豪語錄
迎春•接福 陳敏之
2012年03月22日
大學時代，保健處有位靚女醫生趙夏瀛，男生們沒病都去睇她，所謂「無事夏迎春」也。我便曾為生痱滋掛號，幻想着張開口索吻，聽趙醫生細心解說「口腔潰瘍」……
陳敏之，可能是無綫提名最多次飛躍進步和配角候選的花旦，數月前總算獲獎了，新劇《東西宮略》，夏迎春，注定要搶鍾無艷戲的二幫，距正印一步之遙，頗有點進軍到分水嶺的意味。
這天，陳敏之打發依依不捨的髮型助手說：「不用擔心我，乖仔啦，唔好蕩失路吖。」很媚很魅，「郭晉安（飾演齊宣王）教我，怎樣討好男人呢？就是當他小朋友來氹。」
正如我後來才知，趙夏瀛原來擅長兒科。
曾貴為小室哲哉徒弟而一事無成，卅三歲，陳敏之自嘲中女，青春有限，年多前患過敏症，臉蛋腫似豬頭，深懂美貌也不可盡靠。夏天迎接春天，本身便是時光倒流式 mission impossible，如何把握事業機遇、鎖定人生幸福？好一門專業如醫生的學問。
這不止奸妃血淚史，其實我們每人每日都在爭寵望得寵。
無用之用
讀書唔成的女仔又真係會靚啲。
為寫好陳敏之，我請來至權威的西宮娘娘——李香琴，飲茶請教。琴姐曰：「『有事鍾無艷，無事夏迎春』，夏迎春就係勝在無事、唔叻，才得人憐愛。」
陳敏之沙田長大，唸東華三院馮黃鳳婷中學，我讀呂記，連鎖式校舍，成日借啲意過去執排球想識番個隔牆花。陳敏之笑着憶述：「你們成績好，我們就 band 3。不過，讀書唔成的女仔又真係會靚啲。」
無用之用，暑期工，陳敏之在金鐘西武推銷愛馬仕香水。如果說，賣胭脂水粉要年資經驗；香味是主觀的，青春主動即可。再者，女士購化妝品愛聽店員心得，中女 sales較具說服力；香水呢，通常麻甩佬買來送給伴侶，異性相吸，靚樣秒殺。
「好多男顧客過路返轉頭，對眼望住我，明知唔係因為隻香水去買嘅。又做過 Valentino，分佣個個月萬幾，經理勸我轉全職。」
問題是，新界妹初涉世途即日對夜對奢侈品，要夠錢買，任重而道遠，擺在眼前兩條路：一、充實自己做女強人，是為下策；二、識個有錢仔，是為上策。
陳敏之說：「我還是選擇前者，咁多年拍拖都並非公子哥兒。」
但亦無謂蛀書蟲，她選擇應徵《青春》雜誌做模特兒，善用長處，包括長腿。
生意失敗
琴姐曰：「人人想紅，都要慢慢來。我之前是鳳凰女，女姐升了正印，才輪到我專做奸。那時余麗珍包辦東宮娘娘，珍姐丈夫李少芸寫劇本，唔氹得他們開心，怎長做長有？」
未興模， model們比較踏實，有次 casting特別大陣仗，到最後階段才知是日本樂壇教父小室哲哉來港揀蟀，陳敏之入選成為徒弟。
與安室奈美惠同枱食飯、夏威夷錄音、在演唱會獲介紹出場……然後，一年之間公司關門，合約轉手給無綫。
「比起小室的事業挫折，我算什麼呢？初入電視城怕被睇唔起，原來根本無人記得。 TVB乜人都有，吃回頭草、十幾年等運到不在少數，練到我實淨晒。哈，幾得意，咁後生就試過生意失敗咁。」
陳敏之音節鏗鏘，聲母 N與 L、韻尾 n與 ng一清二楚，難以相信發自她自嘲讀書唔成之口。換轉我，大學整整一學期修過粵音正讀，咁又點？應付完考試，識得分卻講不好，這是學院派與應用派之別。
「我做過 sales，自恃口才了得，但懶音多，想做司儀便要苦練，唔好再俾人笑，一放 break就搵王祖藍或者敖嘉年教我。」
實踐是檢驗真理的唯一標準。
