「壹電視大獎2012」特刊

壹電視大獎 2012

10大電視藝人

2012年03月29日

The One
第一位　陳豪
一年之內，陳豪經歷了被前度拖新仔拋棄，成為全港第一慘男人，而回復單身後，即被無綫大量花旦、姐仔所有雌性動物吼實，獲封為第一筍盤稱號，點知話咁快就俾陳茵媺全面收購，兩人更被影到喺深井愛巢互餵，陳豪一百八十度變成 No.1 Sweet heart，幸福到冇人有，再加埋一年之內拍咗八個廣告，產量之多令佢躍升無綫搵錢龍虎榜排名第一藝人，樣樣嘢都攞第一，難怪要陳豪形容呢一年內發生嘅事，佢只講了一個字：「順！」


Wardrobe： Burberry Prorsum
Make-up： Marsha Ma@A＆V Make Up School
Hair： Ivan@Headquarters
Accessories： David Yurman

下次再見？
第二位　佘詩曼

離開無綫北望神州，原來佘詩曼已經唔經唔覺離巢一年，只不過呢一年裡面，無綫仲不停播佢有份演出劇集《花花世界花家姐》、《天與地》同《 4 in Love》，所以覺得阿佘好似冇走過咁，但當所有存貨已播晒，而佢欠無綫尚有廿集，幾時開拍？遙遙無期，呢段時間要喺香港睇到阿佘嘅戲，相信要上土豆網或者 PPTV先可以見到佢喇！
「無錯，我依家喺香港嘅時間的確少咗，最初都以為唔會適應，點知我適應能力好強，我已經好鍾意喺大陸拍戲嘅生活，工作時間唔使咁長，私人時間都多咗，做人都放鬆啲……」阿佘一路咬住 pizza個樣好滿足咁講。
雖然見到今日嘅阿佘狀態同收入都好過之前，但諗起呢十一年嚟，同阿佘一年一度嘅約會（壹電視頒獎禮），下一年好大機會見佢唔到（因為無綫冇佢嘅劇出街，但又未拍得香港其他電視台住），我驚反而係我未適應唔到！

Accessories： David Yurman
Wardrobe： THE 2ND SKIN@Harvey Nichols
Make-up：江中平＠ A&V Make Up School
Hair： Lorraine Lam@Hair Culture

事後
第三名　胡杏兒

兩個幾月前，見到已經貴為視后嘅胡杏兒，知道佢攞獎後做到無停手，要返大陸密密拍劇賺人仔，其間大家提起「壹電視大獎」，最初以為杏兒做咗視后大牌唔志在，點知杏兒好俾面，話如果咁好彩入選，一定會度掂個期返香港出席頒獎禮，結果杏兒順利入選殺入三甲，佢亦好有口齒同劇組請假返香港。
為咗影特刊，杏兒更犧牲瞓覺時間，凌晨四點鐘起身化妝整頭，喺氣溫只有四度嘅蘇州湖邊，著住一件薄到得層紗嘅露背長裙吹足兩個鐘頭寒風，之後再趕返劇組開工。
記得曾幾何時，胡杏兒都有俾傳媒寫過未紅先驕，但今時今日已經係視后級人馬嘅佢，有信用之餘，仲咁專業，睇嚟視后呢個獎令佢更謙而唔係更囂。

Wardrobe： Vivienne Tam

逃！！
第四位　張可頤

已經過檔王維基做「城電一姐」的張可頤，臨走前憑住無綫劇集《法證先鋒 3》，擸埋十大電視藝人第四位。決定離開效力十七年的機構，張可頤表示唔係因為無綫合約條件苛刻，傾到不歡而散，而係覺得十七年喺同一機構打工其實好唔正常，「嚟緊香港會多幾個電視台，我覺得對電視行業係好事，轉工其實係一件好平常嘅事，去到新環境，一定會學到唔同新嘢，好似最近去大陸拍劇，而家大陸劇組認真程度同工作效率，都令我大開眼界，如果我唔行出去睇吓，我唔會見識得到！」
但係最多人怕，就係萬一成為叛將後，無綫會從此封殺，冇得返轉頭，「喺商業社會上，冇嘢係永遠，我走之前都有見過樂小姐（樂易玲）、珍姐（曾勵珍）同陳生（陳輝光），大家都無唔開心嘢發生，同埋我相信咁大間機構，唔會咁小器有呢啲（封殺）嘢發生？」
雖然過往有唔少人過檔亞視又返轉頭入無綫，但我推測以張可頤呢類性格巨星，走得出呢個門口，就冇諗過返轉頭。

