2012年3月6日星期二

婚前執靚變破相文頌嫻怒告整容醫生

FACE週刊第250期

因小失大

婚前執靚變破相　文頌嫻怒告整容醫生

2012年03月07日

淡出香港視圈多年嘅文頌嫻（文女），終於同拍拖 3年多的商人李梓慎（ Jason），上週五（ 2日）喺四季酒店筵開廿八席，順便宣布有喜 3個月，雙喜臨門，一次慶祝晒。
不過幸福背後都有煩惱，據知 35歲文女喺 08年因一時貪靚，幫襯一間星級美容院，做咗個只係價值$600的脫癦療程，不過脫癦變留疤痕，事後整容醫生仲叫文女做 Laser（激光）淡疤，可惜文女做足兩年唔滿意效果，更搞到氣餒失自信，文女嬲爆，上年年尾決心從民事訴訟，搵律師向整容醫生追討賠償。

'12變大疤
上週五（ 2日），文頌嫻於婚禮上即使化上濃妝，左眼眼肚仍見大條疤痕，小手術變破相，據知文頌嫻對此十分嬲怒。

'05細癦仔
未做手術前，文頌嫻左眼眼肚位其實只有一粒小瘡仔，但據知文頌嫻覺得十分礙眼，故不惜動手術割除，估不到自此長留疤痕。

童顏文頌嫻入行近廿年，自 1993年加入亞視拍電視劇後， 00年轉投無綫拍劇，形象鄰家女孩，近年轉戰大陸淡出香港視圈，鮮有緋聞嘅佢， 35歲終於成功脫離剩女之列做人妻。

$600脫癦出事

文頌嫻 95年拍過電影《 4個 32A和一個香蕉少年》，跟現在已是人妻兼媽咪的唐寧和淡出娛圈的何嘉莉做對手。

為了靚靚，據知文頌嫻搵過整容醫生，諗住執走左眼粒癦仔，可惜一個簡單脫癦療程留有疤痕，據知情者透露：「 08年嗰時文女喺中環一間美容中心，用$600脫咗好似粒筆尖咁細嘅紅癦，一心諗住好似普通脫癦唔會出事，點知喺眼肚留咗條長疤痕，事後個醫生雖然同文女講可以免費為佢做一項類似激光淡疤的療程，點知文女做咗 2年，唔滿意效果，之後俾人不斷叫佢再做其他療程，佢轉睇其他醫生先知條疤係永久傷痕，冇得整走，文女嗰吓成個人冇晒自信，好驚條痕會影響到幕前的工作，佢諗咗好耐唔忿氣，所以決定搵律師告佢同間美容院囉！」
林醫生曾於美容網站 Beauty Exchange做客席顧問醫生，專門解答醫學美容及「微整形」方面的問題，而本刊於週一（ 5日）到林緯洲醫生任職的美容中心查證，林醫生只話：「我唔會回應亦唔方便回應呢件事，我唔會講任何嘢！」
週一（ 5日）下午，本刊致電文女問及此事，文女說：「呢件事都困擾咗我好耐，我都希望盡快解決，現階段我唔方便講咁多，我交晒畀律師處理。」雖然脫癦變留疤，但文女家都變幸福李太咯，都唔使驚咁多吖！