挖角潮拖累　無綫揾笨　劉松仁局做編劇

2012年02月17日

最近王祖藍被匿名人去信投訴，指祖藍自薦做新劇編審，質疑他根本冇資格升任。事實上，去年爆發的電視圈挖角潮，幾乎挖走無綫一半幕後人員，雖然最近聘請了一批新編劇、編審以及導演補上，但面對「飛紙仔」等即興的拍攝方法，令演員怨聲載道。

祖藍被轟冇料做編審，不過劉松仁孭飛的無綫重頭劇《名媛望族》，正因編劇人手不足，監製竟要求熟悉民初歷史的松哥幫手兼當編劇。有份主演的新人朱晨麗大爆：「松哥除咗做埋編劇之外，仲要改對白、度劇情，都好辛苦！」

撈埋編劇但係人工照舊，松哥真係抵得諗。

劉松仁

無綫多位金牌編劇及編審將會離巢，如戚其義及周旭明等，搞到無綫出現編劇荒。 2月3日，記者問松哥做埋編劇一事，他笑說：「呢啲嘢我唔答喇，你問咩我都唔會答！」

無綫部分幕後人員去年開始被王維基的城市電視高薪挖角，在嚴重缺人的情況下，直接影響無綫現正拍攝的劇集，重頭劇《名媛望族》更首當其衝。

表面上有五至六個編劇的《名》劇，原來大部分編劇都是新丁，完全不熟悉民初年代的背景與歷史，監製莊偉建不得不向主演該劇的松哥(劉松仁)求救。據知情人士說：「最初拍嗰陣，都未見松哥插手，後來松哥發覺有啲情節同民初年代有矛盾，佢先開始加意見。阿莊（監製）見松哥啲意見好有 point，之後就成日叫佢上製作部一齊開會。」

楊怡：松哥為部劇花盡心血。（真實對白）

馬國明：松哥入廠前會上製作部度劇本。（真實對白）

朱晨麗：松哥好辛苦！（真實對白）

放假度劇本
今個農曆年，劇組雖然有假放，但松哥都在家睇資料度劇本，可見這位男主角要兼任編劇一職，勞苦功高。

現年 62歲的劉松仁要兼顧兩份 job，唔辛苦就假，連馬國明都替他擔心：「松哥開工前同收工後，都會上七樓製作部幫手度劇本。為咗套劇咁出力，佢都好辛苦。依家編劇人手的確好緊張，有時場口會亂，不過都係過渡期，大家都適應緊。」新人朱晨麗亦指松哥地位超然：「套劇冇咗松哥唔得，佢又係主角，又係編劇，仲改埋對白度劇情。」
為套劇犧牲私人時間，松哥雖然冇講出口話辛苦，不過他在微博卻洩口風。大年初一全劇組放假，他則要在家睇資料度劇本。「其實劇本好多都未整理好，力求完美嘅松哥當然睇唔過眼，樣樣都要執到正，啲新丁（新編劇）又幫唔到手，佢惟有犧牲拜年時間去搞劇本。」知情者說。

撈過界受敬佩

松哥抵得諗做埋編劇雖然冇額外酬勞，但換來台前幕後的尊敬。就連監製莊偉建聽到松哥名字都敬佩三分：「松哥係套劇嘅靈魂，成套劇都圍住佢轉，淨係佢五個老婆已經夠亂啦，仲有馬明、朱晨麗、吳卓羲嘅三角戀，關係錯綜複雜，加上有年代背景，唔搵松哥幫手點得呀？人手唔夠冇計啦！」
提到今次拍劇享盡齊人之福，松哥笑說：「我同大家合作好開心，同個個太太都有牀上戲，套劇角色情緒變化好大，而且比較深層次。」不過當記者提到要撈埋編劇一事，松哥就以趕入廠為理由不作回應。
人手不足要演員撈多份，無綫真係識諗縮數。

《名媛望族》去年 11月開拍，當日開鏡拜神非常熱鬧，由松哥帶領眾演員切燒豬。

監製莊偉建：唔夠人手，松哥拍硬檔囉！（真實對白）

風流律師大家族

民初劇《名媛望族》，是今年無綫的大製作之一，劉松仁是劇中第一男主角，飾演大律師的他風流多情，娶足 5個老婆，故事圍繞這個大家庭發生，當中離不開太太們之間的勾心鬥角。
此劇演員陣容鼎盛，更成功力邀陳玉蓮出山演松哥二太太，而本來馬國明老婆季小由是由陳法拉演，但她以面癱為由辭演，改由貌似她的新人朱晨麗頂上。幾乎場場戲都有份的松哥，不時影低拍劇時的情況，上載到微博。看來他除了仆心仆命幫手度劇本外，亦好落力為劇集宣傳。