將步入廿四年華的「龍女」何傲兒（Lily），轉眼已入行五年，由最初在劇集演「過鏡」角色，到開始獲加重戲份，去年更擔綱演出處境劇《誰家灶頭無煙火》，成為人生轉捩點！劇集播放期間，她幾乎日日跟觀眾「見面」，加上角色討好，贏得一班師奶青睞，成功入屋。Lily直言過往演出的角色，大多屬性格單純，跟男主角的感情線單線發展，直至最近參演新劇《雷霆掃毒》，飾演黃智賢的女友，首次發展複雜的多角戀：「我喺套劇度演一名社工，係一個好好嘅女朋友，但黃智賢唔珍惜我，後來仲飛咗我！」她笑言現實生活中從沒有被飛經驗，所以要問朋友攞靈感！
父母擔心冇人要
劇中另一突破，Lily要首次演出床上戲，讚黃智賢表現專業，絕無尷尬氣氛：「其實我哋只係喺張床度傾偈，我就露出膊頭，之前最激都係同陳智燊拍咀戲，所以呢套劇好多嘢對我嚟講都好新鮮！」但自言現實中並非黐身女友，認為拍拖最緊要有私人空間，仍然單身的她正物色「筍盤」，但向來對其戀事不聞不問的父母近來亦開始憂心忡忡，Lily說：「佢哋無啦啦好關注我嘅感情生活，鼓勵我識多啲朋友，唔好淨係識公司啲人，要擴闊吓個圈子，可能驚我大咗冇人要！」
忙於拍劇的Lily近來亦參與多個旅遊節目，今年初還踩入主持界，擔任晚宴主持及唱歌，並向主持經驗豐富的姐姐何傲芝取經：「平時有上堂學主持技巧，但好多嘢都要累積經驗，有時會請教家姐，會諗吓如果係佢嘅話會點處理，令自己做得更有信心。」她最想爭取多些返內地登台，除了收入可觀外，內地粉絲多數亦很熱情，慶幸沒有做出瘋狂行為：「我每次去佢哋都會送禮物畀我，仲有個佛山粉絲由我選港姐就開始支持我，好多年喇！」跟很多藝人一樣，Lily很想返內地拍劇，相信有助事業更上一層樓。
留守娘家等機會
隨着愈來愈多的免費電視台啟動，公仔箱大戰一觸即發，不少藝人被挖角，但Lily決定繼續留守無綫大本營：「自己唔諗咁多，同公司仲有咁多年約，公司畀好多機會我，都係做好依家嘅嘢先，好多嘢都唔到我諗。其實競爭每日都有，我會祝福離開咗公司嘅舊同事，希望佢哋喺第二度有更好嘅發展，世界係圓嘅，可能第日會一齊再合作！」未知是否受「世界末日論」影響，她坦言對很多事看法已大不同，以前對很多事都愛理不理，但最近就事事上心，思想亦變得成熟。
後記：減得就減
跟不少女生一樣，Lily視減肥為一生的使命，特別是夏天臨近，更加唔減唔得：「其實我有諗過，如果我唔係做呢行，我可能會再肥啲，因為想上鏡完美啲，我先有動力逼自己節制飲食！」她認為最好的減肥方法就是排毒減肥，試過只飲不食兩日就已減了七磅！
何傲兒感激公司支持，暫不打算離巢向外闖。
何傲兒（左）、何傲芝（右）家有主持達人何傲芝，何傲兒亦朝該路進發。
何傲兒遭陳智燊奪去螢幕初吻，令她難忘。
何傲兒（左）曾與佘詩曼做對手戲。
雖港姐三甲不入，但相比下何傲兒發展更佳。
何傲兒寄望公司安排更多北上登台，開拓內地市場。
何傲兒入行至今一直Keep Fit，身形未見走樣。
處境劇＝最佳溫室
「公仔箱」藝人眾多，要衝出重圍絕非易事，其中拍攝處境劇便是一個很好的踏腳石，皆因能夠於黃金時段日日與觀眾見面！
陳茵媺
06年港姐冠軍陳茵媺，初期主要為綜藝節目擔任主持，直到08年開始拍劇，並於處境劇《畢打自己人》飾演「陳寶拉」而為人熟悉，翌年更於台慶頒獎禮中奪「飛躍進步女藝員」。
鄭欣宜
唱歌出身的鄭欣宜在樂壇成績有目共睹，近年亦參演處境劇《畢打自己人》，令人開始留意其演技。其後，她獲邀參演多套電視劇，於賀歲電影《72家租客》及《我愛HK開心萬歲》亦有戲份。
龔嘉欣
龔嘉欣入行時以擔任主持為主，08年參演電視劇《盛裝舞步愛作戰》後活躍於電視圈，去年參演處境劇《誰家灶頭無煙火》，成功吸納一班忠實粉絲，於《我的如意狼君》中亦有不俗的表現。
Orignal From: 增值做主持迎電視大戰 何傲兒處變不驚
沒有留言:
發佈留言