公開養生秘方　 80歲胡楓操弗開個唱

2012年02月24日

紅館開個唱唔止係年青人玩意，依家連老人家都啱玩。

晚晚喺《結•分@謊程式》都見到已經年屆 80歲嘅胡楓，不單止中氣十足，仲鬼咁精靈。日前接受本刊訪問時，修哥（胡楓）不時以調皮聲線回應：「哈，我份驗身報告都不知幾靚，冇嘢超標㗎！」食得、玩得、跳得嘅修哥， 4月將會孖住 13位契仔契女於紅館開 party。近日正忙為《結》劇埋尾的修哥，一有時間便會跑步練氣。要踢腿高過頭，修哥話：「冇難度！」

年初無綫為胡楓 80歲生日舉行一個大 party，大班契仔契女爭相出席，久未在無綫露面的張學友亦俾面現身，足見修哥人緣好多人錫。

80歲胡楓

踢腿
高難度動作唔係後生仔專利，修哥熱身後，突然使出一招猛力踢腿。姑勿論對腳係咪直，但修哥好輕易做到，完成後仲馬上要求睇相，佢話：「睇吓個姿勢靚唔靚，同埋對腳夠唔夠直先！」

80歲胡楓

跑步
咪睇修哥 80歲人，查實佢每日都要瞓 8個鐘至夠，每朝佢都會做早操、扭腰、慢跑呢類帶氧運動，難怪 keep得咁 fit。

80歲胡楓

扭腰

紅磡隧道九龍入口旁的廣告板出名收費貴，不過修哥有 13個契仔契女夾錢賣廣告。據知個廣告會擺到開騷，上面更有契仔張學友同契女林憶蓮的個唱廣告傍住，好 warm啫！

餐餐食到飽

「我啲契仔契女個個都好乖，全部都好有我心，除咗之前嚟過 tvb個騷之外， 4月個演唱會，個個都出錢出力，有啲會同我一齊上台唱歌，有啲就出錢，幫我買咗二百張海報貼小巴，又幫我賣紅隧廣告嚟祝我演唱會成功！到時除咗佢哋之外，我有兩個孫都會上台唱歌。」修哥邊講邊笑，幸福到出面！
不過演唱會又唱又跳三小時，修哥可有擔心體力唔夠？「點會唔夠氣啫？我好鍾意行路，一有時間就行，有時又跑吓，熱天仲會去泳池游水。早幾年我唔會食到十成飽㗎，都係 7、 8成左右。不過近年喇，我每餐都食飽飽，最緊要少油少鹽，所以我身體一切良好，份健康報告不知幾靚，邊個話我唔夠氣呀？（要唔要忍口，有冇嘢唔食得？）我又唔食零食嘅，使咩忍口！」說罷修哥忽然偷笑，再低聲告訴記者：「不過都有一樣嘢係忍唔到口，就係鵝肝醬喇！」修哥邊做訪問邊鯨吞面前的三文魚意粉，加上前菜沙律和餐湯，食量認真唔小。

80歲胡楓

三餐十成飽
修哥唔介意一邊做訪問，一邊開餐。佢食完一碟沙律，緊接餐湯，再將整盤三文魚意粉鯨吞。見個餐包唔食會浪費，最終都將餐包剷除埋。食得是福嘛！

80歲胡楓

眼明手快
記者懶醒問修哥平時出入坐的士抑或坐地鐵，修哥一句：「你以為我冇牌咩？唔識揸車咩？我只係三年要交一次醫生紙。」記者要求影一張修哥揸車相，修哥講笑：「唔得喎！咁樣賽車會打嚟搵我，我咪好唔得閒！」

屋企狂練歌

勁過巨聲幫
年初無綫幫修哥搞咗個 80歲生日 party騷，當晚唔單止有契仔、契女撐場，修哥仲同後生幾輩嘅巨聲幫跳勁舞，精力認真充沛。

十年前，修哥曾在張耀榮的支持下開過 70歲的《楓 show人生演唱會》，剛於一月過了 80歲生日的他， 4月又舉行《胡楓 80巨星演唱會》。「耀榮舊年已經搵我傾，咁我又無所謂嘅，咪玩吓開心吓囉！依家呢個日子幾好吖，啱啱拍埋《結•分@謊程式》，就有一個星期俾我準備。（開始緊張未？）唔會緊張！只要做好準備，就一定唔會緊張。依家我成日都唱歌，未埋位又唱，喺屋企又唱，不過我一唱太太就走入房睇電視，哈哈！」說畢修哥即在餐廳哼起幾句〈往事只能回味〉，侍應阿姐在旁聽到如痴如醉。

離開餐廳，修哥一馬當先，其間遇上餐車推出來，他即時轉身閃開，清脆利落，不能相信眼前人是一位年屆 80歲的長者。修哥養生之道，不外乎是活得開心。「行多啲對身體有益，我喺屋企都係行來行去嘅！我好鍾意返電視台、鍾意開工，行出行入都有人同你打招呼，講吓笑咁，呢啲係用錢都買唔到嘅歡樂。」記者亦親身體驗，與修哥在電視城內短短 5分鐘的訪問時間，已有不止十人「修哥前、修哥後」，侍應阿姐則較喜歡稱修哥做「修修」！
今次修哥演唱會有咁多契仔契女巨星撐場，除咗吸引老一輩 fans入場，仲可以吸引埋年青 fans㖭！