與小室哲哉，現只剩下一個 email address，已無聯絡。
得獎哭得死去活來，頒獎的黃日華則已蟬過別枝。
對住陳法拉，「演戲時，我一定要覺得自己靚過佢好多好多。」
唐宣王
琴姐曰：「我演邪牌幾十年，從不賣弄性感，時代亦未容許。靠性感做不得長久，那並非演技。」
去年，陳敏之《怒火街頭》一幕赤裸狂奔，全城熱話。實情是，正面披毛巾乃本尊，滑滑玉背另有其人。
——早知用替身都咁爆，何不打真軍？
「那已是我底線，怕將來後悔。要贏收視率，嗰集贏晒了；講演員本份，我憑它攞了女配角獎，做人不能太野心。甚至懷疑，如果真裸，場戲接着講我死，觀眾未必會咁同情。」
Good girl的尺度，比廣播條例更嚴格——之但係，那位「影後」豈不更無名英雄？
「她是專業替身收足錢做事，唔使拋頭露面，總之每人有自己價值觀。」
在陳氏價值觀裡，夏迎春絕非反派。「根本齊宣王一開始便愛夏迎春，他對感情應該忠誠。你說『有事鍾無艷』，做到皇帝，有事可以靠自己靠大臣，點解要靠女人？」
回春
琴姐曰：「敏之難演呀！余麗珍扮鍾無艷，真實年齡大我近廿歲，兼且搽黑晒半邊臉，我係主上都偏心西宮啦。」
對，由鄭秀文到陳法拉，醜妝愈變愈象徵式，似個 punk look多些，陳敏之笑道：「我又大過法拉呢。
「其實我性格適合演鍾無艷，但主角一早定了是法拉，問點解，好多嘢無得解嘅，再問無得撈。」
青春不等人，去年便曾患病臉腫，又因古裝頭飾太重而頸椎勞損——靠樣搵食，理應「工傷」休假？
「手停口停有無得解？俾開屋企人家亦唔想收番。」
陳敏之最想儲夠錢，買回童年長大的穗禾苑，給媽媽和弟弟住（父已歿）。該早期居屋樓王，位置優勝過現今幾許豪宅，當年賣掉，要追回升幅，難似夸父追日。
——低潮日子，應想過結婚吧？或者說，一紙婚書可縛着男友不會因變樣而變心？
「最感動是他完全不介意，還笑我肥嘟嘟得意。坦白說，我們一直同居，既然有信心，為什麼不等到養好身體、變番晒靚才舉行婚禮？女仔要靚嘛。」
報載，陳敏之現因事業起飛，擱置人生大計。
「的確唔想結住，但心裡有數，幾年內會生 BB。」
咁即係……長揸股票，跌時唔捨得肉酸套現。升緊更無理由放？女人別太叻呀！
「我知我知，『有事鍾無艷，無事夏迎春』，你寧願你的男人有事定無事？梗係無事啦，所以平平凡凡便好，平淡是福。」
最感動是他完全不介意，還笑我肥嘟嘟得意。
戴着頸箍開工去。
腫脹時期照常演出。
與男友雷先生。
Who's bad?
琴姐、石堅叔，眾所周知現實生活裡好男好女。並非說正派角色盡皆偽君子，只不過，真帶來困惑。
我想起：陳敏之自愛，死不願赤裸狂奔真身上陣，其實總算有劇情需要呀；她好姊妹陳法拉在《有營煮婦》失驚無神脫剩 bra，方是因為無劇情才有需要吧？
而陳法拉由此幕一戰成名，今天榮登東宮娘娘鍾無艷。
And the whole world has to answer right now, just to tell you once again, who's bad?
--Michael Jackson《 Bad》
撰文：余家強
攝影：陳家維
協力：林國平
化妝： Jessice Chan
髮型： Van Chan
服裝：吳美美
整理：潘倩兒
鳴謝： Fendi、 Katie Judith@i.t
Orignal From: 迎春•接福 陳敏之
沒有留言:
發佈留言