伸縮功能
木偶鼻離奇短咗 楊怡：假鼻？我呼吸到喎！
2012年03月21日
楊怡同馬國明 孭飛 嘅《 On Call 36小時》上週大結局高收，一件頭馬明憑癡心冧爆求婚，成功追貼陳豪，成為全城第二筍盤，贏盡女粉絲心。
至於女主角楊怡，始終個鼻先最惹人關注，最神奇係有網友發現楊怡木偶鼻最近停止發育，仲離奇縮短。雖然楊怡神奇鼻可長可短，不過楊怡一於少理：「假鼻？我呼吸到喎！」
上週《 On Call 36小時》大結局，結局娘到震大團圓，師奶最 buy，平均收視 37點，最高 39點。馬明一劇上位，反而女主角楊怡，網民最關心佢個鼻多過演技。
'12 3月縮水
週一楊怡以《名媛望族》造型出席影視展，靚鼻依然挺直，不過鼻頭明顯冇咁高兼縮短咗。
「人唔假就得！」
32歲楊怡靚鼻離奇變大，《 On》劇上映期間，已有唔少網友用假鼻去形容楊怡。不過最近忙住拍新劇《名媛望族》的她，木偶鼻突然停止生長，仲忽然縮水有回復原形趨勢。
對於木偶鼻時大時細，上週六（ 17日）本刊搵楊怡回應，以往 嘅佢一問到靚鼻問題，會主動叫記者鍊鼻，不過當日楊怡不單止冇叫人鍊鼻，仲死都唔肯拍下側面照，似乎唔想靚鼻過分曝光。她說：「唔想再回應喇，我當笑話聽就算。（好多網友用假鼻形容你喎！）假鼻?我呼吸到喎！最緊要個人唔假， 啲戲唔假咪得囉！（最近個鼻好似短 咗，鼻頭細 咗喎！）吓？今次又細 咗呀？咁下次會唔會話我下巴尖 咗、個胸又大 咗、個籮又圓 咗呀？（即係有冇整番細？）唉……真係講得太多，我唔會再回應喇！」只要你唔再發育，網友咪冇嘢講，你咪唔使回應囉！
'11 9月最彎
楊怡近年唔只個鼻再度發育，面形和下巴亦比之前更加突出，起晒角！
唔肯影側面
最緊要啲戲唔假咪得囉！（真實對白）
上週六（ 17日）楊怡為《名媛望族》開工，回應「假鼻」傳聞；不過一見攝記舉機，即保持正面，好難得之下先影到張側側哋。
楊怡未算大富大貴，不過亦有兩樓揸手， 09年以 617萬買入日出康城，現升值至 650萬，加埋同胞姊楊娜 02年買入嘅將軍澳中心，掂過「缺宅」馬明喎！
黃偉傑醫生
透明質酸開始溶！如果想整長個鼻，通常會用透明質酸打入個鼻樑度，不過效果就維持 6至 8個月左右啦，身體吸收後，就回復原狀要再打。如果突然變短，或者鼻頭突然變細，可能就係透明質酸開始溶；又或者佢打咗溶解劑令佢變細。
整容達人 DonDon
3至 6個月會縮番！整鼻通常得兩種，一種係植入假體、一種係透明質酸，咁通常都係打透明質酸。因為就算效果唔好都可以用溶解劑搞掂，做完手術大約腫兩個鐘就得㗎喇，價錢大約 8,000至 10,000蚊左右啦，不過 3-6個月會縮番。想維持嘅話要再打，如果係鼻頭變細有可能係透明質酸冇咗；亦有可能係開刀做手術。喺鼻頭入面開兩刀，割走啲肉咁就細啲喇，價錢大約 15,000至 20,000蚊度啦！
《 On Call》收得添食
《 On》劇收得，下週三（ 28日）梁乃鵬博士、無綫副主席會再請食飯，續集基本上開得。
《 On Call 36小時》咁收得，加上結局入面，楊怡個病未好番，仲有幾 pair情侶未埋單，劇情有排發揮，續集應該開硬。上週六（ 17日)楊怡和馬國明出錢慰勞一眾台前幕後，監製潘嘉德雖然開心，不過亦有少少愁，他說：「希望開到續集啦，不過亦未必係我開，都係等公司安排，我都係適合拍啲廿零集嘅劇。（《衝上雲霄 2》唔係你監製咩？）唔係我呀！邊個開都得㗎啦！我嚟緊開《巴不得媽媽》，由 Lisa姐搭黃淑儀、羅仲謙配黃智雯。都係廿集，呢啲啱我㗎喇！」
胡定欣繼續冧馬明
馬明、胡定欣雖然分咗手，不過大結局馬明向楊怡求婚冧到全城剩女師奶激讚，身為馬明前女友的胡定欣亦說：「我有睇，真係好感人，我哋仲有出街食飯同睇戲，（似乎翻撻有機會喎！）隨緣啦！」
第 24集馬明向楊怡求婚成功，但絲打最感動係馬明讀誓詞一幕。
胡定欣探馬國明班，之後仲做埋老臨在《 On》劇客串 6秒，真係另類支持男友。
同佢有出街食飯！
Orignal From: 木偶鼻離奇短咗 楊怡：假鼻？我呼吸到喎！
沒有留言:
發佈留言