郭晉安自從演出《戇》劇成功後，之後的劇集《阿旺新傳》及《古靈精探》都大受歡迎，大家對安仔演出的喜劇自然會有所期待。今次《東》劇安仔再演拿手的喜劇，觀眾自然睇高一線，安仔亦很明白這個道理，所以接拍前都做足功課，不過竟然是向兒子偷師。
安仔說：「呢個角色雖然係個昏君，但係喺愛情方面佢唔係花心，佢一直都係鍾意美人（夏迎春），後尾只係被三番四次救佢嘅鍾無艷感動咗，所以佢唔算係衰人，監製亦都希望我做到唔好令觀眾討厭，咁樣就有難度，我唯有參考我個仔同佢啲同學，佢哋鍾意一樣嘢好直接。好簡單，攞咗佢哋呢份特質，變番大個啲，就好像依家啲80後咁，唔會諗咩恩情，佢靚我咪鍾意佢囉！」
安仔向來都好有觀眾緣，對公眾接受他的角色有幫助，加上身邊有阮兆祥和梁烈唯兩個搞笑能手，令角色更突出，所以安仔都有信心憑此角再奪獎，「祥仔同唯唯兩個，真係令到我呢個昏君更加昏庸、更加抵死。我有信心可以再下一城問鼎視帝，希望今年個高潮位，就係破到「阿旺」紀錄，因為今次觀眾層面更廣，小朋友之外，男人都會鍾意睇。」
不想港劇＝快餐劇
安仔06年跟歐倩怡結婚後，08年誕下兒子令山，去年再誕下女兒以雅，一家四口幸福美滿，令孤家寡人的視帝鄭嘉穎亦坦言羡慕。兩個夠晒數的安仔，現在對家庭已沒有特別追求，只要為了兒女好，可能要變為現代男裝版「孟母三遷」，「依家係煩緊可能要搬番出巿區住，以前住西貢係方便我返工，但係依家有咗小朋友，校網最好都係九龍塘，可能要喺嗰區搵番間屋，都想小朋友第時返學可以方便啲。」
現在安仔每年會返內地拍一、兩套劇搵真銀，其餘時間就會留港拍一套劇集以及陪伴家人，雖然不會像以往咁搏，但對事業依然有追求，「我希望除咗之喜劇之外，其他戲種都可以畀觀眾接受，角色可以有突破，其實喺內地劇集啲題材真係闊好多，好似自閉症同失憶，一啲敏感嘅題材都夠膽寫，港劇通常唔會寫得咁深入，好似《天與地》呢種劇其實係要有，我唔希望有一日，大家一睇嗰啲快餐劇，就會話係港劇囉！」
撰文：杜淑霞 攝影：徐錦池 服裝：Koyo Jeans 場地：FANDANGO SPANISH RESTAURANT（2957 8797）
曾兩奪視帝的郭晉安，坦言希望可以憑喜劇《東西宮略》中的「昏君」一角，第三度登上視帝寶座。
後記——唔想做特首
安仔坦言很享受做昏君的過程，雖然跟美人陳敏之齊齊出浴，不單無艷福，更因浸熱水太耐，浸到頭暈，但依然開心。近來特首選情激烈，問他想做皇帝定特首，他即搖頭：「都係做皇帝好啲，要風得風，要雨得雨，特首任期只係得五年，好難做得成功㗎！」
Orignal From: 對昏君角色有信心 郭晉安望三奪視帝
沒有留言:
發佈留言