Wardrobe： Stylist Own
Make-up： Jessica Chan　 Hair： Kel Fung@HHhair.nail

淚眼煞星
第五位　鍾嘉欣

做慣乖乖女花瓶角色的鍾嘉欣，喺《點解阿 Sir係阿 Sir》中一場喊戲，惹來全港討論，娛樂版更以「哭震全城」做 C1頭條，鍾嘉欣立即變成演技派，之後喺《缺宅男女》繼續連場喊戲，進一步奠定鍾嘉欣苦情女王地位。
「每次拍喊戲我都係真眼淚，因為如果連自己都感動唔到自己，好難會感動到觀眾，不過呢兩部戲之後，我都停咗無再拍啲喊戲住，第三次啲觀眾都仲可能覺得喊得唔錯，到第四、五、六次啲觀眾就會話淨係識得喊，冇其他嘢識做，所以我唔想停留喺某一種角色，我其實都可以做壞人，甚至殺人犯……」
觀眾想唔想睇鍾嘉欣做壞人，我唔知，但係早幾日佢上載咗一張著住超少布 bra top做運動，成身濕淋淋出晒汗嘅相放上 Facebook，話咁快就有萬五人讚好，觀眾想睇乜，唔使講喇啩！

Make-up：江中平＠ A&V Make Up School
Hair： Green Cheung@Chin G.

自我毀滅
第六位　黃宗澤

黃宗澤同胡杏兒拍拖以來，從來冇刻意隱瞞情侶關係，最近黃宗澤更以「我屋企個女人」稱呼胡杏兒，坦白程度越來越高，眼見同期大多數小生都選擇扮晒純情，唔會拍拖只愛粉絲，直到俾人將床照公開，都要扮感情缺失搏同情，黃宗澤的確與眾不同，「我從來都冇當過自己係偶像派！」
就因為黃宗澤自我毀滅偶像面具，冇當自己係聖人，唔使吓吓 Chok住晒，所以拍戲時唔使就住齋演正派，好似喺《潛行狙擊》裡面做跛腳古惑仔「跛 Co」，打真軍用脷「賴」鞋底，甚至自度同徐子珊連場性戰，一樣可以搶過 Laughing（謝天華），難怪連曾志偉同一些電影導演都先後公開讚，喺芸芸無綫小生中，黃宗澤可塑性最高。

Accessories： David Yurman
Wardrobe： GAETANONAVARRA@LB UOMO
Make-up： Cyrus Lee@Beauty Tech
Hair： Kel Fung@HHhair.nail

On Sale 38
第七位　馬國明

自從陳豪俾陳茵媺私有化後，馬國明躍升頭號筍盤位置，加上制服誘惑，在《 On Call 36小時》做正直醫生，即刻成為一班剩女頭號目標，好似我喺公司只係順口提起會影馬國明，當時一名坐喺遠處嘅女同事，突然砰一聲彈起，緊張問我：「你幾時影一件頭，我想見吓佢呀！」到影相當日，又有四、五個做文職嘅女同事，全程蒲喺影樓門口，目的亦係為咗同「一件頭」合照，筍盤一開售得到各界女士追捧。
「距離筍盤仲有排，我覺得我又未有樓揸手，淨係經濟能力呢方面已經唔合格！」馬國明一副謙樣否認。
不過根據售樓書（八卦雜誌）所講， 38歲已是適婚年齡嘅馬國明，剛剛宣布同胡定欣一早玩完，為人又孝順，知慳識儉，唔煙唔酒，可接受女友有公主病，睇到呢幾點，足以令到一班剩女心曠神怡，連唯一所謂缺點鍾意上鹹網，都覺得係賣點。

