TVB娛樂八卦雜誌: 陳展鵬知足常樂！捱17年當主角未覺苦

2012年7月5日星期四

陳展鵬知足常樂！捱17年當主角未覺苦

陳展鵬17歲讀無綫訓練班入行，其間當過歌手、演過電影、入過亞視，花了17年時間，今日終當上劇集男主角位置，在別人眼中展鵬是苦盡甘來，不過在他心裏卻有另一番見解。他覺得有好機會，當然值得開心興奮，但他認為自己過去未算太苦，況且懂得知足常樂，小小苦楚就當作磨練。

撰文 : 杜淑霞攝影：徐錦池

繼在劇集《真相》後，展鵬在《衝呀！瘦身兵團》，正式當上一線男主角，用了17年時間才能上位，絕對不是一段短時間，但他不認為是苦盡甘來，「大把人努力過我，佢哋都未必有機會，可能係個天同情我一直無離開，同埋大家又畀啲同情分我啫！」

得秋生點醒

展鵬現在看得開，但當年也有個低潮期，「初初入行真係年少氣盛，所以後尾無得撈真係好洩氣，甚至有啲走入魔，有機會就咩都去做，好在嗰時同秋生拍電影《強姦陷阱》，佢提過我「呢啲變態佬角色，好似唔係好啱你喎？」我知道自己咁樣落去唔掂，如果想繼續拍電視，要入屋就唔可以再做呢啲角色，於是我專心喺亞視做，當自己係一個新人咁由頭做起，唔好計較。」

對於現在成為無綫力捧對象，展鵬坦言感到開心，但不會覺得飄飄然，「相對於當年喺ATV時，去首映禮都無人影，要專登去廁所避一避，依家係多人留意咗，當然係好事，但係我亦都試過啱啱出嚟以為好掂，結果好快就無得撈，所以依家心態會成熟好多，明白咩叫知足常樂，總之做好本份先，無好作品咩都係假，觀眾依家好聰明㗎！」

陳展鵬懂得知足常樂，小小苦楚當作磨練。