酒店餵嘉穎　佘詩曼送上門

2012年02月08日

鄭嘉穎去年靠內地劇集《步步驚心》發圍，之後又憑《怒火街頭》成功奪得三料視帝，唔只成為中港劇集的搶手貨，身價更狂跳十六倍，收 25萬人仔一集。
吸金變大筍盤，年初同佘詩曼「重新開始」的鄭嘉穎，最近留守內地橫店拍湖南衞視重頭劇《英雄》，雖然同劇大把北方佳麗，可惜撞啱阿佘亦於橫店為《建元風雲》埋尾，據知阿佘實行人肉速遞到鄭視帝酒店，見面之餘順便實男友免拈野花。

當眾攬女
鄭嘉穎於內地劇《英雄》中飾演吳王夫差，身邊不乏美女，上週六（ 4日），鄭視帝跟劇中飾演他紅顏知己梅兒的內地新女演員王振宇（小圖）攬埋一嚿，北方姑娘咁熱情，難怪阿佘要嵋實

出道近廿年， 06年攞完視帝後又霉足幾年，去年終憑《怒火街頭》及內地劇《步步驚心》再反彈，脫霉鄭嘉穎更成中港兩地搶手貨，更令佘詩曼另眼相看，決心掂嘉穎復合。

酒店過夜
曾被人踢爆於橫店送餃子餵嘉穎的阿佘，最近又遭目擊於酒店跟鄭嘉穎見面，阿佘食得回頭草唔怕俾人見。《蘋果日報》圖片

同地開工
阿佘和鄭嘉穎一齊在橫店開工，雖然大家唔同劇組，不過內地拍劇日日硬掘 9粒鍾，大把時間見面。

大把女攬

鄭嘉穎現正於內地橫店影視城拍攝湖南衞視重頭劇《英雄》，鄭視帝劇中演吳王夫差，奉旨同一堆樣靚身材正的內地女星做對手戲，攞正牌同北方佳麗攬錫兼親熱，本刊上週六（ 4日）於橫店直擊鄭嘉穎拍攝《英雄》時，見他戲裏戲外都與女演員分外熱情，即使鏡頭外亦互相熊抱。
內地拍劇玩得開心，阿佘亦同樣身處橫店拍緊內地劇《建元風雲》，嘉穎早前回港出席活動時，又懶瀟灑話：「橫店話大唔大，真係冇見到，亦都未必會撞到。」以為鄭視帝真係可以撇甩阿佘，但實情鄭視帝對住大班靚女只係有得睇冇得食。