Accessories： David Yurman
Wardrobe： CHRISTOPHER KANE/ ASHISH/ INJURY@Harvey Nichols　 Make-up： Jessica Chan
Hair： Van Chan@HAiR

星空奇緣
第八位　楊怡

連續三部劇都做專業人士，《點解阿 Sir係阿 Sir》純情女教師，《真相》正義律師，同《 On Call 36小時》絕症醫生，當中楊怡表示最鍾意《 On Call 36小時》，「我覺得醫生呢個角色好神聖，又正面，傳遞到好多愛嘅信息！」
亦因為《 On Call 36小時》，令到 dry咗好幾年，冇緋聞傳過嘅楊怡終於開齋，盛傳拍劇期間同男主角巨胸羅仲謙拍出真感情，秘密展開戀情。
一提起謙謙，楊怡即刻甜笑，「今次拍劇識咗好多新朋友，有好多都係新人，個個都好有上進心，好努力，我哋大家互相扶持，當然洋葱（羅仲謙戲中角色）戲裡戲外都起到開心果作用，令到大家都好開心。（同羅仲謙有冇火花？）當然有啦，唔單止佢，同個個對手都有……」
拍到一部有收視有口碑劇集，更搶先被推舉為今屆視后大熱，加上有位新「拍檔」互相扶持，難怪楊怡對《 On Call 36小時》情有獨鍾。

Make-up： Marsha Ma@A&V Make Up School
Hair： Ben Lam@M.isalon

強國攻略
第九位　鄭嘉穎

42歲已經係中坑級數的鄭嘉穎，去年喺《怒火街頭》露股罅成功突圍，做埋無綫雙料視帝都不特止，又俾佢拍到部大陸熱爆《步步驚心》，即時一洗霉氣。現在鄭生喺強國十分搶手，佢自誇拍每集大陸劇收成三十萬人仔，拍得住黃曉明咁勁喎！不過收幾多錢一集，其實都無乜興趣想知，我關心港佬鄭嘉穎呢段時間喺大陸，嗒過幾多件強國肉旦。

Accessories： David Yurman
Wardrobe： SaronaStudio
Model： Juna Kim@Starzpeople
Make-up： Carrie Chan@SaronaStudio
Hair： Sarona Lo@SaronaStudio
TV Product:Toshiba

女神來了
第十位　陳法拉

陳法拉影呢輯相嘅時候，佢話覺得自己好似喺堆填區中升起嘅惡魔，十足死神來了。的而且確法拉唔笑嘅時候，俾人感覺 cool到難以捉摸，所以上年佢加入「視后」大戰，結果被安排做反派，以既狼且辣手段搶獎嘅大惡魔，但最後空手而回，更萬箭穿心兼工作過勞捱出病，要停工休養。「每件事都有得失，套劇（《潛行狙擊》收得，俾人讚做得好，會好開心，但之後嘅新聞絕對係預料之外，令我好不知所措，其實俾人寫一兩次過失都冇乜所謂，但係俾人寫衰寫得多始終唔係好事，不過呢啲都冇得由我控制，好似我初入行都俾人寫我姣，但係過一段時間，演番啲正派角色，同埋做好本分行得正企得正，啲觀眾會睇得清我為人！」目前法拉仍然在休息復修階段，每日瞓足八個鐘，狂煲碟同睇書增值磨煉演技，將能量沉澱後，由死神變回女神嘅法拉將再次歸位。

