有屋佢住，衣食無憂；而細佬就等大學畢業，搵到份好工。但自己又未叻到同阿媽講「你唔好做，等我養」。等細佬接棒養家好難，家大學生想搵 1萬元都好難，自己都未夠使，點搞得掂屋企吖？我都唔想畀佢咁大壓力，咁都望佢叻仔搵到，如果佢搞得掂，就一定要佢負責一啲。佢又未捱過，我諗都係我孭，好難交咁大個波畀佢。」
畢竟兒孫自有兒孫福，我問敏之會不會太過保護弟弟？
「唉，其實都會嘅，但我性格係鍾意保護人，始終對爸爸有一個承諾，就一定會照顧佢哋。我望都望佢（弟弟）養我，現實歸於現實，真係好難。寧願等佢賺到，先叫佢照顧媽咪。我係錫細佬，有時都會諗會唔會縱壞佢，不過都冇辦法，我同佢相處時間又唔多，又唔可以成日同佢傾偈，自己都係最多一個星期返去食一次飯，又要撞啱細佬喺屋企。自己惟有努力搵錢照顧佢哋，畀佢哋過好嘅生活，呢個係我做大女嘅責任。所以我只要細佬讀好書，就當報答我。家姐又讀得唔多，自己都會後悔如果以前讀好啲書，家都會好啲啦！」
一家三口總算盼到曙光，而女兒家的幸福，陳敏之也緊握在手。以前絕口不提的男友 William，也公開認定對方為終身對象。「因為之前做專訪主要圍繞病同受傷……都會提到男朋友，我覺得嗰一刻要多謝佢，因為佢真係對我好緊要，而我又覺得應該要對佢講多謝嘅說話，於是變相好似承認呢一段戀情囉。其實我一路都唔鍾意講感情嘅。」之前有報道指 10年大病打亂二人翌年結婚計劃，問陳敏之怕不怕將來忙得工作蓋過感情，她想了一會才說：「我唔係延遲咗婚期，而係個 plan要再打後。因為籌備一個婚禮都要幾長時間，自己又想完美啫。」她解釋和男朋友有共識，目前二人專心工作，難得對方家長沒向她催生。

陳敏之一向與母親關係親密，從病發到癒，陳母亦陪伴左右，「我拍《東西宮略》時日日都叫助手去我媽咪度攞飯餸畀我㗎！」

陳敏之男友 William比她大 7年，於觀塘經營燈飾生意，二人現時已於清水灣半島共賦同居。《壹週刊》圖片

「我家要諗調理好身體先，啱啱先好番，之前又食咗太多西藥，有咗小朋友都唔好。我覺得過多幾年唔算遲，我想生個健康嘅 BB。以前會幻想自己有一仔一女就 perfect，但家覺得有個咁嘅身體，能夠有一個健康嘅 BB我已經好滿足。其實我好鍾意女㗎，因為覺得女仔會孝順啲。」所言甚是。

真的女子

在訪問中，話題觸及本刊之前一篇關於陳敏之的報道，其中形容她奪獎反應的一句話，她深覺受辱被欺而與我齬齟：「我覺得大家可以溝通，呢個訪問 even我點答，你想寫衰我都得，要我同你好假都得，你要點寫我控制唔到，所以我唔需要同你假！其實你哋咁寫我會唔開心……
「大家都係搵啖飯食，但我都會話你聽點解咁寫我，點解咁衰，我覺得講出嚟好舒服喎！好過呢頭同你嘻嘻哈哈做完訪問、呢頭背後話本雜誌真係衰呀！如果你覺得陳敏之好真，咁咪好囉，但如果你覺得唔鍾意我咁講，我都接受。我覺得做人要真，先會得朋友信任。」我相信啊，這個時刻的敏之，是脫下了所有偽裝的最真實的、也最強悍的。

天生不是鐵娘子　陳敏之