FACE週刊 第248期

爆 source

浸大開 talk自爆　陳志雲後悔做飯局

2012年02月22日

服務無綫廿載的陳志雲於去年 11月提出請辭後，往美國矽谷等地遊學，上年尾陳總宣布請辭同時亦公開表示，如果日後再戰電視圈就一定首選 TVB，上週四（ 2月 16日）陳總秘密到浸大與一眾電視電影系學生分享管理電視台心得。見全場學生，陳總盡訴心中情，自爆有多間媒體搵佢過檔之餘，仲話好後悔主持《志雲飯局》！

陳總浸大講座極低調，只通知電影電視學系內同學，當日校方禁止在場同學拍攝及錄音，亦不見傳媒入場採訪。


陳志雲在浸大兩個多小時的講座，除了分享在 TVB多年工作經歷，亦同在場同學搞笑說：「播《歡樂今宵》時，我仲好細個，內容記得不清楚！」引得全場大笑！


浸大希望陳志雲講座能順利進行，除大會拍片外，禁止全場同學拍攝同錄音，只准同學筆錄！


有玄機
去年陳志雲向傳媒宣布請辭遊學，當時斬釘截鐵說，若回電視圈一定首選無綫，但遊學半路回港就改口話未有打算，好有玄機！


站得太前
陳志雲做了 139集《志雲飯局》令他人氣大升，由幕後高層變身幕前藝人，如果可以再揀一次，陳總說不會再站得太前，拒做《志雲飯局》主持。

我未 ready！

陳總開始時先介紹無綫歷史，之後就話：「假設我收 6蚊人工，其他電視台畀我 10蚊， TVB只要畀我 6個半，我都會留喺 TVB！」擺明向娘家示好。有同學問他如何保持年輕外貌，他就大講人生道理。「除咗早睡早起，唔煙唔酒，最重要係時刻保持愉快心境面對人哋嘅閒言閒語，亦不妨採取鴕鳥政策，不聞不問，唔使太在意。」

當日講座的主持浸大電影系蕭景路老師問他：「若給多次擔任陳總機會，你會有什麼不做呢？」陳總沉默片刻說：「如果再揀多次，我就唔會做《志雲飯局》主持，因為節目令我走得太前，由幕後管理人員一下子去到幕前做藝人、名人，其私生活受到大眾關注，但其實自己心理上卻尚未準備好。如果回到過去，我會留守幕後，將機會畀更多藝人，推佢哋去得更前。」

回歸等轉會

又去冰川、又向世界出發，估不到原來陳總後悔太高調，當主持再問遊學後會有什麼大計時，起初陳總只答：「我下月 3、 4號會喺灣仔會展幫好友林以諾牧師做嘉賓，記得買飛！」之後陳總突然又補充：「其實有多間媒體接觸過我，不過待我去完德、英、美遊學之後，先再作打算！」

陳總坦白講

陳總除了大剖白，亦向在場同學分享對無綫的睇法，希望浸大生作日後工作參考。

彈林峯

林峯首〈 Chok〉獲得 TVB「金曲金獎」，網上過 10萬人 dislike，但陳志雲說：「這是由網友、評審、投票委員會投票而定。」

林峯首金曲金獎歌曲〈 Chok〉，我真係唔識唱，但唔可能講唔 hit，只係我唔識！講真我只聽過 1、 2次，第一次聽覺得不如用嚟做《變身男女 Chok Chok Chok》主題曲。
林峯唱歌又得、跳舞又得，佢實有一定嘅支持者，如果唔係都唔會喺紅館開咁多場嘅！

Cut《勁歌》

《勁歌金曲》因四大唱片公司合約問題，很多歌手未能出席，惟有以玩遊戲為主。

之前因為五大唱片公司合約問題，《勁歌》收視好低，曾經一度想放棄（《勁歌》），但電視台必須有音樂節目，好似雞肋，體育節目我哋已經冇太多資金買入，所以音樂我哋絕對唔可以放棄。

推《天與地》

《天與地》已拍畢兩年，現在才推出，陳志雲仗義再在同學面前為無綫雪藏該劇作澄清。

好多人話節目部雪藏《天與地》兩年，我要幫佢哋平反，其實我哋曾經三次想推出，但三次都撞 cast（即劇中演員，與其餘兩線劇重複出現），所以先延遲。當時唔覺得會有高收視，因為套劇將電影語言放入電視，對觀眾嚟講係一個新嘗試。

冇偶像

台灣勁多青春偶像，除唱歌還跨組別拍偶像劇，話晒隔籬飯香，香港學生妹特別追捧。

台劇好有「台味」，一種係好有鄉土味；一種就由頭喊到尾；另一種就係青春偶像劇，好似《花樣》（《花樣少年少女》），我哋好難學到，因為香港冇呢類藝人。

激讚黎智英

我承認 TVB啲劇集好多時只用語言交代劇情，而黎智英近排拍啲劇就用畫面嚟交代劇情，我好欣賞佢嘅拍法。




去年黎智英花 1.2億新台幣開拍台劇《拜金女王》，請來吳建豪及熊黛林遠赴法國取景，無綫邊有資源？

---

Orignal From: 浸大開talk自爆 陳志雲後悔做飯局