Wardrobe： EMILIO PUCCI
Make-up： Annie G. Chan
Hair： Garius@IL COLPO

壹電視大獎 2012

最搶戲男配角　機會•命運　黃智賢

2012年03月29日

黃智賢入行二十三年，上年先憑「辣薑」一角，喺無綫頒獎禮上奪得演藝生涯第一個獎項「最佳男配角」，其實早喺十五年前，黃智賢亦憑《真情》裡面經常死老婆嘅痴情戇男阿海，得到全港 C9同情，係上位嘅好機會，點知命運偏偏安排佢離開無綫，四年後再重返，不過所有嘢都重新嚟過，做咗五六年行行企企角色，直到「辣薑」出現，無綫即刻搵佢續約，其他電視台亦搵佢過檔，要再一次做抉擇，黃智賢選擇留低。

「我淨係知道續約之後，我嘅戲份一部比一部多，而家喺《雷霆掃毒》做緊林峯嘅上司，同阿峯好多對手戲，你問我想唔想做男主角？我梗係想啦，但係已經過咗一定要做嘅階段，呢啲嘢始終唔到自己控制……」

又唔使咁灰，黎耀祥都做咗十幾廿年配角，而家咪又係當紅一線小生，睇吓命運點安排！



Wardrobe： LIBERTY of LONDON/ KRISVANASSCE@Harvey Nichols
Models： Patricia K/ Emilie D/ Phenix(All from Dreamodels)
Make-up on models： Carrie Chan@SaronaStudio
Hair on models： Sarona Lo@SaronaStudio

壹電視大獎 2012

最搶戲女配角　裙下之臣　陳敏之

2012年03月29日

壹電視大獎 2012

最有前途男女藝人　中女和家明　張景淳　樂瞳

2012年03月29日

今年兩位最有前途男女藝人，都有一個令人深刻嘅角色，男嘅就係《天與地》中俾人食咗嘅「家明」，女就有《點解阿 Sir係阿 Sir》反叛女學生「中女」，兩個人喺現實中未必俾觀眾嗌得出真名，但一定記得出佢哋喺劇中角色名，現在鄭重向大家介紹「家明」真名叫張景淳，「中女」真名叫龔茜彤藝名樂瞳，各位記得就記啦！



On張景淳
Wardrobe： Patrizia Pepe

On樂瞳
Accessories： Patrizia Pepe
Wardrobe： Collette@Harvey Nichols
Make-up： Vinci Tsang@idees image
Hair： Bowie Chin G.

壹電視大獎 2012

贊助商大獎

2012年03月29日

惠而浦綠惜星色藝人大獎　陳豪


Wardrobe： BALDESSARINI@LB UOMO

MOISELLE高雅時尚女藝人大獎　胡杏兒

Wardrobe： MOISELLE

Toshiba聲色非凡藝人大獎　鍾嘉欣

Wardrobe： TIBI@Harvey Nichols
Accessories： MIRIAM HASKELL@Harvey Nichols

GlamSmile最佳笑容藝人大獎　佘詩曼

Wardrobe： Badgley Mischka@Harvey Nichols

Cellbone蛻變美肌女藝人大獎　徐淑敏

Wardrobe： JAY GODFREY@Harvey Nichols
Accessories： BULATTI/ DANNIJO@Harvey Nichols
Make-up： Winki Tsang@idees image
Hair： Green Cheung@Chin G.

壹電視大獎 2012

10大電視節目

2012年03月29日

第一位　天與地
監製：戚其義
編審：周旭明
演員：陳豪、林保怡、佘詩曼、黃德斌、金燕玲、朱慧敏、陳鴻烈、張景淳、羅鈞滿、楊潮雄、梁証嘉、蔣家旻

根據全港公投結果所得，《天與地》成為本年度「十大節目」第一位，呢部戲稱得上係無綫史上最具話題性劇集， 09年拍攝期間演員陳鴻烈突然心臟病發離世、以血腥「人食人」做題材，內裡含有警世金句「 This city is dying, you know?」，連插曲《年少無知》都成為大家心目中真正嘅「金曲金獎」，雖然被網民同傳媒捧到上天封為「神劇」，是無綫難得一見破格創新佳作，但在 C9做主導嘅收視調查報告，卻輸到一敗塗地，全劇平均只有 24點，亦因為內容懷疑影射中國大陸政治，同埋其中一幕有XXX宣傳橫額出現，結果成為首部華語劇集被大陸禁播，真係貫徹戲名天與地。

