撰文：何慧斯
去年離巢外闖的周家怡，在無綫的告別作《 On Call 36小時》現正播映，雖然坊間盛傳無綫踢叛將入冷宮，不過她笑說：「我唔擔心俾人封殺，劇集都出街喇，今次戲份唔算多，只係做一個暗戀馬國明嘅護士，家睇番當然感觸，不過我覺得係完美嘅結局，因為訓練班畢業第一部拍嘅係德哥（潘嘉德）嘅劇（編按： 99年《刑事偵緝檔案 IV》），嗰次係叫琪琪，點知最後一部又係拍德哥，又係叫淇淇，真係好邪。」
周家怡效力無綫十多年，羽翼漸豐終可以振翅高飛，轉投電訊魔童王維基（小圖）懷抱，希望能闖出新天地。設計圖片
攝影：陳慧安
場地提供： An-Tico Enoteca． Pizzeria（ The ONE）
「好怕做主持」
家怡透露四月頭正式拍新公司的劇集，問到當中的內容，她說：「我暫時知道有兩部傾緊，不過只係初步傾，我自己都想拍番戲，感覺好耐冇拍，有啲悶。」她續說：「我希望嚟緊可以有多啲嘗試，有啲唔同嘅轉變，最好梗係可以拍有多啲戲份嘅戲，雖然公司乜嘢都有，但係我個人好怕做主持，口才唔得，轉數又好慢，怕能力唔夠。」
重提決定離開合作 13年的公司，她說：「決定走嗰刻真係好大勇氣，係好唔捨得，我返 TVB好似返屋企咁，台前幕後個個都好熟，雖然我唔係經理人約嘅藝人，但係真係好多謝啲監製，佢哋好肯用我，只不過唔係成日會有人叫我走，家有人畀我呢個機會，將來未必有，如果我一路喺 TVB做，家叫做多咗啲戲份，唔擔保將來會有，始終我唔係簽咗經理人約，所以咪決定應該要出去走走，見識呢個世界。」
已踏入三字頭的周家怡自認鼓起勇氣去跳槽，是因為「趕住去學嘢」。
現正休養生息的周家怡，四月便會重新投入拍劇工作。
「 TVB好保護」
在《 On Call 36小時》中演護士淇淇一角，是周家怡告別無綫的最後一劇。
當日坊間盛傳佘詩曼離開無綫後，曾經幫手挖角，問家怡是否受好姊妹影響，她笑說：「都冇關係，我哋又唔係同公司，我只係有問過佢嘅意見，佢叫我自己諗，想走咪走，但係如果有擔心就唔好走，因為喺 TVB真係好保護。事實上我同佢根本冇得咁比，佢係女主角，我哋層面都唔同，我只係覺得機會唔係成日有，雖然呢個機會未必係一定得，不過既然呢個機會畀咗我，我係咪可以學多啲嘢？我想試吓靠自己出嚟去面對，識多啲嘢。我覺得自己唔夠料，好多嘢都未夠班，演技仲有得進步，所以我要識多啲可以教到我嘅人，等佢哋開導。我家嘅心態係乜都會試，人生經驗越多，做戲自然會好，容易摸到嗰份感情。」
「趕住去學嘢」
隨着免費電視台面臨新轉變，問周家怡會否覺得是外闖發展好時機？她坦言：「真係唔知，要到之後見到先知，我反而覺得每個階段都有唔同，唔勤力一定唔得，就算得唔會耐，我自己亦有一個限度，唔想錯過呢個年紀可以做嘅嘢，對於我嚟講，呢個係好時機畀我趕住去學嘢嘅機會，對新嘅開始我唔敢去擔心，亦唔輪到我擔心，做得呢行預咗，所以我會盡自己本份去做，希望可以做得最好，盡力去填滿自己，試多啲嘢。」
綠葉檔案 驚喜人物
周家怡入行 13年，雖然未能登上一線女主角之位，但她用心演繹每個小角色，令觀眾眼前一亮，努力有回報，終被電訊魔童挖角，有望殺上一線做女主角。
04年《金枝慾孽》
白蘭
06年《火舞黃沙》
兔唇女茅小琴
07年《師奶兵團》
老火湯
11年《花花世界花家姐》
哈皎皎
11年《天與地》
Mabel
Orignal From: 黃金視窗：周家怡走佬跟魔童
沒有留言:
發佈留言