陳敏之自言今次拍《東西宮略》可謂有驚喜，也有淚水。今次是敏之第一次做女主角，但卻沒有飄飄然，相反正增加了自己的壓力。「第一次做女主角，壓力好大。當時身體唔好，但都開始復工拍劇，點知自己拍冇耐，又開始有少少唔舒服，幾驚之前個病會復發。好彩拍了2個月後，身體沒事好返晒。諗返落，原來自己都好捱得，因為今次個角色戲份很重，對白又長，自己都怕處理得唔好。幸好有大王(郭晉安)在，佢好似阿頭咁好識睇住成組人。我發現做主角一點也不易，既要做好自己本份，又要識在現場搞氣氛，還要顧及好多，少點精力都不行。」
嬌滴滴角色更考演技
劇集播出以來有不錯的收視，最高達30點，即有192萬觀眾收看，對敏之來說算是打下一支強心針。她很多謝劇中拍檔陳法拉及郭晉安的循循善誘。「我是一個很悶蛋的人，今次呢個劇是喜劇，好多時導演畀咗劇本我們，安仔、我同法拉會坐埋一齊度場口，睇吓點樣拍出來更好睇。與其說3個人度，不如話我是旁聽為主。特別是法拉，好多鬼主意，有喜劇的編劇天份似導演，佢好知道自己的位置。之前我知道自己做夏迎春，因為我份人比較男仔頭，都有諗過會否做鍾無艷比較好。現在睇番，夏迎春同自己真正的性格好相反，要扮嬌滴滴，咁更考自己演技，反而更有火花。我也很多謝我前經理人，因為拍公司這劇之外，同時間也有一套內地劇找我。前經理人同我分析，要點去取捨，佢建議我先企穩香港市場。」
開腔澄清法拉為人
外間相傳，陳法拉在拍劇時扮一姐教陳敏之做戲，而與其傳出不和。但據知敏之和法拉識於微時，閒時私下會相約食飯。「我和法拉應該是05年相識，那時她剛選完華姐來港發展，在同一個經理人旗下。那時的經理人叫我多照顧法拉，我們的友情緣自那時。我好錫佢，那時會送一些衣服畀法拉，現在法拉見到我也會回贈小禮物畀我。法拉煮嘢食好叻，之前還親自下廚煮西餐給我品嚐。之前法拉生日，我和伍姑娘(伍詠薇)一同慶祝佢生日。法拉份人好爽、好男仔頭，好我行我素，唔會講別人是非。佢一出道，我已經覺得佢可以在呢行有好好的發展，現在也證明當日我的眼光沒錯。唔識佢的人會覺得佢好寸，但了解了、認識了，你會發現佢好直，但佢話放棄了，因為佢同傳媒解釋完，都是誤解佢。」
得到各方友好的支持，敏之自言會更努力拍多些好戲。
患病脫髮獲扶持 嫁硬男友
每個人在不同的時期，都有不同的追求，現在的陳敏之追求的是快樂的人生，當中包括大方公開拍拖快7年，現正同居、做燈飾生意男友William（雷偉信）。可惜男朋友到這刻還未開始求婚，要不然龍年又多一個新娘了。「自己已33歲，難道還告訴大家沒拍拖嗎？而且時代不同了，粉絲們也變得開通，很支持偶像拍拖。雖然公開了，但都唔會高調，也不想拖住出來做騷咁。往後的日子，就是安排好自己的工作以及調理好自己的身體為生BB做準備，自己好喜歡小朋友。但到呢刻男朋友都未試求婚，但對方是金牛座，求婚應該沒有什麼驚喜。自己山羊座，要求好簡單，不需要驚天動地的愛情。一個男人當你有病時不但沒離開你，更在家中照顧我。見到我食完類固醇消炎，副作用是大量脫髮，男朋友安慰我，胖胖的很可愛，又說禿頭很有型格，更說無論我變成怎樣都會娶我，所以我是嫁定他了，現在欠的只是一紙婚書。」
獎項獻給天國父親
去年獲「最佳女配角」敏之在台上哭成淚人，其實在頒獎禮前，記者曾傳了短訊畀敏之，叫佢要忍著眼淚，因為在天國的陳爸爸不想見到佢哭。「其實獎一刻只知個腦一片空白，因為之前在馬來西亞已經拿了獎，人人都話那邊拿了獎，公司台慶未必有。記得華哥(黃日華)在化妝間見到我曾表示如果真係我獎，要我除對高跟鞋，因為唔想矮過我。所以聽到名字一刻，我只記得除鞋上台。那天收到好多短訊，也有很多台前幕後人員的賀詞。約半個月後，公司那個獎也真正到手，把兩個獎拿畀爸爸睇時，真係喊到收唔到聲。我把爸爸的結婚戒子套在獎座上面，代表我把獎送畀爸爸。雖然佢離開咁耐，我以為自己放低了，其實佢一直在我心中沒走過。男朋友話其實我斷骨也值得，佢在頒獎禮當日，專登找一間有電視直播的餐廳和朋友食飯，到我那部分時，他緊張到雙手合十，當知道我攞獎時大呼一聲『yes』，朋友畀回段片我看，我都覺得好好笑。正因為大家好錫我，我會畀心機拍多些好戲。」
陳敏之早前與男友William及一大班朋友共賀生日。資料圖片
Orignal From: 陳敏之續闖高峰
沒有留言:
發佈留言