第二位　法證先鋒 3

監製：梅小青
編審：蔡婷婷、梁敏華
演員：黎耀祥、張可頤、徐子珊、吳卓羲、陳茵媺、胡定欣、陳展鵬、蕭正楠
無咗歐陽震華換嚟視帝黎耀祥，佘詩曼又喺開工前突然受傷辭演，要張可頤臨危頂替，成套戲演員換晒，無綫再拍第四集的話，除咗演員陣容會再變之外，連靈魂人物監製都要變埋，因為實在有太多人被撬走。

第三位　怒火街頭

監製：唐基明
編審：劉彩雲、陳金鈴
演員：鄭嘉穎、胡杏兒、陳敏之、李燦琛、林子善、滕麗名、石修、關禮傑
法庭劇向來有收視保證，上年就有兩部《怒火街頭》同《真相》收視同口碑都勁，前者造就鄭嘉穎同胡杏兒獲封視帝、視后，後者就成功谷起陳展鵬上位一線小生位置。但講到上年最多人收睇嘅法庭戲，肯定唔係呢兩部，而係由陳志雲、李寶安同樂易玲領銜主演嘅「頂證風雲」。

第四位　真相

監製：王心慰
編審：關頌玲
演員：楊怡、陳展鵬、唐詩詠、黃浩然、阮兆祥、李司棋、陳茵媺、馬國明

第五位　潛行狙擊

監製：莊偉建
編審：歐冠英、蔡淑賢
演員：謝天華、黃宗澤、陳法拉、徐子珊、劉松仁、江美儀、黃智賢、歐陽靖、黃智雯、張國強
Laughing系列長拍長有，到目前為止已經有兩部劇集同兩部電影，以無綫一貫作風一定會拍到無人睇為止先肯收手，所以相信好快又會出現「 Laughing Gor之死極唔去」。

第七位　缺宅男女

監製：張乾文
編審：劉彩雲、孫浩浩
演員：苗僑偉、郭羨妮、鍾嘉欣、謝天華、吳卓羲、羅仲謙、陳自瑤、黃智雯、賈曉晨、梁烈唯、盧宛茵
以這批藝員卡士，劇情講香港住屋問題，內容夠晒貼身又有共鳴，牌面睇應該無得輸，但係真係唔明點解要咁嘥料拍咗接近兩年先播，仲要擺喺農曆年「炮灰檔」？

第八位　萬凰之王

監製：莊偉健
編審：李綺華、蔡淑賢
演員：胡杏兒、宣萱、陳錦鴻、胡定欣、江美儀、黃淑儀、陳山聰、黃智賢
因為要做「何家女婿」陳山聰提早收山，專心服侍何家千金超雲，《萬凰之王》將會是陳山聰有生以來最多戲份的代表作。

第九位　點解阿 Sir係阿 Sir

監製：劉家豪
編審：黃育德、梁敏華
演員：陳豪、楊怡、鍾嘉欣、吳卓羲、樂瞳、朱慧敏、朱敏瀚、陳偉洪、蔣志光
陳豪做情聖，連溝楊怡同鍾嘉欣，但可觀程度，始終唔及陳豪孖住女友陳茵媺一齊做公開活動，預演結婚咁好睇囉，唔知遲啲陳豪同茵媺會唔會連洞房都會喺商場預演埋呢？

第十位　 4 in Love

監製：戚其義
編審：周旭明
演員：陳豪、佘詩曼、黃德斌、江欣燕、金剛、簡慕華、韋家雄、葉翠翠、劉丹、鄧梓峰
戚其義包辦十大劇集第一同第十名，呢一部阿戚放棄玩高深，純玩愛情、收視雖然好過《天與地》，但係啲 C9依然話睇唔明！

---

Orignal From: 「壹電視大獎2012」特刊